မြန်မာနိုင်ငံ၏ အခြေအနေမှာ မိမိတို့ မြင်ချင်သည့်အခြေအနေ မဟုတ်ဟု တရုတ်ပြော

ဖေဖော်၀ါရီ ၁၆၊ ၂၀၂၁
M-Media

-လက်ရှိ မြန်မာနိုင်ငံမှာ ဖြစ်ပွားနေတာဟာ တရုတ်နိုင်ငံက မြင်ချင်တဲ့ အခြေအနေမျိုး လုံး၀ မဟုတ်ဘူးလို့ မြန်မာနိုင်ငံဆိုင်ရာ တရုတ်သံအမတ်က ဒီကနေ့ ပြောကြားလိုက်ပြီး ဖေဖော်၀ါရီ ၁ ရက်နေ့ အာဏာသိမ်းမှုမှာ ပါ၀င်တယ်ဆိုတဲ့ သတင်းတွေကလည်း အဓိပ္ပါယ်မရှိတဲ့ သတင်းတွေ ဖြစ်တယ်လို့ ဆိုပါတယ်။

ပြည်တွင်းမီဒီယာတစ်ခုနဲ့ပြုလုပ်ပြီး တရုတ်သံရုံးရဲ့ Facebook စာမျက်နှာ တင်ထားတဲ့ အင်တာဗျူးမှာ သံအမတ် ချန်ဟိုင်က ဒီလိုပြောလိုက်တာပါ။ စစ်တပ်၊ အရင် အရပ်သားအစိုးရဟောင်းနဲ့ မိတ်ဖက်ဆက်ဆံရေးကို တရုတ်နိုင်ငံ ဆက်လက်ထိန်းသိမ်းထားတယ်လို့ သူက ပြောပါတယ်။

စစ်အာဏာသိမ်းမှုကို အနောက်နိုင်ငံတွေက ပြင်းပြင်းထန်ထန် ရှုတ်ချခဲ့ပေမယ့် တရုတ်က လူသိရှင်ကြား ကန့်ကွက်မှု မရှိသလို လုံခြုံရေးကောင်စီက ထုတ်ပြန်တဲ့ ရှုတ်ချရေး ကြေငြာချက်ကိုလည်း အစောပိုင်းမှာ ကန့်ကွက်ခဲ့ပါတယ်။

စစ်ခေါင်းဆောင်တွေရဲ့ အာဏာသိမ်းမှုဟာ တရုတ်အစိုးရလက်ချက် မကင်းဘူးလို့ ပြောဆိုမှုတွေရှိနေပြီး ဆန္ဒပြလူအုပ်ကလည်း ရန်ကုန်မြို့က တရုတ်သံရုံးရှေ့မှာ ဆန္ဒပြတာတွေ လုပ်ဆောင်ပါတယ်။ ဒါ့အပြင် ပြီးခဲ့တဲ့ရက်ပိုင်းအတွင်း ရန်ကုန်-ကူမင်း လေကြောင်းခရီးစဥ်တွေ ရှိခဲ့ပြီး အာဏာသိမ်း စစ်ကောင်စီကို တရုတ်အစိုးရက နည်းပညာပစ္စည်းတွေ၊ စစ်သားတွေ ပို့ပေးတယ်ဆိုတဲ့ သတင်းတွေလည်း ကျယ်ကျယ်ပြန့်ပြန့် ထွက်ပေါ်ခဲ့ပါတယ်။

သံအမတ်ချန်ဟိုင်းက ဒီသတင်းတွေဟာ လုံး၀ အခြေအမြစ်မရှိတဲ့ သတင်းတွေဖြစ်ပြီး လေကြောင်းခရီးဟာ ပင်လယ်စာလို ကုန်စည်တွေပို့တဲ့ ကုန်တင်လေယာဥ်တွေသာဖြစ်တယ်လို့ အင်တာဗျူးမှာ ပြောကြားခဲ့ပါတယ်။

စစ်ခေါင်းဆောင်တွေ အာဏာသိမ်းမှာကို မိမိတို့ ကြိုမသိခဲ့လို၊ အခြေအနေတွေ အေးအေးဆေးဆေးပြီးသွားပြီး မတည်မငြိမ် ၀ရုန်းသုန်းကားမဖြစ်ဖို့ မျှော်လင့်တယ်လို့ သံအမတ်က ထပ်လောင်းပြောကြားခဲ့ပါတယ်။

“နိုင်ငံတော်တော်များများမှာ ပြုပြင်ပြောင်းလဲမှုတွေလုပ်ရင် အခက်အခဲတွေ၊ စိန်ခေါ်မှုတွေကို ကျော်ဖြတ်ရပြီး ကိုယ့်အခြေအနေနဲ့သင့်လျော်မယ့် တိုးတက်မှုလမ်းကြောင်းကို ရှာဖွေရစမြဲပါ”

Ref: The Strait Times