မြန်မာ့အရေးအတွက် အထူးအစည်းအ၀ေးကို အာဆီယံက အင်္ဂါနေ့တွင် ကျင်းပမည်

ဖေဖော်၀ါရီ ၂၇၊ ၂၀၂၁
M-Media

-မြန်မာနိုင်ငံက စစ်အာဏာသိမ်းမှုကိစ္စကို ဆွေးနွေးအဖြေရှာဖို့အတွက် အာဆီယံ နိုင်ငံခြားရေး၀န်ကြီးတွေဟာ မတ်လ ၂ ရက်နေ့မှာ အထူးအစည်းအ၀ေးတစ်ရပ် ကျင်းပဖို့ရှိတယ်လို့ သိရပါတယ်။

အဖွဲ့၀င်နိုင်ငံအများစုက နိုင်ငံခြားရေး၀န်ကြီးတွေက ဒီအစည်းအ၀ေးကို တက်မယ်လို့ ပြောထားပါတယ်။ တစ်ချို့က ဂျကာတာမှာရှိတဲ့ အာဆီယံ အတွင်းရေးမှူးရုံးကနေ တက်ရောက်မှာဖြစ်ပြီး၊ တစ်ချို့က အွန်လိုင်းကနေ ပါ၀င်မှာပါ။ အာဏာသိမ်း စစ်ကောင်စီက ခန့်အပ်ထားတဲ့ ဦး၀ဏ္ဏမောင်လွင်ကို တက်ရောက်ဖို့ ဖိတ်ကြားထားတယ်လို့ ဆိုပါတယ်။

မြန်မာ့အရေး အာဆီယံအဖွဲ့က ဖြေရှင်းပေးနိုင်ဖို့အတွက် အင်ဒိုနီးရှားနိုင်ငံခြားရေး၀န်ကြီး ရက်တနို မာဆူဒီက အဖွဲ့၀င်နိုင်ငံတွေကို သွားရောက် စည်းရုံးခဲ့တာပါ။ မတ်လ ၂ ရက်နေ့ အစည်းအ၀ေးဟာ စစ်တပ်က အာဏာသိမ်းပြီးတဲ့ ဖေဖော်၀ါရီ ၁ ရက်နေ့ နောက်ပိုင်း အာဆီယံအဖွဲ့က ပြုလုပ်တဲ့ ပထမဆုံး အစည်းအ၀ေးလည်း ဖြစ်ပါတယ်။

အာဏာသိမ်းစစ်ကောင်စီက ဦး၀ဏ္ဏမောင်လွင်ဟာ ပြီးခဲ့တဲ့ ဗုဒ္ဓဟူးနေ့က ဘန်ကောက်မှာ အင်ဒိုနီးရှား၊ ထိုင်းနိုင်ငံတို့က နိုင်ငံခြားရေး၀န်ကြီး၊ ထိုင်း၀န်ကြီးချုပ် ပရာယွတ်ချန်အိုချာတို့နဲ့ ဆွေးနွေးခဲ့ပါတယ်။ ၀န်ကြီးချုပ် ချန်အိုချာက ဒီလိုတွေ့ဆုံမှုဟာ စစ်ကောင်စီကို အသိအမှတ်ပြုတာမျိုး မဟုတ်ဘူးလို့ လူသိရှင်ကြား ထုတ်ပြောခဲ့ပါတယ်။s

Ref: Bangkok Post