မတ် ၂၀၊ ၂၀၂၁
M-Media

-အာဏာသိမ်းစစ်ကောင်စီရဲ့ ပြည်သူတွေအပေါ်ကျူးလွန်နေတဲ့ အကြမ်းဖက်လုပ်ရပ်တွေကို ရှုတ်ချကြောင်း ကမ္ဘာ့နိုင်ငံတွေ၊ အာဆီယံအဖွဲ့၀င်တွေ၊ မြန်မာနိုင်ငံက နိုင်င်ငံခြားသံအမတ်တွေ မနေ့က ကြေငြာချက်အများအပြား ထုတ်ပြန်ခဲ့ပြီး မကြုံစဖူး ပြင်းထန်တဲ့အသုံးအနှုန်းတွေသုံးကာ စစ်ကောင်စီကို သတိပေးတာမျိုးတွေလည်း ရှိခဲ့ပါတယ်။

သံအမတ်ကြီးများ

အမေရိကန်၊ ယူကေ၊ ဥရောပသမဂ္ဂ၊ ဒိန်းမတ်၊ ချက်သမ္မတနိုင်ငံ၊ ဖင်လန်၊ ပြင်သစ်၊ ဂျာမနီ၊ အီတလီ၊ နယ်သာလန်၊ စပိန်နဲ့ ဆွီဒင်နိုင်ငံက သံအမတ်ကြီးတွေ မနေ့က ပူးတွဲကြေငြာချက်ထုတ်ရာမှာ အာဏာသိမ်းစစ်ကောင်စီရဲ့ အကြမ်းဖက်လုပ်ရပ်တွေကို ပြင်းပြင်းထန်ထန် ရှုတ်ချခဲ့ပါတယ်။
စစ်ကောင်စီရဲ့ တပ်ဖွဲ့တွေဟာ လက်နက်မဲ့ဆန္ဒပြသူတွေအပေါ် အမှောင်ထုကို အခွင့်ကောင်းယူကာ ရက်ရက်စက်စက် အကြမ်းဖက်နေပြီး ဒီလုပ်ရပ်တွေဟာ ကျင်၀တ်သိက္ခာမဲ့သလို ဆင်ခြေဆင်လတ်ပေးကာ ကာကွယ်ရှောင်ပြေးလို့မရတဲ့ ကိစ္စတွေဖြစ်တယ်လို့ ကြေငြာချက်မှာ ဖော်ပြထားပါတယ်။
ပြည်သူအပေါ် အကြမ်းဖက်နေတာတွေ ရပ်တန်ဖို့၊ ဖမ်းဆီးထားသူတွေကို ပြန်လွှတ်ပေးဖို့၊ စစ်အုပ်ချုပ်ရေးနဲ့ အရေးပေါ်အခြေအနေ ကြေငြာထားထားတွေကို ရုပ်သိမ်းပေးဖို့၊ ရွေးကောက်ခံအစိုးရကို အာဏာပြန်အပ်ဖို့၊ ဆက်သွယ်ရေးကန့်သတ်ထားတာကို ရုပ်သိမ်းဖို့ သံအမတ်တွေက စစ်ကောင်စီကို တိုက်တွန်းခဲ့ပြီး၊ မြန်မာပြည်သူတွေရဲ့ ငြိမ်းချမ်းစွာ ဆန္ဒပြခွင့်၊ သတင်းအချက်အလက် ရရှိခွင့်တွေကို အားပေးထောက်ခံတယ်လို့ ပြောကြားခဲ့ပါတယ်။
အင်တာနက်ပိတ်၊ မီဒီယာကို နှိပ်ကွပ်ပြီး စက်ဆုပ်ဖွယ်ရာလုပ်တွေကို စစ်ကောင်စီက ဖုံးကွယ်လို့ ရမှာမဟုတ်ဘူးလို့လည်း သံအမတ်တွေက သတိပေးခဲ့ပါတယ်။

ကုလသမဂ္ဂ အထွေထွေအတွင်းရေးမှုးချုပ်

အာဏာသိမ်းစစ်ကောင်စီက ပြည်သူလူထုအပေါ် အကြမ်းဖက်မှုတွေ ဆက်လက်ကျူးလွန်တာနေတာကို ပြင်းပြင်းထန်ထန် ရှုတ်ချတယ်လို့ ကုလသမဂ္ဂ အထွေထွေအတွင်းရေးမှူးချုပ် အန်တိုနီယိုဂူတာရက်စ်က မနေ့မှာ ကြေငြာချက်ထုတ်ပြန်ပါတယ်။
“အခြေခံလူ့အခွင့်အရေး ချိုးဖောက်နေတာတွေကို ရပ်တန်းကရပ်ဖို့၊ ဒီမိုကရေစီ လမ်းကြောင်းပေါ်ကို ပြန်သွားဖို့ လုံခြုံရေးကောင်စီအပါအ၀င် အဖက်ဖက်က တိုက်တွန်းနှိုးဆော်မှုတွေကို စစ်တပ်က ဆက်လက် ဖီဆန်နေပါတယ်။ နိုင်ငံတကာအသိုင်းအ၀ိုင်းက စည်းစည်းလုံးလုံးနဲ့ ပြင်းပြင်းထန်ထန်တုန့်ပြန်ဖို့ လိုအပ်နေပါပြီ”

