ဝေဖန်မှုများမှုကြောင့် မြန်မာ့အရေး အင်ဒိုနီးရှား လေသံပြောင်း

ဖေဖော်ဝါရီ ၂၃၊ ၂၀၂၁
M-Media

-မြန်မာနိုင်ငံက လက်ရှိပြဿနာတွေကို ဖြေရှင်းရေးမှာ ပြည်သူ့ဆန္ဒအတိုင်းပဲ ဆောင်ရွက်သင့်တယ်လို့ အင်ဒိုနီးရှာေနိုင်ငံခြားရေးဝန်ကြီး ရက်တနို မာဆူဒီက ဒီကနေ့မှာ ပြောကြားလိုက်ပါတယ်။

ရွေးကောက်ပွဲ ကျင်းပပေးမယ်ဆိုတဲ့ ကတိကဝတ်ကို အာဏာသိမ်းစစ်ကောင်စီက မဖောက်ဖျက်အောင် ဖိအားပေးမယ့် အစီအစဉ်တစ်ခု အာဆီယံက လုပ်ဆောင်ဖို့ အင်ဒိုနီးရှားက စည်းရုံးနေတယ်ဆိုတဲ့သတင်း မနေ့က ထွက်လာခဲ့ပြီး မြန်မာပြည်သူတွေကလည်း ပြင်းပြင်းထန်ထန် ဝေဖန်ပြောဆိုခဲ့ပါတယ်။

ဒီနေ့မနက်ပိုင်းက ရန်ကုန် အင်ဒိုနီးရှားသံရုံးရှေ့​မှာ ဆန္ဒပြမှုတွေ ရှိခဲ့လို သံရုံးတာဝန်ရှိသူတစ်ဦးက ထွက်ရှင်းခဲ့ပါတယ်။

ဝေဖန်မှုတွေ မြင့်တက်လာခဲ့ပြီးတဲ့နောက် နိုင်ငံခြားရေးဝန်ကြီး မာဆူဒီလည်း လေသံပြောင်းသွားခဲ့ပါတယ်။

“ပြည့်စုံတဲ့ ဒီမိုကရေစီအသွင်ကူးပြောင်းမှုကို မြန်မာပြည်သူတွေရဲ့ ဆန္ဒအတိုင်းသာ ဆောင်ရွက်သင့်ပါတယ်။ ဘာပဲဖြစ်ဖြစ် ဒီကိစ္စကိုအဆုံးသတ်ဖို့ ရှေ့ဆက်သွားရပါမယ်။ မြန်မာနိုင်ငံက အခြေအနေအတွက် အင်ဒိုနီးရှားက အရမ်းစိုးရိမ်သလို မြန်မာပြည်သူတွေကိုလည်း ထောက်ခံပါတယ်။ မြန်မာပြည်သူတွေ သာယာ၀ပြောရေး၊ လုံခြုံမှုရှိရေးက နံပါတ်တစ်ဦးစားပေး ဖြစ်ပါတယ်” လို့ ရိုက်တာသတင်းဌာနကို မာဆူဒီက ဖြေကြားခဲ့ပါတယ်။

သွေးထွက်သံယိုမှုတွေမဖြစ်အောင် ပါဝင်ပတ်သက်သူတွေအားလုံးက အဆုံးစွန်ဆုံး ထိန်းသိမ်းဆောင်ရွက်ဖို့လည်း မာဆူဒီက ထည့်သွင်းပြောဆိုခဲ့ပါတယ်။

မြန်မာနိုင်ငံ စစ်အာဏာသိမ်းမှုကိစ္စကို အာဆီယံအဖွဲ့က ကြားဝင်စေ့စပ်ဖြေရှင်းပေးနိုင်ရေး အင်ဒိုနီးရှားက ဦးဆောင်စည်းရုံးနေတာ ဖြစ်ပါတယ်။

နိုင်ငံခြားရေးဝန်ကြီး မာဆူဒီနဲ့အဖွဲ့ဟာ ဖေဖော်ဝါရီ ၂၅ ရက်နေ့မှာ မြန်မာနိုင်ငံကို လာရောက်ဖို့ရှိတယ်လို့ သတင်းတွေ ကျယ်ကျယ်ပြန့်ပြန့် ထွက်ပေါ်နေပါတယ်။

Ref: Reuters