ထိုင်းအစိုးရက စစ်ကောင်စီကို ဆန့်ကျင်ဖွယ်မရှိဟု ကျွမ်းကျင်သူများ သုံးသပ်

ဧပြီ ၃၊ ၂၀၂၁
M-Media

-အိမ်နီးချင်း ထိုင်းအစိုးရဟာ အာဏာသိမ်းစစ်ကောင်စီကို ဆန့်ကျင်ဖို့မရှိဘဲ မြန်မာနိုင်ငံကနေ ထွက်ပြေးလာရတဲ့ ဒုက္ခသည်တွေကိုလည်း လက်ခံဖို့ မရှိဘူးလို့ နိုင်ငံရေး လေ့လာဆန်းစစ်သူတွေက သုံးသပ်ပါတယ်။

ဖေဖော်ဝါရီလ ၁ ရက်နေ့ ရွေးကောက်ခံအစိုးရကို ဖြုတ်ချအာဏာသိမ်းပြီး ရက်အနည်းငယ်အကြာမှာပဲ အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က သူ့ကိုထောက်ခံဖို့ ထိုင်းဝန်ကြီးချုပ် ပရာယွတ်ချန်အိုချာကို သတင်းစကား ပါးခဲ့ပါတယ်။

ထိုင်းအစိုးရကလည်း စစ်အာဏာသိမ်းမှုကို လူသိရှင်ကြား ရှုတ်ချတာမျိုးမလုပ်ဘဲ သေဆုံးမှုတွေ မြင့်တက်လာနေတဲ့အတွက် အလွန်အမင်း စိုးရိမ်တယ်လို့ ဗုဒ္ဓဟူးနေ့က စာထုတ်မှုဟာ အပြင်းထန်ဆုံး ပြောကြားမှု ဖြစ်ပါတယ်။

ဝန်ကြီးချုပ်ပရာယွတ်ဟာ အာဏာသိမ်းစစ်ခေါင်းဆောင်ဟောင်းတစ်ဦးဖြစ်ပြီး နှစ်နိုင်ငံ စစ်တပ်အကြား နီးစပ်တဲ့ ဆက်ဆံရေးကြောင့် ရေရှည်မှာ စစ်ကောင်စီကို ဆန့်ကျင်ဖို့ မရှိဘူးလို့ ကျွမ်းကျင်သူတွေက သုံးသပ်ပါတယ်။

၂၀၁၈ ခုနှစ်တုန်းက ထိုင်းအစိုးရဟာ ဗိုလ်ချုပ်မှူးကြီးမင်းအောင်လှိုင်ကို King Grand Cross of the Most Exalted Order of the White Elephant ဂုဏ်ပြုဆု ချီးမြှင့်ခဲ့ပြီး ထိုင်းစစ်တပ်ကို ထောက်ခံအားပေးတဲ့အတွက် ဖြစ်ပါတယ်။

“သူတို့အတွက် စစ်ဖက်ညီအစ်ကိုဆက်ဆံရေးက အလွန့်အလွန်ကို အရေးကြီးပါတယ်။ ဒုက္ခသည်တွေနဲ့ပတ်သက်တဲ့ ထိုင်းအစိုးရရဲ့ဆုံးဖြတ်ချက်ဟာ အကြမ်းဖက်မှုမြင့်တက်လာတာကြောင့် ပြောင်းလဲမယ်လို့ ကျွန်တော် မထင်ပါဘူး။ မြန်မာနဲ့ပိုပြီး မိတ်ဆွေဖြစ်ချင်မယ်လို့ ကျွန်တော် ထင်ပါတယ်” လို့ ထိုင်းနိုင်ငံ Kasetsart တက္ကသိုလ်က သမိုင်းပါမောက္ခ လာလီတာ ဟင်ကာနွန်တာက ပြောပါတယ်။

ပြီးခဲ့တဲ့ သီတင်းပတ်ကစလို့ ကရင်ပြည်နယ်မှာ စစ်ကောင်စီက ရွာတွေကို ဗုံးကြဲတာကြောင့် ပြည်သူ ထောင်နဲ့ချီ ထိုင်းဘက်ကိုထွက်ပြေးရပြီး ထိုင်းအာဏာပိုင်တွေက ဒီလူတွေကို ပြန်မောင်းထုတ်သလို နယ်စပ်မှာလည်း သံဆူးကြိုးတွေ လိုက်ကာနေတယ်လို့ သတင်းတွေ ထွက်လာပါတယ်။