မလေးရှားရဲ့ ထူးထူးခြားခြားကြေငြာချက်

မလေးရှား၀န်ကြီးချုပ် မုဟ်ယစ်ဒင် ယာစင်ရဲ့ မနေ့က ကြေငြာချက်မှာ အာဏာသိမ်းစစ်ကောင်စီအနေနဲ့ သွားနေတဲ့လမ်းကြောင်းကို နောက်ပြန်လှည့်ပြီး ငြိမ်းငြိမ်းချမ်းချမ်း အဖြေရှာဖို့ အခိုင်အမာ တိုက်တွန်းခဲ့ပါတယ်။
ကြေငြာချက်ထဲမှာ စစ်ခေါင်းဆောင်တွကို ကိုယ်ကျိုးရှာသူတွေလို့ သုံးနှုန်းသွားပြီး ဒါဟာ အကြုံစဖူး ပြင်းထန်တဲ့အသုံးအနှုန်းလည်း ဖြစ်ပါတယ်။
“ကိုယ်ကျိုးသာကြည့်တဲ့ လူတစ်စုရဲ့လက်ထဲ ကျွန်တော်တို့ရဲ့ညီနောင် မြန်မာနိုင်ငံ မတည်မငြိမ်ဖြစ်လာတာကို မလေးရှားနဲ့ အာဆီယံအသိုင်းအ၀ိုင်းက ကြည့်မနေနိုင်တော့ပါဘူး”
မြန်မာနိုင်ငံက ပြဿနာနဲ့ပတ်သက်ပြီး အာဆီယံခေါင်းဆောင်တွေ အထူးထိပ်သီးအစည်းအ၀ေးလုပ်ဖို့ အင်ဒိုနီးရှားသမ္မတ ဂျိုကို၀ီဒိုဒိုရဲ့ တိုက်တွန်းမှုကိုလည်း မလေးရှား၀န်ကြီးချုပ်က ထောက်ခံခဲ့ပါတယ်။
“လက်ရှိ နိုင်ငံရေးအကြပ်အတည်းမှာ ပြည်သူတွေ ဓားစားခံဖြစ်နေတယ်ဆိုတာ ထင်ရှားတယ်။ ကျွန်တော်တို့ရဲ့ နိုင်ငံရေး၊ ယုံကြည်မှုနဲ့ သဘောထားအမြင်တွေမှာ ဒီအတွက် နေရာမရှိပါဘူး။ ဒါတွေဟာ အာဆီယံ သဘောတူညီချက်မှာ ပါ၀င်တဲ့ တန်ဖိုးတွေနဲ့လည်း ဆန့်ကျင်နေပါတယ်”

အင်ဒိုနီးရှား

အင်ဒိုနီးရှားသမ္မတ ဂျိုကို၀ီဒိုဒိုက မြန်မာနိုင်ငံမှာ ဒီမိုကရေစီ ပြန်လည်ကျင့်သုံးဖို့နဲ့ အကြမ်းဖက်မှုတွေ ရပ်တန့်ဖို့ မနေ့က ပြောကြားခဲ့ပါတယ်။
ဒါ့အပြင် မြန်မာ့အရေး အာဆီယံ အထူး ထိပ်သီးအစည်းအ၀ေး ကျင်းပဖို့လည်း တိုက်တွန်းခဲ့ပါတယ်။
“မြန်မာနိုင်ငံက ပြဿနာနဲ့ပတ်သက်ပြီး အဆင့်မြင့်အစည်းအ၀ေးတစ်ခု ကျင်းပဖို့အတွက် အာဆီယံ ဥက္ကဌဖြစ်တဲ့ ဘရူးနိုင်းနိုင်ငံရဲ့ဘုရင်ကို ကျွန်တော် ချက်ခြင်း ဖုန်းခေါ်သွားပါမယ်”

ကန်အောက်လွှတ်တော်က အာဏာသိမ်းမှုကို ရှုတ်ချ

မြန်မာနိုင်ငံက စစ်အာဏာသိမ်းမှုကို ရှုတ်ချတဲ့ ဆုံးဖြတ်ချက်တစ်ခုကို အမေရိကန် အောက်လွှတ်တော်က မနေ့မှာ မဲခွဲအတည်ပြုလိုက်ပါတယ်။
ဒီမိုကရက်တစ်နဲ့ ရီပက်ဘလစ်ကန်အမတ်တွေ တစ်ညီတစ်ညွတ်တည်း အတည်ပြုခဲ့တဲ့ အဲဒီ ဆုံးဖြတ်ချက်မှာ ဒေါ်အောင်ဆန်းစုကြည်အပါအ၀င် ဖမ်းဆီးခံထားရသူအားလုံး ပြန်လွှတ်ပေးဖို့နဲ့ ရွေးကောက်ခံအစိုးရကို အာဏာပြန်အပ်ဖို့လည်း တိုက်တွန်းခဲ့ပါတယ်။
Ref: Nikkei Asia