အာဏာသိမ်းစစ်ကောင်စီက သတင်းအမှန်ဖုံး၍ လုပ်ကြံသတင်း လွှင့်နေသည်ဟု ကုလအထူးကိုယ်စားလှယ်ပြော

ဧပြီ ၁၇၊ ၂၀၂၁
M-Media

-အာဏာသိမ်းစစ်ကောင်စီဟာ နိုင်ငံအတွင်းမှာ ဖြစ်ပျက်နေတဲ့ ဖြစ်စဥ်အမှန်တွေကို ပြင်ပက မကြားနိုင် မမြင်နိုင်အောင် တိုးမြှင့်ဆောင်ရွက်လာတယ်လို့ မြန်မာနိုင်ငံရဲ့ လူ့အခွင့်အရေးဆိုင်ရာ အထူးကိုယ်စားလှယ် တွမ်အန်ဒရူးက ကုလသတင်းဌာနနဲ့ အင်တာဗျူးမှာ ပြောကြားလိုက်ပါတယ်။

ဖေဖော်၀ါရီ ၁ ရက်နေ့ အာဏာသိမ်းပြီးနောက်ပိုင်း ပေါ်ပေါက်လာတဲ့ လူထုအုံကြွမှုတွေကို စစ်ကောင်စီတပ်တွေက အကြမ်းဖက် ဖြိုခွင်းတာကြောင့် နိုင်ငံတစ်၀ှမ်း လူပေါင်း ၇၀၀ ကျော် သေဆုံးခဲ့ပြီး လူထောင်ချီဒဏ်ရာရကာ ၃၀၀၀ လောက် ဖမ်းဆီးထိန်းသိမ်းခံထားရပါတယ်။

ကုလကိုယ်စားလှယ် တွမ်အန်ဒရူးက ဒီလို အခြေအနေဆိုးရွားနေတာတွေကို ကမ္ဘာက မသိစေဖို့ စစ်ကောင်စီဟာ ကြိုးပမ်းအားထုတ် လုပ်ဆောင်နေတယ်လို့ ပြောပါတယ်။

“စစ်တပ်က သူတို့ကြုံနေရတာတွေကို လုပ်ကြံဖန်တီးပြီး ၀ါဒဖြန့်နေတယ်။ ဆူပူဆန္ဒပြသူတွေကို အဆုံးစွန်ဆုံး ထိန်းချုပ် ကိုင်တွယ်နေတယ်လို့ အစကတည်းက သူတို့ ပြောထားပါတယ်။ ဒါပေမယ့် ဒါဟာ အပြောသာရှိပြီး တကယ်မဟုတ်ဘူးဆိုတာ ကျွန်တော်တို့ တွေ့ပါတယ်။ စစ်တပ်က အကြမ်းဖက်မှု၊ ရက်စက်ကြမ်းကြုတ်မှုတွေ တိုးမြှင့်လုပ်ဆောင်လာတာကို ကျွန်တော်တို့တွေ့တယ်။ လက်နက်မပါ ဘာမပါနဲ့ တော်တော်လေး ငြိမ်းငြိမ်းချမ်းချမ်း ဆန္ဒပြသူတွေကိုလည်း ကျွန်တော်တို့ မြင်ပါတယ်။ သတင်းတွေမထွက်ဖို့ စစ်တပ်က ကြိုးစားပေမယ့်၊ တုန်လှုပ်ခြောက်ခြားဖွယ် အမှန်တရားတွေက ထွက်လာနေပါတယ်”

အာဏာသိမ်းစစ်ကောင်စီဟာ သတင်းထောက်တွေကို ဖမ်းဆီးတာ၊ နိုင်ငံတစ်၀ှမ်း ဖုန်းအင်တာနက်လိုင်းတွေ၊ ၀ိုင်ဖိုင်အင်တာနက်လိုင်းတွေကို ပိတ်ထားပြီး ဖိုက်ဘာအင်တာလိုင်းကိုလည်း အချိန်အကန့်အသတ်နဲ့သာ သုံးခွင့်ပြုထားကာ ဒါတွေဟာ သတင်းအမှောင်ချဖို့ ကြိုးစားမှု ဖြစ်တယ်လို့လည်း အန်ဒရူးက ထောက်ပြခဲ့ပါတယ်။

Ref: UN News