ဦ၀ဏ္ဏမောင်လွင်ကို ဝန်ကြီးအဖြစ် အသိအမှတ်ပြုခြင်း မဟုတ်ဟု ထိုင်းဝန်ကြီးချုပ် ပ​ြ​ော

ဖေဖော်ဝါရီ ၂၅၊ ၂၀၂၁
M-Media

-အာဏာသိမ်းစစ်ကောင်စီက ခန့်ထားတဲ့ နိုင်ငံခြားရေးဝန်ကြီး ဦး၀ဏ္ဏမောင်လွင်နဲ့ တွေ့ဆုံတာဟာ စစ်ကောင်စီကို အသိအမှတ်ပြုတာမျိုး မဟုတ်ဘူးလို့ ထိုင်းဝန်ကြီးချုပ် ပရာယွတ်ချန်အိုချာက ဒီကနေ့မှာ ပြောကြားလိုက်ပါတယ်။

ဦး၀ဏ္ဏမောင်လွင်ဟာ မနေ့က ဘန်ကောက်ကို သွားရောက်ခဲ့ပြီး ထိုင်းဝန်ကြီးချုပ်၊ ထိုင်းနိုင်ငံခြားရေးဝန်ကြီး၊ အင်ဒိုနီးရှား နိုင်ငံခြားရေးဝန်ကြီးတို့နဲ့ တွေ့ဆုံခဲ့တာပါ။

ဝန်ကြီးချုပ်ပရာယွတ်က တွေ့ဆုံမှုမှာ မြန်မာနိုင်ငံရဲ့ ဖြစ်ပေါ်တိုးတက်မှုတွေကို နားထောင်ခဲ့ခြင်းသာ ဖြစ်တယ်လို့ ဒီကနေ့ သတင်းထောက်တွေကို ပြောကြားခဲ့ပါတယ်။ မြန်မာ့အရေး ကြားဝင်ဖြေရှင်းပေးဖို့ အင်ဒိုနီးရှားနဲ့ ပူးပေါင်းဆောင်ရွက်နေတယ်ဆိုတဲ့ သတင်းတွေကိုလည်း ပရာယွတ်က ငြင်းပါတယ်။

“သူတို့နိုင်ငံရဲ့ နိုင်ငံရေးပြဿနာက သူတို့ကိစ္စပါ။ ဒီမိုကရေစီလမ်းကြောင်းကို အမြန်ဆုံးပြန်လျှောက်ဖို့ပဲ ကျွန်တော် တိုက်တွန်းချင်ပါတယ်။ တွေ့ဆုံမှုဟာ တစ်ခုခုကို အသိအမှတ်ပြုတာမျိုး မဟုတ်ပါဘူး။ အသိအမှတ်ပြုဖို့လည်း သူ(ဦး၀ဏ္ဏမောင်လွင်) က မပြောပါဘူး။ သူပြောတာကိုပဲ ကျွန်တော် နားထောင်ခဲ့တာပါ။ ဒါပါပဲ”

ပရာယွတ်ဟာ အရင်က ထိုင်းစစ်တပ်အကြီးအကဲ ဖြစ်ပြီး ၂၀၁၄ ခုနှစ်မှာ အာဏာသိမ်းခဲ့ပြီးတဲ့နောက် ၂၀၁၉ ခုနှစ်မှာ ရွေးကောက်ပဲကျင်းပကာ ယူနီဖောင်းလဲ ဝန်ကြီးချုပ် ဖြစ်လာသူ ဖြစ်ပါတယ်။

Ref: Reuters