စစ်ကောင်စီ၏ အကြမ်းဖက်ရန်အမိန့်ပေးမှု အထောက်အထားများ စုထားရန် ကုလတာဝန်ရှိသူက မြန်မာပြည်သူများကို မေတ္တာရပ်ခံ

မတ် ၁၇၊ ၂၀၂၁
M-Media

-ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း စစ်တပ်က အကြမ်းဖက်ဖို့ အမိန့်အပေးတဲ့ အထောက်အထားတွေကို စုဆောင်းထားဖို့ ကုလ စုံစမ်းစစ်ဆေးရေးအဖွဲ့ တာဝန်ရှိသူတစ်ဦးက မြန်မာပြည်သူတွေကို ဒီကနေ့မှာ မေတ္တာရပ်ခံလိုက်ပါတယ်။

အာဏာသိမ်းမှုဆန့်ကျင်တဲ့ ဆန္ဒပြသူတွေကို စစ်တပ်က အင်အားသုံးဖြိုခွဲမှုကြောင့် အနည်းဆုံး လူ ၁၈၀ ကျော် သေဆုံးထားပါတယ်။

ကုလ စုံစမ်းစစ်ဆေးရေးအဖွဲ့ အကြီးအကဲ နီကိုလက်စ် ကွမ်ဂျီယန်က အမိန့်ပေးသူတွေဟာ တာဝန်အရှိဆုံးသူတွေလို့ ပြောကြားခဲ့ပါတယ်။

“နိုင်ငံတကာဥပဒေအရ အဆိုးရွားဆုံး ရာဇဝတ်မှုတွေကို ကျူးလွန်မှုအတွက် တာဝန်အရှိဆုံးသူတွေဟာ ခေါင်းဆောင်ပိုင်းကသူတွေပါ။ အဲဒီခေါင်းဆောင်တွေဟာ ရာဇဝတ်မှုကို ကိုယ်တိုင်ကိုယ်ကျ မကျူးလွန်ကြသလို၊ ရာဇဝတ်မှုကျူးလွန်တဲ့ နေရာမှာတောင် မရှိကြပါဘူး။ သူတို့ တာဝန်ရှိမှုကို သက်သေပြဖို့အတွက် သတင်းပို့တာ၊ အမိန့်ပေးတာ၊ ချမှတ်တဲ့ မူဝါဒဆိုင်ရာ သက်သေအထောက်အထားတွေ လိုအပ်ပါတယ်”

ဒီလိုအထောက်အထားတွေရရင် Signal နဲ့ ProtonMail တို့လို စိတ်ချရတဲ့ ဆက်သွယ်ရေးနည်းလမ်းတွေကနေတစ်ဆင့် ကုလ စုံစမ်းစစ်ဆေးသူတွေကို ပေးပို့ဖို့ နီကိုလက်စ်က ထည့်သွင်းပြောဆိုခဲ့ပါတယ်။

ကုလ စုံစမ်းစစ်ဆေးသူတွေဟာ မြန်မာလုံခြုံရေးတပ်ဖွဲ့တွေရဲ့ အသက်အန္တရာယ်ရှိတဲ့ အင်အားသုံးနှိမ်နှင်းမှု၊ တရားလက်လွတ် ဖမ်းဆီးမှု၊ နှိပ်စက်ညှင်းပမ်းမှု၊ မိသားစုကို အသိမပေးဘဲ ဖမ်းဆီးချုပ်နှောင်ထားမှု အပါအဝင် ရာဇဝတ်မှု သက်သေအထောက်အထားတွေကို စုဆောင်းနေတာပါ။

၂၀၁၁ ခုနှစ်နောက်ပိုင်း မြန်မာနိုင်ငံမှာ ဖြစ်ပွားခဲ့တဲ့ နိုင်ငံတကာရာဇဝတ်မှု အထောက်အထားတွေကို စုဆောင်းဖို့အတွက် ၂၀၁၈ ခုနှစ်မှာ ကုလ လုံခြုံရေးကောင်စီက စုံစမ်းစစ်ဆေးမှုအဖွဲ့တစ်ခုကို ဖွဲ့စည်း တာဝန်ပေးခဲ့တာ ဖြစ်ပါတယ်။

Ref: Reuters