ထိုင်းဝန်ကြီးချုပ် ပရာယွတ်က ဒီသတင်းကို ငြင်းဆိုခဲ့ပေမယ့် နယ်စပ်က အစိုးရတာဝန်ရှိသူတစ်ဦးကတော့ အစည်းအဝေးတစ်ခုမှာ မြန်မာနိုင်ငံက ဝင်ရောက်လာသူတွေကို တားဆီးဖို့ မူဝါဒချထားတယ်လို့ ပြောကြားခဲ့ပါတယ်။

နိုင်ငံတကာ ဖိအားကြောင့် ထိုင်းအစိုးရက မြန်မာဖက်က ဒုက္ခသည်တွေကို အယောင်ပြလက်ခံတာ၊ စစ်ကောင်စီကို ဆန့်ကျင်တဲ့ ရပ်တည်ချက်မျိုး လုပ်လာနိုင်ပေမယ့် ရေရှည်မှာတော့ စစ်ကောင်စီနဲ့ လက်တွဲ့သွားလိမ့်မယ်လို့ လာလီတာက ပြောပါတယ်။

“နိုင်ငံတကာဖိအားကြောင့် သူတို့ တစ်ခုခု လုပ်လိမ့်မယ်။ အယောင်ပြပြီး နည်းနည်းပါးပါးလောက်သာ လုပ်မှာပါ။ ခင်ဗျားတို့ပြောတဲ့အတွက် ကျွန်တော်တို့လုပ်ပေးတယ်ဆိုတာမျိုးပေါ့။ ဒါပေမယ့် အဲဒီလောက်ပါပဲ”

မြန်မာနိုင်ငံမှာ ထိုင်းနိုင်ငံရဲ့ အကျိုးစီးပွားရေး အမြောက်အများ ရှိနေတာကလည်း စစ်ကောင်စီကို ဆန့်ကျင်ဖို့ လက်တွန့်နေရခြင်းရဲ့ အကြောင်းအရင်းတစ်ခု ဖြစ်ပါတယ်။

မြန်မာနိုင်ငံရဲ့ ပြည်ပရင်းနှီးမြှုပ်နှံမှုမှာ စင်ကာပူနဲ့ တရုတ်တို့ပြီးရင် ထိုင်းနိုင်ငံက အများဆုံးပါ။ နယ်စပ်ကုန်သွယ်ရေး​မှာလည်း ဒေါ်လာ ဘီလီယံချီရှိနေသလို ထိုင်းနိုင်ရဲ့ စီးပွားရေးလုပ်ငန်း တော်တော်များများက မြန်မာရွှေ့ပြောင်းလုပ်သားတွေကို မှီခိုနေရတာဖြစ်ပါတယ်။

ချူလာလောင်ကွန်တက္ကသိုလ် အာဆီယံရေးရာလေ့လာမှုဌာန တာဝန်ရှိသူ ပီတီ ဆရီ ဆဂ်နမ်က ထိုင်းနိုင်ငံဟာ စီးပွားရေးအားသာချက်ကိုယူပြီး စစ်ကောင်စီအပေါ် ဖိအားပေးဖို့ အလားအလာမရှိဘူးလို့ ဆိုပါတယ်။

အကြမ်းဖက်မှုတွေ ရပ်တန့်ဖို့၊ ဖမ်းဆီးခံထားရတဲ့ အရပ်သားအစိုးရအဖွဲ့ဝင်တွေကို ပြန်လွှတ်ပေးပြီး ဆွေးနွေးညှိနှိုင်းဖို့အတွက် ကန့်လန့်ကာနောက်ကွယ်ကနေ သံတမန်နည်းလမ်းအရ ဆောင်ရွက်ပေးတာမျိုးလောက်ပဲ ထိုင်းနိုင်ငံက လုပ်ဆောင်လိမ့်မယ်လို့ သူက ဆိုပါတယ်။

“အရင်ကတည်းကခင်လာတဲ့ သူငယ်ချင်းတစ်ယောက် တစ်ရက်မှာ လူသတ်မှုကျူးလွန်လိုက်လို့ သူနဲ့ အပေါင်းအသင်းမလုပ်တော့ဘူး ဆိုတာမျိုး မရှိပါဘူး။ အပေါင်းအသင်းတော့ လုပ်အုံးမယ်။ ဒါပေမယ့် သူလုပ်တာ မှားယွင်းကြောင်း ပြောဆိုတာက အကောင်းဆုံးပါ”

Ref: Retuers