မြန်မာ့အရေး နိုင်ငံတကာ၏တုန့်ပြန်မှုကို တရုတ်နှင့်ရုရှားက ဖျက်ဆီးနေဟု ဥရောပသမဂ္ဂပြော

ဧ​ပြီ ၁၂၊ ၂၀၁
M-Media

-စစ်အာဏာသိမ်းမှုနောက်ပိုင်း မြန်မာနိုင်ငံမှာဖြစ်ပေါ်နေတဲ့ မတည်မငြိမ်မှုတွေကို နိုင်ငံတကာအသိုင်းအဝိုင်းက တုန့်ပြန်ဆောင်ရွက်ရာမှာ တရုတ်နဲ့ ရုရှားတို့က ဟန့်တားနေတယ်လို့ ဥရောပသမဂ္ဂရဲ့ နိုင်ငံခြားရေးဆိုင်ရာအကြီးအကဲ ဂျိုးဆပ် ဘော်ရဲလ်က ပြောကြားလိုက်ပါတယ်။

“ကုလသမဂ္ဂ လုံခြုံရေးကောင်စီရဲ့ ကြိုးပမ်းမှုတွေ ဥပမာ လက်နက်ရောင်းချမှု ပိတ်ဆို့တာမျိုးကို တရုတ်နဲ့ ရုရှားတို့က တားဆီးဟန့်တားနေတာဟာ အံ့ဩစရာတော့ မဟုတ်ပါဘူး။ မြန်မာနိုင်ငံမှာ ပထဝီနိုင်ငံရေး ယှဉ်ပြိုင်မှုတွေက ဘုံမူဝါဒတစ်ခု ရရှိရေးကို တော်တော်လေး ခက်ခဲအောင် လုပ်နေပါတယ်။ ဒါပေမယ့် ကျွန်တော်တို့မှာ ကြိုးစားရမယ့်တာဝန် ရှိနေပါတယ်”

ဖေဖော်ဝါရီလ ၁ ရက် အာဏာသိမ်းပြီးနောက်ပိုင်း စစ်ကောင်စီတပ်တွေရဲ့ အကြမ်းဖက်မှုကြောင့် နိုင်ငံတစ်ဝှမ်း သေဆုံးသူ ၇၀၀ ကျော် ရှိလာပြီဖြစ်ပါတယ်။ အသတ်ခံရသူတွေထဲမှာ အနည်းဆုံး ကလေးငယ် ၄၆ ဦး ပါဝင်ပါတယ်။

ဂျိုးဆပ် ဘော်ရဲလ်က စစ်ကောင်စီဟာ အကြမ်းဖက်နေတယ်လို့ ထည့်သွင်းပြောဆိုခဲ့ပါတယ်။

“ကြောက်မက်ဖွယ်အဖြစ်ဆိုးကို ကမ္ဘာကြီးက မြင်တွေ့နေရတာပါ။ စစ်တပ်ဟာ ကိုယ့်ရဲ့ပြည်သူကို အကြမ်းဖက်နေတာ ဖြစ်ပါတယ်”

တရုတ်နဲ့ ရုရှားတို့ဟာ မြန်မာစစ်တပ်နဲ့ ဆက်ဆံရေးကိုယ်စီ ရှိကြပြီး လက်နက်ထောက်ပံ့ပေးနေတဲ့ အဓိကနိုင်ငံတွေလည်း ဖြစ်ပါတယ်။

ဥရောပသမဂ္ဂဟာ ဗိုလ်ချုပ်မှူးကြီးမင်းအောင်လှိုင် အပါအဝင် အာဏာသိမ်းမှုနဲ့ ဆက်နွယ်နေတဲ့ စစ်ခေါင်းဆောင် ၁၁ ဦးကို မတ်လအတွင်းက ပိတ်ဆို့အရေးယူမှု လုပ်ခဲ့ပြီး စစ်ခေါင်းဆောင်တွေပိုင်တဲ့ စီးပွားရေးလုပ်ငန်းတွေ၊ အာဏာသိမ်းမှုနဲ့ ဆက်နွယ်နေတဲ့သူတွေကို ထပ်မံ အရေးယူဖို့လည်း စီစဉ်နေပါတယ်။

ဥရောပသမဂ္ဂနဲ့ မြန်မာနိုင်ငံ စီးပွားရေးဆက်ဆံမှုပမာဏ နည်းပါးပေမယ့် နိုင်ငံမှာ ဒီမိုကရေစီပြန်ရရင် စီးပွားရေးကဏ္ဍ တိုးမြှင့်လုပ်ဆောင်ပေးမယ်လို့လည်း ဘော်ရဲလ်က ထည့်သွင်းပြောဆိုခဲ့ပါတယ်။

Ref: Reuters