ဩစ​တေးလျစစ်တပ် ဒုတိယအကြီးအကဲနှင့် ဆွေးနွေးမှုကို စစ်ကောင်စီက ထိန်ချန်ဖော်ပြ

ဖေဖော်ဝါရီ ၂၃၊ ၂၀၂၁
M-Media

-မိမိတို့ရဲ့ ဒုတိယအကြီးအကဲ ဒုတိယရေတပ်ဗိုလ်ချုပ်ကြီး ဒေးဗစ်ဂျွန်စတန် အာဏာသိမ်းစစ်ကောင်စီက ဒုတိယကြီးအကဲနဲ့ တနင်္လာနေ့ ဆွေးနွေးမှုအတွင်း ဒီမိုကရေစီ ပြန်လည်ဖော်ဆောင်ရေးနဲ့ ဖမ်းဆီးထားသူတွေ ပြန်လွှတ်ပေးရေး တိုက်တွန်းခဲ့တဲ့လို့ ဩစတေးလျစစ်တပ်က သတင်းထုန်ပြန်ပါတယ်။

ဂျွန်စတန်နဲ့ ဒုတိယဗိုလ်ချုပ်မှူးကြီး စိုးဝင်းတို့ဟာ ဖုန်းနဲ့ ဆွေးနွေးခဲ့တာပါ။ ဒါဟာ စစ်အာဏာသိမ်းပြီးနောက်ပိုင်း ဩစတေးလျက ပထမဆုံး ဆက်သွယ်မှု ဖြစ်ပါတယ်။

မြန်မာနိုင်ငံမှာ လက်ရှိဖြစ်ပေါ်နေတဲ့ အခြေအနေတွေအတွက် အလွန်အမင်း စိုးရိမ်မိကြောင်း ဗိုလ်ချုပ်ကြီး ဂျွန်စတန်က ပြောကြားခဲ့ပြီး နိုင်ငံတော်အတိုင်ပင်ခံပုဂ္ဂိုလ် ရဲ့ စီးပွားရေးအကြံပေး ဩစတေးလျနိုင်ငံသား ရှောင်တာနဲလ်ကို အမြန်ဆုံးပြန်လွှတ်ပေးရေး တောင်းဆိုခဲ့တယ်လို့ ဩစတေးလျစစ်တပ်ရဲ့ ပြောရေးဆိုခွင့်ရှိသူက ပြောပါတယ်။

ရှောင်တာနဲလ်ကို အာဏာသိမ်းပြီးနောက် သိပ်မကြာခင်မှာ စစ်ကောင်စီက ဖမ်းဆီးခဲ့တာပါ။

ငြိမ်းချမ်းစွာဆန္ဒပြသူတွေအပေါ် အသက်သေစေလောက်တဲ့ အင်အားသုံးမှုတွေဟာ လက်ခံနိုင်စရာမဟုတ်ဘူးလို့ ဩဇီစစ်တပ် ဒုတိယအကြီးအကဲက ထည့်သွင်းပြောဆိုခဲ့ပါတယ်။

“အရပ်သားတွေအပေါ် အကြမ်းဖက်တာမျိုးကို ရှောင်ရှားဖို့၊ ဒီမိုကရေစီကို အမြန်ဆုံး ပြန်လည် ဖော်ဆောင်ဖို့၊ ဖေဖော်ဝါရီ ၁ ရက်နေ့ကတည်းက ဖမ်းထားတဲ့ အရပ်သားခေါင်းဆောင်တွေကို ချက်ခြင်းလွှတ်ပေးဖို့ ဗိုလ်ချုပ်က မြန်မာနိုင်ငံကို တိုက်တွန်းခဲ့တယ်” လို့ ဩဇီစစ်တပ်ရဲ့ ထုတ်ပြန်ချက်မှာ ဖော်ပြထားပါတယ်။

ဗိုလ်ချုပ် ဂျွန်စတန်နဲ့ ဆွေးနွေးမှုကို စစ်ကောင်စီရဲ့ ဝါဒဖြန့်မီဒီယာတွေက​ ပြန်လည်ဖော်ပြရာမှာ ဒီမိုကရေစီဖော်ဆောင်ဖို့နဲ့ ဖမ်းဆီးထားသူတွေကို ပြန်လွှတ်ပေးဖို့ တိုက်တွန်းမှုတွေ မပါပါဘူး။

ဒုတိယဗိုလ်ချုပ်မှူးကြီး စိုးဝင်းက မိမိတို့စစ်တပ်ဟာ ဩစတေးလျစစ်တပ်လို ဒီမိုကရေစီစစ်တပ်မျိုး၊ လွတ်လပ်စွာ ဆန္ဒထုတ်ဖော်ခွင့်ကို အလေးထားတဲ့၊ ပြင်းပြင်းထန်ထန် နှိမ်နှင်းမှုကို ရှောင်ရှားတဲ့ စစ်တပ်မျိုးဖြစ်တယ်လို့ ပြောကြားခဲ့ကြောင်းကိုသာ အစိုးရမီဒီယာတွေက ဖော်ပြပါတယ်။

မြန်မာနိုင်ငံကို ဖွံ့ဖြိုးရေးမိတ်ဖက်အဖြစ် သဘောထားပြီး ကိုဗစ်ကပ်ရောဂါ တိုက်ဖျက်ရေး အကူအညီတွေ ဆက်လက်ပေးသွားမယ်လို့ ဗိုလ်ချုပ်ကြီး ဂျွန်စတန်က ပြောခဲ့ကြောင်းလည်း စစ်ကောင်စီက ဆိုပါတယ်။

ဂျွန်စတန်ရဲ့ ဒီဆွေးနွေးမှုဟာ တရားမဝင် အာဏာသိမ်းစစ်တပ်ကို တရားဝင်အောင် လုပ်ပေးသလို ဖြစ်သွားနိုင်တယ်လို့ ပညာရှင်တစ်ချို့က ဝေဖန်ခဲ့ပါတယ်။

Ref : ABC