ဗြိတိန်ဘုရင်မကြီး၏ ကြင်ယာတော် ဖိလစ်မင်းသား ကွယ်လွန်

ဧပြီ ၉၊ ၂၀၂၁
M-Media

-ဗြိတိန်ဘုရင်မကြီး အဲလစ်ဇဘက်ရဲ့ ကြင်ယာတော် ဖိလစ်မင်းသား ကွယ်လွန်သွားပြီလို့ ဘက်ကင်ဟမ်နန်းတော်က ဒီကနေ့မှာ သတင်းထုတ်ပြန်ပါတယ်။

သက်တော် ၉၉ နှစ်အရွယ် ရှိပြီဖြစ်တဲ့ မင်းသားဖိလစ်ဟာ နာတာရှည် နှလုံးရောဂါကြောင့် တစ်လကျော်ကြာ ဆေးရုံးတက်ခဲ့ပြီးတဲ့နောက် မတ်လ ၁၆ ရက်နေ့က ဝင်ဆာရဲတိုက်ကို ပြန်ရောက်လာခဲ့ပြီး အခုလို ကွယ်လွန်သွားတာ ဖြစ်ပါတယ်။ ဗြိတိသျှသမိုင်းမှာ အရှည်ကြာဆုံး ကြင်ယာတော်အဖြစ်လည်း မှတ်တမ်းဝင်ခဲ့ပါတယ်။

ဗြိတိန်ဝန်ကြီးချုပ် ဘောရစ်ဂျွန်ဆင်က မင်းသားဖိလစ်ဟာ မရေမတွက်နိုင်တဲ့ လူငယ်တွေ လေးစားအားကျရသူတစ်ဦးဖြစ်တယ်လို့ ပြောကြားခဲ့ပါတယ်။

မင်းသားဖိလစ်ဟာ ဒုတိယကမ္ဘာစစ်နောက်ပိုင်း ဗြိတိန်ရဲ့ ခေတ်သစ်ဘုရင်စနစ်မှာ အဓိကအခန်းကဏ္ဍကနေ ပါဝင်ခဲ့ပြီး ဘုရင်မကြီး ယုံကြည်ကိုးစားရာ ပုဂ္ဂိုလ်တစ်ဦးလည်း ဖြစ်ခဲ့ပါတယ်။

အဲလစ်ဇဘက် ဘုရင်မကြီးနဲ့ မင်းသားဖိလစ်တို့ဟာ ၁၉၄၇ ခုနှစ်မှာ လက်ထက်ခဲ့တာဖြစ်ပြီး သားတော်သမီးတော် ၄ ပါး၊ မြေးတော် ၈ ပါးနဲ့၊ မြစ်တော် ၁၀ ပါး ထွန်းကားခဲ့ပါတယ်။

Ref: BBC