အာဏာသိမ်းစစ်ကောင်စီနှင့် သက်ဆိုင်သည့် စာမျက်နှာများ၊ အကောင့်များကို Facebook က ထပ်မံဖယ်ရှား

ဖေဖော်၀ါရီ ၂၅၊ ၂၀၂၁
M-Media

-အာဏာသိမ်းစစ်တပ်၊ သူတို့နဲ့ ပတ်သက်ဆက်နွယ်တဲ့ အကောင့်တွေ စာမျက်နှာတွေကို မနေ့က ထပ်မံဖယ်ရှားလိုက်တယ်လို့ Facebook က ဒီနေ့ သတင်းထုတ်ပြန်ခဲ့ပြီး အာဏာသိမ်းပြီးနောက် စစ်တပ်က ပြည်သူတွေအပေါ် ဖိနှိပ်ညှင်းပမ်းနေရာမှာ သူတို့ရဲ့ ပလက်ဖောင်းကိုအသုံးပြုလာတဲ့အတွက် ဖြစ်တယ်လို့ ပြောကြားခဲ့ပါတယ်။

တပ်မတော် ကြည်း၊ ရေ၊ လေ တပ်ဖွဲ့တွေနဲ့ သက်ဆိုင်တဲ့ စာမျက်နှာတွေ၊ ဒီအဖွဲ့တွေက ပြောရေးဆိုခွင့်ရှိသူတွေရဲ့ အကောင့်တွေ၊ အာဏာသိမ်းစစ်ကောင်စီနဲ့ သက်ဆိုင်တဲ့ အခြားစာမျက်နှာတွေ၊ အကောင့်တွေနဲ့ စစ်တပ်ရဲ့ ကြော်ငြာတွေ ဖယ်ရှားခံလိုက်ရတာ ဖြစ်ပါတယ်။ Facebook ရဲ့ အခြားပလက်ဖောင်းတစ်ခုဖြစ်တဲ့ Instagram မှာလည်း ဒီဖယ်ရှားမှုက သက်ရောက်မှုရှိမှာပါ။

“မြန်မာနိုင်ငံက အခြေအနေတွေကို အရေးပေါ်အခြေအနေအဖြစ် ကျွန်တော်တို့ ဆက်လက်သတ်မှတ်ထားပြီး ကျွန်တော်တို့ရဲ့ ပလက်ဖောင်းမှာ ဘေးကင်းဖို့၊ အထူးသဖြင့် မြန်မာပြည်သူတွေ ဘေးကင်းစေဖို့ အဓိကထား ဆောင်ရွက်နေပါတယ်။ အကြမ်းဖက်မှုတွေအပါအ၀င် ဖေဖော်၀ါရီ ၁ ရက်နေ့နောက်ပိုင်း ဖြစ်လာတဲ့ကိစ္စတွေကြောင့် ဒီလို ဖယ်ရှားတာမျိုး မြန်မြန်ဆန်ဆန်လုပ်ဖို့ လိုအပ်လာတာပါ။ စစ်တပ်ကို Facebook နဲ့ Instagram မှာ ဆက်ထားရင် ဖြစ်လာမယ့်အန္တရာယ်က တော်တော်ကြီးတယ်လို့ ကျွန်တော်တို့ ယုံကြည်ပါတယ်” လို့ အာရှပစိဖိတ်ဒေသ Facebook ရဲ့ မူ၀ါဒဆိုင်ရာ အကြီးအကဲ ရာဖေးလ် ဖရန်ကဲလ်က ပြောကြားခဲ့ပါတယ်။

အာဏာသိမ်းစစ်ကောင်စီရဲ့ ၀ါဒဖြန့်အကောင့်တွေဖြစ်တဲ့ တပ်မတော်သတင်းမှန်ပြန်ကြားရေး၊ MRTV နဲ့ MRTV Live စာမျက်နှာတွေကိုလည်း ပြီးခဲ့တဲ့ရက်ပိုင်းမှာ Facebook က ဖယ်ရှားခဲ့ပါတယ်။

၂၀၁၈ ခုနှစ် ရခိုင်ပြည်မြောက်ပိုင်းက ရိုဟင်ဂျာတွေကို ပစ်မှတ်ထားတဲ့ စစ်ဆင်ရေးကို စစ်တပ်က ဆောင်ရွက်စဥ်ကလည်း တပ်မတော် ကာကယ်ရေးဦးစီးချုပ်ရဲ့ စာမျက်နှာအပါအ၀င် ဘာသာရေး၊ လူမျိုးရေး အမုန်းတရားတွေ ဖြန့်၀ေခဲ့တဲ့ စစ်တပ်ရဲ့ အကောင့်တွေ၊ စာမျက်နှာတွေ တော်တော်များများကို Facebook က ဖယ်ရှားခဲ့ပါတယ်။

Ref: Washington Post