ကုန်စျေးနှုန်း ဆက်တိုက်မြင့်တက်နေမှု ပြည်သူများကို ထိခိုက်နိုင်ဟု WFP သတိပေး

မတ် ၁၆၊ ၂၀၂၁
M-Media

-မြန်မာနိုင်ငံမှာ ဖေဖော်ဝါရီ ၁ ရက်နေ့ အာဏာသိမ်းပြီးတဲ့နောက် စားသောက်ကုန်နဲ့ လောင်စာဆီစျေးနှုန်း မြင့်တက်လာမှုကြောင့် အခြေခံလူတန်းစားတွေအတွက် အခက်အခဲ ဖြစ်လာလိမ့်မယ်လို့ ကုလရဲ့ ကမ္ဘာ့စားနပ်ရိက္ခာစီမံကိန်း WFP က ပြောကြားလိုက်ပါတယ်။

ဖေဖော်ဝါရီအစပိုင်းကတည်းက ရန်ကုန်မြို့မှာ စားသောက်ကုန်စျေးတွေ ကြီးမြင့်လာခဲ့တာဖြစ်ပြီး စားအုန်းဆီက ၂၀ ရာခိုင်နှုန်း မြင့်တက်လာခဲ့တယ်လို့ WFP က ဆိုပါတယ်။ ဖေဖော်ဝါရီနှောင်းပိုင်းမှာတော့ ရန်ကုန်နဲ့ မန္တလေးမြို့တွေမှာ ဆန်စျေးက ၄ ရာခိုင်နှုန်း မြင့်တက်ခဲ့ပါတယ်။

နိုင်ငံမြောက်ပိုင်း ကချင်ပြည်နယ်က တစ်ချို့ဒေသတွေမှာ ဆန်စျေးဟာ ၃၅ ရာခိုင်နှုန်းအထိ တက်လာတာမျိုး ရှိနေပြီး အနောက်ဖက် ရခိုင်ပြည်နယ်မှာ ဆီစျေးနဲ့ ပဲစျေးတွေ သိသိသာသာ မြင့်တက်လာခဲ့တယ်လို့ WFP ရဲ့ ကြေငြာချက်မှာ ဖော်ပြထားပါတယ်။

အာဏာသိမ်းပြီးနောက်ပိုင်း လောင်စာဆီစျေးနှုန်းက ၁၅ ရာခိုင်နှုန်းမြင့်တက်လာကာ၊ စားသောက်ကုန်စျေးနှုန်းတွေလည်း နောက်ထပ် မြင့်တက်လာနိုင်တယ်လို့ WFP က သတိပေးခဲ့ပါတယ်။

“ဘဏ်လုပ်ငန်း ရပ်လုနီနီးဖြစ်နေတာ၊ ငွေကြေးလှည့်ပတ်မှု နှေးကွေးသွားတာ၊ ငွေသားထုတ်ယူမှုကို ကျယ်ကျယ်ပြန့်ပြန့် ကန့်သတ်တာတွေကြောင့် စားသောက်ကုန်နဲ့ လောင်စာဆီစျေးတွေ တက်လာတာပါ”

WFP ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် စတီဖင် အန်ဒါဆန်က စျေးနှုန်းတွေတက်နေတာဟာ စိုးရိမ်စရာကောင်းပြီး ဒီလို ဆက်ဖြစ်နေတယ်ဆိုရင် အဆင်းရဲဆုံးလူတန်းစားတွေ ဝမ်း၀ဖို့ အလွန်အခက်တွေ့လာလိမ့်မယ်လို့ ပြောကြားခဲ့ပါတယ်။

ဒီကိစ္စနဲ့ပတ်သက်ပြီး ရိုက်တာသတင်းဌာနနဲ့ မေးမြန်းမှုကို အာဏာသိမ်းစစ်ကောင်စီက မဖြေခဲ့ပါဘူး။

WFP ဟာ ပြီးခဲ့တဲ့ ၁၀ နှစ်အတွင်း စစ်ပွဲကြောင့် အိုးအိမ်စွန့်ခွာထွက်ပြေးရတဲ့ မြန်မာနိုင်ငံက လူပေါင်း ၃ သိန်း ၆ သောင်းကျော်ကို ကူညီပံ့ပိုးပေးနေတာ ဖြစ်ပါတယ်။

မြန်မာနိုင်ငံဟာ တစ်ချိန်က အာရှရဲ့ စပါးကျီလို့ တင်စားခံခဲ့ရပေမယ့် ဗိုလ်ချုပ်ကြီးနေဝင်း ၁၉၆၂ ခုနှစ် အာဏာသိမ်းပြီးတဲ့နောက် ဆိုရှယ်လစ်လမ်းစဉ်ကို ဖော်ဆောင်ခဲ့တာကြောင့် အာရှရဲ့ အဆင်းရဲဆုံးနိုင်ငံအဖြစ်ကို ရောက်ရှိသွားခဲ့ပါတယ်။

Ref: Reuters