ရဲတပ်ဖွဲ့ကို ကျည်အစစ် အသုံးပြုခွင့်မပေးထားဟု စစ်ခေါင်းဆောင်များက နိုင်ငံတကာကို ပြောထား

မတ် ၂၊ ၂၀၂၀၁
M-Media

-ဆန္ဒပြသူတွေကို နှိမ်နှင်းရာမှာ လုံခြုံရေးတပ်ဖွဲ့တွေကို ကျည်အစစ် အသုံးပြုခွင့်မပေးထားဘူးလို့ အာဏာသိမ်းစစ်တပ်က မနေ့မှာ လူသိရှင်ကြား ထုတ်ပြန်ပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးနောက် ၃ ရက်အကြာမှာပဲ နိုင်ငံတစ်ဝှမ်းအာဏာသိမ်းမှု ဆန့်ကျင်ရေး ဆန္ဒ​ပြမှုတွေကို ပြည်သူတွေက ဆက်တိုက်ပြုလုပ်ခဲ့တာပါ။

ရဲတပ်ဖွဲ့ကလည်း တစ်ရက်ထက်တစ်ရက် အင်အားသုံးနှိမ်နှင်းမှုတွေ ပြုလုပ်လာခဲ့ပြီး မတ်လ ၁ ရက်နေ့အထိ အနည်းဆုံး ၃၀ ကျော် သေဆုံးခဲ့ပါတယ်။ ဖေဖော်ဝါရီ ၂၈ ရက်နေ့က တစ်ရက်တည်းမှာ အနည်းဆုံး အယောက် ၂၀ ပစ်သတ်ခံခဲ့ရပြီး တစ်ရက်အတွင်း စံချိန်တင် သေဆုံးမှုမှာပါ။

ဒီလိုပစ်ခတ်မှုကြောင့် ဒဏ်ရာရသူတွေအများအပြား ရှိခဲ့ပြီး ဖမ်းဆီးခံရသူအရေအတွက်ဟာလည်း နိုင်ငံတစ်ဝှမ်း ၁၁၀၀ ကျော်လာပြီ ဖြစ်ပါတယ်။

သေဆုံးဒဏ်ရာရသူတွေဟာ ဦးခေါင်း၊ ရင်ဘတ်နဲ့ ဝမ်းဗိုက်ပိုင်းမှာ ကျည်အစစ်နဲ့ ပစ်ခတ်ခံခဲ့ရတာကို တွေ့ရပါတယ်။ ရဲတပ်ဖွဲ့နဲ့ စစ်သားတစ်ချို့ပါဝင်တဲ့ လုံခြုံရေးတပ်ဖွဲ့တွေ​ဟာ ပြည်သူတွေကို တရားလက်လွတ် ရိုက်နှက်တာ၊ ဖမ်းဆီးတာ၊ နေအိမ်တွေအပေါ်ထိ တက်ရောက်လုယက်ရမ်းကားတာ၊ လူနေအိမ်တွေကို သေနတ်နဲ့ ချိန်ရွယ်ပစ်ခတ်တာတွေ လုပ်တာကို ဗီဒီယိုမှတ်တမ်းတွေမှာ တွေ့ရပါတယ်။

အာဏာသိမ်းစစ်တပ်ကတော့ ဆန္ဒပြမှုတွေကို နှိမ်နှင်းရာမှာ ကျည်ဆံအစစ် အသုံးပြုခွင့် မပေးထားဘဲ အသက်အန္တရာယ် ထိခိုက်လာမယ်ဆိုရင် ခါးအောက်ပိုင်းသား ပစ်ခတ်ဖို့ လုံခြုံရေးတပ်ဖွဲ့တွေကို ညွှန်ကြားထားကြောင်း မတ်လ ၁ ရက်နေ့ စစ်တပ်ပိုင် မြ၀တီသတင်းဌာနကနေတစ်ဆင့် ထုတ်ပြန်ခဲ့ပါတယ်။

စစ်တပ်လက်အောက်ခံ ရဲတပ်ဖွဲ့နဲ့ စစ်သားတွေက ဆန္ဒပြသူတွေအပေါ် အကြမ်းဖက်နှိမ်နှင်းတာကို နိုင်ငံတကာ အသိုင်းအဝိုင်းက ပြင်းပြင်းထန်ထန် ရှုတ်ချထားပါတယ်။

Ref: South China Morning Post