ရွေးကောက်ပွဲလုပ်ပေးမည်ဆိုသည့် စစ်ကောင်စီ၏ကတိ တည်အောင် ဖိအားပေးရန် အာဆီယံက စီစဉ်နေ

ဖေဖော်ဝါရီ ၂၂၊ ၂၀၂၁
M-Media

-ရွေးကောက်ပွဲကျင်းပပေးမယ်ဆိုတဲ့ ​အာဏာသိမ်းစစ်ကောင်စီက ပေးထားတဲ့ကတိ တည်အောင် ဖိအားပေးမယ့် လုပ်ငန်းအစီအစဉ်တစ်ခုကို ဖော်ဆောင်ဖို့ အင်ဒိုနီးရှားက အာဆီယံနိုင်ငံတွေကို စည်းရုံးနေပါတယ်။

ဒီအစီအစဉ်ဟာ နိုင်ငံတကာစောင့်ကြည့်မှုအောက်မှာ လွတ်လပ်တရားမျှတပြီး အားလုံးပါဝင်နိုင်တဲ့ ရွေးကောက်ပွဲတစ်ရပ်ကို စစ်ကောင်စီက ကတိအတိုင်း ကျင်းပပေးဖို့ ရည်ရွယ်တာ ဖြစ်ပါတယ်။

ဖေဖော်ဝါရီလ ၁ ရက်နေ့ အာဏာသိမ်းပြီးတဲ့နောက် စစ်ခေါင်းဆောင်တွေက အရေးပေါ်ကာလပြီးရင် ရွေးကောက်ပွဲ ကျင်းပပေးမယ်လို့ ပြောထားပါတယ်။

ဖမ်းဆီးထားသူတွေကို ပြန်လွှတ်ပေးရေး နိုဝင်ဘာ ၈ ရက်နေ့ ရွေးကောက်ပွဲရလဒ်အတိုင်း အရပ်သားအစိုးရကို အာဏာပြန်အပ်ရေး မြန်မာပြည်သူတွေနဲ့ အနောက်နိုင်ငံတွေက တောင်းဆိုနေကြတာ ဖြစ်ပါတယ်။

အာဆီယံမှာ အင်အားကြီးနိုင်ငံဖြစ်တဲ့ အင်ဒိုနီးရှားရဲ့ အခုအစီအစဉ်ဟာ မြန်မာပြည်သူတွေရဲ့ တောင်းဆိုမှုနဲ့ ကိုက်ညီမှု မရှိဘူးလို့ ဝေဖန်သံတွေ ထွက်ပေါ်လာပါတယ်။

အင်ဒိုနီးရှားအစိုးရရဲ့ အမည်မဖော်လိုတဲ့ အကြီးတန်း တာဝန်ရှိသူနှစ်ဦးက အခုလို သံတမန်လမ်းကြောင်းကနေ ဖြေရှင်းဖို့ ဆောင်ရွက်တာဟာ သွေးထွက်သံယို မဖြစ်အောင် တားဆီးဖို့နဲ့ ရွေးကောက်ပွဲအသစ်လုပ်ပြီး နိုင်တဲ့သူကို အာဏာလွှဲပြောင်းပေးမယ်ဆိုတဲ့ ကတိကဝတ်ကို စစ်ခေါင်းဆောင်တွေက မဖောက်ဖျက်အောင် ကူညီဖို့ဖြစ်တယ်လို့ ပြောကြားခဲ့ပါတယ်။

အင်ဒိုနီးရှားရဲ့အစီအစဉ်ထဲမှာ ဆန္ဒပြသူတွေနဲ့ အာဏာသိမ်းစစ်ခေါင်းဆောင်တို့အကြား တွေ့ဆုံဆွေးနွေးရေး အာဆီယံအဖွဲ့က စီစဉ်ပေးဖို့လည်း ပါဝင်ပါတယ်။

