အိန္ဒိယမှ နာမည်ကျော် အစ္စလာမ့်ဓမ္မပညာရှင် မောင်လာနာ ၀ဟီဒွတ်ဒင်းခန်း ကွယ်လွန်

ဧပြီ ၂၂၊ ၂၀၂၁
M-Media

-အိန္ဒိယနိုင်ငံက နာမည်ကျော် အစ္စလာမ့်ဓပညာရှင်နဲ့ ငြိမ်းချမ်းရေးလှုပ်ရှားသူ မောင်လာနာ ၀ဟီဒွတ်ဒင်း ခန်းဟာ ကိုဗစ်ရောဂါနဲ့ မနေ့က ကွယ်လွန်သွားခဲ့ပါတယ်။

ကွယ်လွန်ချိန်မှာ ဆရာကြီးဟာ အသက် ၉၆ နှစ် ရှိပါပြီ။ ကိုဗစ်ကူးစက်တဲ့အတွက် နယူးဒေလီက ဆေးရုံတစ်ခုကို တင်လိုက်ရပြီးတဲ့နောက် အခုလို ကွယ်လွန်သွားခဲ့တာဖြစ်ပါတယ်။

မောင်လာနာ ၀ဟီဒွတ်ဒင်းခန်းဟာ အစ္စလာမ်ရေးရာနဲ့ ဒဿနဆိုင်ရာ စာအုပ်ပေါင်း ၂၀၀ ကျော်ကို ရေးသားခဲ့ပြီး တစ်ချိုု့စာအုပ်တွေဟာ နိုင်ငံအများအပြားမှာ ဘာသာစကားအမျိုးမျိုးနဲ့ ဘာသာပြန်ဆို ပုံနှိပ်ဖြန့်ချီခြင်းခံရတဲ့အထိ ကျော်ကြားပါတယ်။

ဆရာကြီးဟာ ကုရ်အာန်ကျမ်းစာ အနက်ဖွင့် အဌကဌာကျမ်းကြီးကို ရေးသားခဲ့သူလည်း ဖြစ်ပါတယ်။ ငြိမ်းချမ်းရေးလှုပ်ရှားသူတစ်ဦးဖြစ်ပြီး အိန္ဒိယနဲ့ နိုင်ငံတကာက ဆုတံဆိပေါင်းများစွာကို ပိုင်ဆိုင်ထားသူပါ။

အရပ်သားတွေကို ချီးမြှင့်တဲ့ အိန္ဒိယရဲ့ ဒုတိယအမြင့်ဆုံး ဂုဏ်ပြုဆု Padma Vibhushan ကို မကြာခင်ကပဲ ရရှိခဲ့ပါတယ်။

၂၀၀၉ ခုနှစ် ဝါရှင်တန်ဒီစီ ဂျော့တောင်းတက္ကသိုလ်က ထုတ်ပြန်တဲ့ ကမ္ဘာ့ဩဇာရှိဆုံး မွတ်စလင် ၅၀၀ စာရင်းမှာ မောင်လာနာ ပါဝင်ခဲ့ပြီး ‘အစ္စလာမ်သာသနာရဲ့ ကမ္ဘာ့သံတမန်’ လို့ သမုတ်ခြင်း ခံခဲ့ရပါတယ်။

ဆရာကြီးဟာ ၂၀၀၁ ခုနှစ်မှာ Peace and Spirituality စင်တာကို တည်ထောင်ခဲ့ပြီး လူ့အဖွဲ့အစည်းတွေအကြား ငြိမ်းချမ်းရေးသတင်းစကားကို ဖြန့်ချီခဲ့ပါတယ်။

မောင်လာနာ ၀ဟီဒွတ်ဒင်းခန်း ကွယ်လွန်မှုအတွက် ဝမ်းနည်းမိတယ်လို့ အိန္ဒိယဝန်ကြီးချုပ် နရန်ဒရာ မိုဒီက ပြောကြားခဲ့ပါတယ်။

“ဘာသာတရားနဲ့ နာမ်ပိုင်းရာနယ်ပယ်တွေမှာ ထိုးထွင်းသိမြင်နိုင်စွမ်း ကြီးမားသူအဖြစ် အမှတ်ရနေကြမှာပါ။ လူမှုဘ၀မြှင့်တင်ရေးနဲ့ လူထုအကျိုးပြုလုပ်ငန်းတွေကို စိတ်နှစ်လုပ်ဆောင်ခဲ့သူလည်း ဖြစ်ပါတယ်” လို့ မိုဒီက Twitter စာမျက်နှာမှာ ရေးသားခဲ့ပါတယ်။

အိန္ဒိယသမ္မတ ရမ် နသ် ကိုဗင်ကလည်း မောင်လာနာ ကွယ်လွန်သွားတဲ့အတွက် အလွန် ဝမ်းနည်းကြေကွဲရတယ်လို့ ပြောကြားခဲ့ပါတယ်။

“မောင်လာနာ ၀ဟီဒွတ်ဒင်းခန်းဟာ လူ့အဖွဲ့စည်း ​ငြိမ်းချမ်းရေး၊ သဟဇာတဖြစ်ရေး၊ ပြုပြင်ပြောင်းလဲရေးကို ထိထိရောက်ရောက် ကူညီလုပ်ဆောင်ပေးခဲ့သူပါ။ မိသားစုဝင်တွေ၊ ဆရာကြီးကို ချစ်ခင်မြစ်နိုးသူတွေနဲ့ ထပ်တူထပ်မျှ ဝမ်းနည်းကြေကွဲရပါတယ်”

Ref: Aljazeera