ယူအေအီးမှ နာမည်ကျော် Sheikh Zayed ဗလီ ပုံတူကို အင်ဒိုနီးရှားတွင် တည်ဆောက်မည်

မတ် ၈၊ ၂၀၂၁
M-Media

-အာရပ်စော်ဘွားများပြည်ထောင်စု (ယူအေအီး) နိုင်ငံက နာမည်ကျော် Sheikh Zayed ဗလီဝင်ကျောင်းတော် ပုံစံတူ တည်ဆောက်မှု အုတ်မြစ်ချအခမ်းအနားကို အင်ဒိုနီးရှားနိုင်ငံ ဆိုလိုမြို့မှာ ဒီနေ့ ကျင်းပပြုလုပ်ခဲ့ပါတယ်။

ဆန်ထရဲလ်ဂျားဗားပြည်နယ်က ဆိုလိုမြို့ဟာ အင်ဒိုနီးရှားသမ္မတ ဂျိုကို ဝီဒိုဒိုရဲ့ မွေးရပ်ပါ။ Sheikh Zayed ဗလီဟာ ယူအေအီးက အကြီးဆုံး ဗလီဝတ်ကျောင်းတော်လည်း ဖြစ်ပါတယ်။

ကန်ဒေါ်လာ သန်း ၂၀ ကုန်ကျမယ့် ဒီပုံတူဗလီက ၂၀၁၉ ခုနှစ် ဇူလိုင်လမှာ အင်ဒိုနီးရှားကို လာရောက်ခဲ့တဲ့ အဘူဒါဘီအိမ်ရှေ့မင်းသား မိုဟာမက် ဘင် ဇယဒ် အလ်-နဟ်ယန်ရဲ့ လက်ဆောင်လည်း ဖြစ်ပါတယ်။

ဒီနေ့ အုတ်မြစ်ချပွဲအခမ်းအနားကို ယူအေအီး စွမ်းအင်ဝန်ကြီး၊ အစ္စလာမ့်ရေးရာဝန်ကြီး၊ အင်ဒိုနီးရှားဖက်က သာသနာရေးဝန်ကြီး၊ စီးပွားရေးဝန်ကြီးနဲ့ ဆိုလိုမြို့ မြို့တော်ဝန်တို့ တက်ရောက်ခဲ့ပါတယ်။

Sheikh Zayed ဗလီနဲ့ လုံး၀ ပုံစံတူဖြစ်ပေမယ့် အင်ဒိုနီးရှားရဲ့ ရိုးရာယဉ်ကျေးမှု အငွေ့အသက်တွေကို ထည့်သွင်းမှာဖြစ်ပြီး၊ ပြည်တွင်းက ပစ္စည်းတွေကို အများဆုံး အသုံးပြုသွားမယ်လို့ ယူအေအီးဆိုင်ရာ အင်ဒိုနီးရှားသံအမတ်က ပြောပါတယ်။

၃ ဧက အကျယ်ရှိတဲ့မြေနေရာမှာ ဆောက်လုပ်ပြီး လူပေါင်း တစ်သောင်းလောက် တစ်ချိန်တည်း ဝတ်ပြုနိုင်မှာ ဖြစ်ပါတယ်။ ဗလီအတွက် ကုန်ကျငွေအားလုံးကို ယူအေအီးနိုင်ငံက ကျခံတာပါ။ ၂၀၂၂ ခုနှစ် စက်တင်ဘာလမှာ ဖွင့်လှစ်နိုင်ဖို့ စီစဉ်ထားပါတယ်။

ဗလီပြီးသွားရင် ဆိုလိုမြို့ဟာ ဘာသာရေးဆိုင်ရာ အဓိကကျတဲ့ ခရီးသွားမြို့ ဖြစ်လာလိမ့်မယ်လို့လည်း သံအမတ်က ဆိုပါတယ်။

Ref: Arab News