ပြည်သူများအားသတ်ဖြတ်နေမှုကို တိုင်းရင်းသား လက်နက်ကိုင်များ ရပ်ကြည့်မနေတော့ဟု ရှမ်းလက်နက်ကိုင်အဖွဲ့ ပြော

မတ် ၂၇၊ ၂၀၂၁
M-Media

-အာဏာသိမ်းစစ်ကောင်စီတပ်တွေက အရပ်သားတွေကို ဆက်လက်သတ်ဖြတ်နေမယ်ဆိုရင် မိမိတို့ တိုင်းရင်းသားတပ်ဖွဲ့တွေ ရပ်ကြည့်နေမှာ မဟုတ်ဘူးလို့ ရှမ်းပြည် ပြန်လည်ထူထောင်ရေးကောင်စီ RCSS အဖွဲ့ဥက္ကဌ ဗိုလ်ချုပ်ရွက်စစ်က ​ပြောကြားလိုက်ပါတယ်။

ဖက်စစ်တော်လှန်ရေးနေ့ဖြစ်တဲ့ ဒီနေ့မှာ စစ်ကောင်စီတပ်တွေရဲ့ အကြမ်းဖက်မှုကြောင့် မနက်ပိုင်းမှာပဲ နိုင်ငံတစ်ဝှမ်း အနည်းဆုံး လူ ၁၆ ဦး သေဆုံးခဲ့ပါတယ်။

“တပ်မတော်နေ့ဆိုတာ အမှန်တကယ်မှာ တပ်မတော်နေ့နဲ့ မတူဘဲ လူသတ်တဲ့နေနဲ့ ပိုတူနေပါတယ်။ စစ်တပ်ဟာ ဒီမိုကရေစီကို ကာကွယ်နေတာမဟုတ်ဘဲ ဖျက်စီးနေတာသာ ဖြစ်ပါတယ်။ ဆန္ဒပြသူတွေ၊ ပြည်သူတွေကို ပစ်ခတ်တာ၊ နှိပ်စက်တာတွေ ဆက်လုပ်နေမယ်ဆိုရင် တိုင်းရင်းသားအဖွဲ့တွေကလည်း ဘာမှမလုပ်ဘဲ ရပ်ကြည့်နေလိမ့်မယ်လို့ ကျွန်တော် မထင်ပါဘူး”

ဒီနေ့မနက် တပ်မတော်နေ့ အခမ်းအနားမှာ အာဏာသိမ်းစစ်ကောင်စီ အကြီးအကဲ ဗိုလ်ချုပ်မှူးကြီး မင်းအောင်လှိုင်က သူတို့စစ်တပ်ရဲ့အလုပ်ဟာ ပြည်သူတွေနဲ့ ဒီမိုကရေစီကို ကာကွယ်ဖို့ဖြစ်ပြီး၊ တစ်နှစ်အတွင်း ရွေးကောက်ပွဲ လုပ်ပေးမယ်လို့ ထပ်လောင်းပြောကြားခဲ့ပါတယ်။

စစ်အာဏာသိမ်းမှုကို ဆန့်ကျင်ဆန္ဒပြသူတွေက ဖက်ဒရယ်စစ်တပ်ဖွဲ့စည်းရေး တိုက်တွန်းမှုတွေ ရှိနေပြီး ဗိုလ်ချုပ်ရွက်စစ်က ဒါကို ထောက်ခံတယ်လို့ ဆိုပါတယ်။

“စစ်တပ်ဟာ တိုင်းရင်သားလက်နက်ကိုတွေရဲ့ ဘုံရန်သူဖြစ်တဲ့အတွက် ပြည်သူကို သတ်နေတဲ့သူတို့ကို တိုက်ခိုက်ရေးမှာ ကျွန်တော်တို့အားလုံး လက်တွဲပြီး၊ ပူးပေါင်းလုပ်ဆောင်ဖို့ လိုအပ်ပါတယ်”