မြန်မာစစ်တပ်ပိုင်လုပ်ငန်းနှင့် ပူးပေါင်းမှုကို အဆုံးသတ်မည်ဟု တောင်ကိုရီးယားကုမ္ပဏီ POSCO က ထုတ်ပြန်

ဧပြီ ၁၆၊ ၂၀၂၁
M-Media

-အာဏာသိမ်းစစ်ခေါင်းဆောင်တွေ ချုပ်ကိုင်ထားတဲ့ စီးပွားရေးလုပ်ငန်းနဲ့ ပူးပေါင်း​ဆောင်ရွက်နေမှုကိုကို ရပ်ဆိုင်းတော့မယ်လို့ တောင်ကိုရီးယား စတီးလ်ထုတ်လုပ်ရေးလုပ်ငန်း POSCO က ဒီကနေ့မှာ ကြေငြာလိုက်ပါတယ်။

POSCO Coated & Color Steel အမည်နဲ့ မြန်မာနိုင်ငံမှာ လုပ်ငန်းလုပ်ဆောင်နေတာဖြစ်ပါတယ်။ ဒီလုပ်ငန်းကို POSCO က ၇၀ ရာခိုင်နှုန်း ပိုင်ဆိုင်ပြီး စစ်​တပ်ပိုင် စီးပွားရေးဦးပိုင်လိမိတက် MEHL က ၃၀ ရာခိုင်နှုန်း ပိုင်ဆိုင်တာပါ။

စစ်တပ်ကုမ္ပဏီက ရယူထားတဲ့ ရှယ်ယာ ၃၀ ရာခိုင်နှုန်းကို ဝယ်ယူဖို့ ကမ်းလှမ်းထားပြီး မြန်မာနိုင်ငံကလုပ်ငန်းကို မိမိတို့ကသာ အပြည့်အ၀လည်ပတ်ဖို့ စီစဉ်နေတယ်လို့ POSCO C&C ကုမ္ပဏီရဲ့ တာဝန်ရှိသူ မင်ဂျီဟွန်က ပြောပါတယ်။

စစ်တပ်ဖက်ကတော့ ဒီကမ်းလှမ်းမှုအတွက် အကြောင်းမပြန်သေးဘူးလို့ သူက ဆိုပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးနောက် ပြည်သူလူထုကို အကြမ်းဖက်သတ်ဖြတ်တာ၊ လူ့အခွင့်အရေးချိုးဖောက်တာတွေ လုပ်ဆောင်နေတဲ့ စစ်တပ်ရဲ့ ငွေကြေးရရှိနေတဲ့ လုပ်ငန်းတွေကို နိုင်ငံတကာကုမ္ပဏီတွေက အဆက်အသွယ်ဖြတ်တောက်ဖို့ လူ့အခွင့်အရေးအဖွဲ့တွေက တိုက်တွန်းဆော်ဩနေကြတာပါ။

POSCO ကုမ္ပဏီလည်း ဒီလို တိုက်တွန်းမှုမျိုးကို ရရှိခဲ့ပါတယ်။

MEHL က သူတို့ရဲ့ကမ်းလှမ်းမှုးကို ငြင်းဆန်ခဲ့မယ်ဆိုရင် မြန်မာနိုင်ငံမှာ လုပ်ငန်းဆက်လုပ်နိုင်ရေး တစ်ခြားနည်းလမ်းတွေ ရှာဖွေသွားမယ်လို့ မင်ဂျီဟွန်က ထည့်သွင်းပြောဆိုခဲ့ပါတယ်။

Ref: AP