အိန္ဒိယဖက်သို့ ခိုလှုံသွားသည့် ရဲများကို စစ်ကောင်စီက ပြန်တောင်း

မတ် ၆၊ ၂၀၂၁
M-Media

-အိန္ဒိယဖက်ကို ထွက်ပြေးခိုလှုံသွားတဲ့ ရပ်တပ်ဖွဲ့ဝင်တွေကို အာဏာသိမ်းစစ်ကောင်စီက ပြန်တောင်းနေတယ်လို့ သိရပါတယ်။

ပြီးခဲ့တဲ့ရက်ပိုင်းအတွင်း ချင်းပြည်နယ်က ရဲတပ်ဖွဲ့ဝင်တစ်ချို့နဲ့ သူတို့ရဲ့မိသားစု စုစုပေါင်း ၃၀ လောက် အိန္ဒိယနိုင်ငံမီဇိုရမ်ပြည်နယ်ထဲကို ထွက်ပြေးခိုလှုံသွားတာပါ။ အာဏာသိမ်းစစ်ကောင်စီလက်အောက်မှာ ဆက်လက် အမှုမထမ်းလိုတော့တဲ့အတွက် ဒီလိုထွက်ပြေးရတာ ဖြစ်တယ်လို့ သူတို့က ပြောပါတယ။်

ချင်းပြည်နယ် ဖလမ်းခရိုင်က အုပ်ချုပ်ရေးမှူးက စာပို့ပြီး ရဲတပ်ဖွဲ့ဝင် ၈ ဦးကို နှစ်နိုင်ငံ ချစ်ကျည်ရေးအရ ပြန်ပို့ပေးဖို့ ပြောလာတယ်လို့ မီဇိုရမ်ပြည်နယ် ချမ်ဖိုင်ခရိုင် လက်ထောက်ကော်မရှင်နာမင်းကြီး မာရီယာ စီတီ ဇွာလီက ရိုက်တာသတင်းဌာနကို ပြောပါတယ်။

လက်ရှိမှာတော့ အိန္ဒိယ ပြည်ထဲရေးဝန်ကြီးရဲ့ ညွှန်ကြားချက်ကို စောင့်နေတယ်လို့ သူက ဆိုပါတယ်။

မြန်မာဘက်ကပေးတဲ့စာမှာ ရဲတပ်ဖွဲ့ဝင် ၈ ယောက် ခိုလှုံသွားတယ်ဆိုတဲ့ သတင်း သူတို့မှာရှိနေတယ်လို့ ဖော်ပြထားပါတယ်။ ရဲမေတစ်ဦးအပါအဝင် အသက် ၂၂ နှစ်ကနေ ၂၅ နှစ်အတွင်းရှိနေတဲ့ တပ်ဖွဲ့ဝင် ၄ ဦးရဲ့ ကိုယ်အရေးအချက်အလက် အပြည့်အစုံကို ဖော်ပြထားပါတယ်။

အိန္ဒိယ ပြည်ထဲရေးဝန်ကြီးဌာနနဲ့ နိုင်ငံခြားရေးဝန်ကြီးဌာနတို့က ရိုက်တာသတင်းဌာနဲ့ မေးမြန်းမှုကို ပြန်လည်ဖြေကြားခြင်း မရှိသေးပါဘူး။

မြန်မာနိုင်ငံဖက်ကနေ ထပ်မံခိုလှုံလာတာမျိုးမရှိအောင် နယ်စပ်ကို တင်းတင်းကြပ်ကြပ် စောင့်ကြည့်နေတယ်လို့ အိန္ဒိယက ထုတ်ပြန်ထားပါတယ်။

အိန္ဒိယဟာ မြန်မာစစ်တပ်နဲ့ ကောင်းမွန်တဲ့ ဆက်ဆံရေးရှိနေပြီး ရဲတပ်ဖွဲ့၀င်တွေ ၀င်ရောက်ခိုလှုံလာတာက ဒီဆက်ဆံရေးကို ထိခိုက်စေနိုင်တာကြောင့် နယ်စပ်ကို ပိုမို တင်းတင်းကြပ်ကြပ် စောင့်ကြည့်ဖို့ ကြိုးစားလာတာလို့ ကျွမ်းကျင်သူတွေက သုံးသပ်ပါတယ်။

မြန်မာနိုင်ငံမှာ အခြေစိုက်ပြီး ခွဲထွက်ရေးလှုပ်ရှားနေတဲ့ အိန္ဒိယက တိုင်းရင်းသားလက်နက်ကိုင်အဖွဲ့တွေကို အိန္ဒိယအစိုးရရဲ့ ပန်ကြားမှုကြောင့် ပြီးခဲ့တဲ့နှစ်ပိုင်းမှာ မြန်မာစစ်တပ်က ရှင်းလင်းပေးထားတာ ဖြစ်ပါတယ်။

Ref: Reuters