မြန်မာ့အရေး အာဆီယံအဖွဲ့က အပြုသဘောဖက်မှ ချဥ်းကပ်ဖြေရှင်းရန် အင်ဒိုစည်းရုံးနေ

ဖေဖော်၀ါရီ ၁၇၊ ၂၀၂၁
M-Media

-လက်ရှိ မြန်မာ့အရေးကို အာဆီယံအဖွဲ့က အပြုသဘောဆောင်တဲ့ဖက်ကနေ ဖြေရှင်းဖို့အတွက် အင်ဒိုနီးရှားက အဖွဲ့၀င်နိုင်ငံတွေကို ဦးဆောင်စည်းရုံးနေပါတယ်။

အင်ဒိုနီးရှား နိုင်ငံခြားရေး၀န်ကြီး ရက်တနို မာဆူဒီဟာ ဒီကနေ့ မနက်ပိုင်းက ဘရူနိုင်းနိုင်ငံကို သွားရောက်ပြီး ဘုရင် ဆူလ်တန် ဟာဆန်နဲလ် ဘိုကိုင်းယားနဲ့ တွေ့ဆုံဆွေးနွေးခဲ့ပါတယ်။ ဘရူနိုင်းဟာ လက်ရှိ အာဆီယံဥက္ကဌပါ။

ဘုရင် ဘိုကိုင်းယားဟာ အာဆီယံ နိုင်ငံခြားရေး၀န်ကြီးတွေ မိသားစုသဖွယ် တွေ့ဆုံပြီး မြန်မာနိုင်ငံကိစ္စကို ဆွေးနွေးဖို့ အရေးကြီးကြောင်း ပြောကြားလိုက်တယ်လို့ မာဆူဒီက ပြောပါတယ်။

မြန်မာနိုင်ငံမှာ စစ်တပ်က အာဏာသိမ်းပြီး အစိုးရအဖွဲ့၊ လွှတ်တော်အမတ်တွေ၊ နိုင်ငံရေးသမားတွေ၊ တက်ကြွလှုပ်ရှားသူတွေကို ဖမ်းဆီးထိန်းသိမ်းမှုမှာ အာဆီယံအဖွဲ့က ထိထိရောက်ရောက် တုန့်ပြန်ဆောက်ရွက်တာ မရှိဘူးလို့ ၀ေဖန်ခံနေရတာပါ။

မလေးရှား၀န်ကြီးချုပ် မုဟ်ယစ်ဒင်ယာစင်နဲ့ အင်ဒိုနီးရှားသမ္မတ ဂျိုကို၀ီဒိုဒိုတို့က မြန်မာနိုင်ငံအရေး အာဆီယံ အရေးပေါ်အစည်းအ၀ေးပြုလုပ်ဖို့ နိုင်ငံခြားရေး၀န်ကြီးတွေကို အခုလအစောပိုင်းက ညွှန်ကြားခဲ့ပြီးတဲ့နောက် အင်ဒိုနီးရှားရဲ့ ဒီကြိုးပမ်းမှု ပေါ်ပေါက်လာတာပါ။

၀န်ကြီးမာဆူဒီက အာဏာသိမ်းလိုက်ကတည်းကစပြီး မြန်မာနိုင်ငံမှာ ဖြစ်ပေါ်နေတဲ့ အခြေအနေတွေအတွက် အလွန်အမင်း စိုးရိမ်မိတယ်လို့ ဘရူးနိုင်းဘုရင်နဲ့တွေ့ဆုံပြီး ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။

အာဆီယံအဖွဲ့က မြန်မာနိုင်ငံအတွက် ဘာတွေလုပ်ပေးနိုင်မလဲလို့ မေးမြန်းရာမှာတော့ အာဆီယံ သဘောတူညီချက် အပိုဒ် ၁ (၇) မှာ ဖော်ပြထားတဲ့အတိုင်း ဒီမိုကရေစီခိုင်မြဲရေး၊ ကောင်းမွန်တဲ့အုပ်ချုပ်မှု၊ တရားဥပဒေစိုးမိုးရေး၊ လူ့အခွင့်အရေးနဲ့ အခြေခံ လွတ်လပ်ခွင့်တွေကို ကာကွယ်ရေး သတ်မှတ်ချက်တွေနဲ့အညီ ဆောင်ရွက်သွားမယ်လို့ အလေထား ဆောင်ရွက်သွားမယ်လို့ ပြန်လည်ဖြေကြားခဲ့ပါတယ်။

အင်ဒိုနီးရှားအနေနဲ့ တစ်ခြားနိုင်ငံရဲ့ ပြည်တွင်းရေး ၀င်ရောက်မစွက်ဖက်ရဆိုတဲ့မူကို စွဲကိုင်ပြီး မြန်မာပြည်သူတွေ အန္တရာယ်ကင်းဖို့နဲ့ သာယာ၀ပြောဖို့ အပြုသဘောဆောင်တဲ့ ဆက်သွယ်ဆောင်ရွက်မှုမျိုးသာ လုပ်ဆောင်သွားမယ်လို့ ထည့်သွင်းပြောကြားခဲ့ပါတယ်။

မာဆူဒီဟာ စင်ကာပူအပါအ၀င် တစ်ခြား အာဆီယံနိုင်ငံတွေကို သွားရောက်ပြီး မြန်မာ့အရေး အစည်းအ၀ေးတစ်ရပ်ကျင်းပဖို့ စည်းရုံးမှာ ဖြစ်ပါတယ်။

Ref: CNA