အင်ဒိုနီးရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူက အာဆီယံ နိုင်ငံခြားရေးဝန်ကြီးတွေနဲ့ တွေ့ဆုံဆွေးနွေးပြီးရင် ဝန်ကြီး ရက်တနို မာဆူဒီ ထုတ်ပြောလိမ့်မယ်လို့ ရိုက်တာသတင်းဌာနရဲ့ မေးမြန်းမှုကို ဖြေကြားခဲ့ပါတယ်။

အင်ဒိုနီးရှားနိုင်ငံခြားရေးဝန်ကြီး မာဆူဒီဟာ မြန်မာနိုင်ငံက အာဏာသိမ်းမှုကိစ္စကို အာဆီယံက ဖြေရှင်းပေးနိုင်ရေး လိုက်လံစည်းရုံးနေတာ ဖြစ်ပါတယ်။

အင်ဒိုနီးရှားအစိုးရ အကြီးတန်းတာန်ဝန်ရှိသူတစ်ဦးက စစ်အာဏာသိမ်းမှုကို ရှုတ်ချလိုက်တာ လွယ်ပေမယ့် ဒီကိစ္စကို ထိထိရောက်ရောက် ဖြေရှင်းရာမှာ လျှို့ဝှက်လွန်းတဲ့ မြန်မာစစ်တပ်နဲ့ ပါးပါးနပ်နပ် ဆက်ဆံတတ်မှုအပေါ်မှာ မူတည်ပြီး အာဆီယံက ဒါမျိုးကိစ္စတွေကို အကောင်းဆုံး ကိုင်တွယ်နိုင်တယ်လို့ ပြောကြားခဲ့ပါတယ်။

“အာဆီယံဆိုတာ ကျွန်တော်တို့ မိသားစုပါ။ ဒါ့ကြောင့် ကျွန်တော်တို့ရဲ့ ချဉ်းကပ်ပုံချဉ်းကပ်နည်းကလည်း မတူပါဘူး”

အာဆီယံအဖွဲ့နဲ့ အင်ဒို-ပစိဖိတ်ဒေသက တစ်ချို့နိုင်ငံတွေဟာ အာဏာသိမ်းစစ်ကောင်စီက ခေါင်းဆောင်အချို့နဲ့ တိုးတိုးတိတ်တိတ်တွေ့ဆုံကာ ဆန္ဒပြသူတွေနဲ့ ညှိနှိုင်းဖို့၊ အတိတ်ကလို သွေးချောင်းစီး ကိစ္စတွေ မလုပ်ဖို့ တိုက်တွန်းတာတွေ လုပ်နေတယ်လို့ အင်ဒိုနီးရှား အကြီးတန်းတာဝန်ရှိသူ နှစ်ဦးနဲ့ ဒေသတွင်း သံအမတ်တစ်ဦးက ရိုက်တာသတင်းဌာနကို ပြောကြားခဲ့ပါတယ်။

အာဏာသိမ်းမှုအတွက် အာဆီယံက အထူးအ​စည်းအဝေးမှာ မြန်မာနိုင်ငံက ပါဝင်လာအောင် စည်းရုံးဖို့ မလွယ်ဘူးလို့ အင်ဒိုအစိုးရ အကြီးတန်းတာဝန်ရှိသူ နှစ်ဦးက ပြောပါတယ်။ လက်ရှိ အာဆီယံဥက္ကဌ ဘရူနိုင်းနိုင်ငံက အထူးအစည်းအဝေး ဖိတ်ကြားခဲ့ပေမယ့် အာဏာသိမ်းစစ်ကောင်စီက ငြင်းဆိုခဲ့ပြီး ဩဂုတ်လမှာလုပ်မယ့် ပုံမှန်အစည်းအဝေးမှာပဲ ဆွေးနွေးဖို့ အကြောင်းပြန်ခဲ့ပါတယ်။

အာဏာသိမ်းစစ်ကောင်စီက တာဝန်ရှိသူ​နဲ့ နိုင်ငံခြားရေးဝန်ကြီးတို့ကို ဆက်သွယ်လို့မရခဲ့ဘူးလို့ ရိုက်တာက ဖော်ပြပါတယ်။

Ref: Reuters