တရုတ်သမ္မတ ရှီကျင့်ဖျင်တွင် ဒီမိုကရေစီဗီဇ မပါလာဟု အမေရိကန်သမ္မတ ပြော

မတ် ၂၆၊ ၂၀၂၁
M-Media

-တရုတ်သမ္မတ ရှီကျင့်ဖျင်ဟာ ဒီမိုကရေစီဗီဇ နည်းနည်းတောင် ပါမလာဘူးလို့ အမေရိကန်သမ္မတ ဂျိုးဘိုင်ဒန်က ပြောကြားလိုက်ပြီး တရုတ်က အမေရိကန်ကို ကျော်တက်တာကို သူ့လက်ထက်မှာ ခွင့်ပြုမှာ မဟုတ်ဘူးလို့ ဆိုပါတယ်။

သမ္မတဖြစ်ပြီး ၂ လအတွင်း ပထမဆုံးလုပ်တဲ့ မနေ့က သတင်းစာရှင်းလင်းပွဲမှာ ဘိုင်ဒန်က တရုတ်နိုင်ငံနဲ့ပတ်သက်ပြီး သူ့အစိုးရရဲ့ မူဝါဒကို ပြောကြားခဲ့ပါတယ်။

သမ္မတ အိုဘာမားလက်ထက် ဒုတိယသမ္မတအဖြစ် တာဝန်ထမ်းဆောင်စဉ်မှာ ရှီကျင့်ဖျင်ကို အနီးကပ် လေ့လာစောင့်ကြည့်ခဲ့ပြီး ဒီမိုကရေစီကိုယုံကြည်လာအောင် ဆွဲဆောင်ခဲ့သေးတယ်လို့ ဘိုင်ဒန်က ဆိုပါတယ်။

တရုတ်ကို အင်အားသုံးပြီး ထိပ်တိုက်ရင်ဆိုင်တာမျိုး လုပ်မှာမဟုတ်ပေမယ့် နိုင်ငံတကာ ကုန်သွယ်ရေးအပါအဝင် နယ်ပယ်အသီးသီးမှာ မျှမျှတတ ယှဉ်ပြိုင်ရေး နိုင်ငံတကာ ဥပဒေတွေနဲ့ လူ့အခွင့်အရေးတွေကို လေးစားလိုက်နာအောင် အခိုင်အမာ လုပ်ဆောင်သွားမယ်လို့ ထည့်သွင်း ပြောဆိုခဲ့ပါတယ်။

“ကမ္ဘာ့ဦးဆောင်နိုင်ငံ၊ အချမ်းသာဆုံးနိုင်ငံ၊ အင်အားအကြီးဆုံးနိုင်ငံ ဖြစ်လာဖို့ တရုတ်က ရည်ရွယ်နေပါတယ်။ ကျွန်တော့်လက်ထက်မှာတော့ ဒါမျိုး ဖြစ်လာမှာမဟုတ်ပါဘူး။ အမေရိကန်ကလည်းက ဆက်လက်ကြီးထွားနေအုံးမှာပါ”

ရှီကျင့်ဖျင်နဲ့ ရုရှားသမ္မတ ပူတင်တို့ဟာ အာဏာရှင်ဝါဒကို စွဲကိုင်ထားသူတွေလို့လည်း ဘိုင်ဒန်က ပြောပါတယ်။

“ရှီဟာ ပူတင်လိုပဲ အာဏာရှင်စနစ်က အနာဂတ်ကမ္ဘာကို လှုပ်ကိုင်နိုင်မှာဖြစ်ပြီး ဒီမိုကရေစီက ရှုပ်ထွေးတဲ့ကမ္ဘာကို လည်ပတ်နိုင်မှာမဟုတ်ဘူးလို့ ထင်မြင်နေသူပါ။ ရှီရဲ့ကိုယ်ထဲမှာ ဒီမိုကရေစီဗီဇ နည်းနည်းမှ မပါပါဘူး။ ဒါပေမယ့် တော်တော်တော့ ဦးနှောက်ပြေးပါတယ်”

ထိုင်ဝမ်၊ ဟောင်ကောင်၊ တောင်တရုတ်ပင်လယ်ကိစ္စနဲ့ ရှင်ကျန်းပြည်နယ်က ဝီဂါမွတ်စလင်တွေ အပေါ် ဖိနှိပ်ညှင်းပမ်းမှုတွေအတွက် ဒေသတွင်းမဟာမိတ်တွေနဲ့ပေါင်းကာ တရုတ်အစိုးရကို တာဝန်ခံခိုင်းမယ်လို့လည်းဘိုင်ဒန်က ထည့်သွင်းပြောဆိုခဲ့ပါတယ်။

Ref: Reuters