ကိုရိုနာဗိုင်းရပ်စ်ကူးစက်မှု မြင့်တက်လာသည့် တူရကီတွင် တစ်နိုင်ငံလုံး လော့ဒေါင်းချ

ဧပြီ ၂၉၊ ၂၀၂၁
M-Media

-ကိုရိုနာဗိုင်းရပ်စ်ကူးစက်မှု မြင့်တက်လာတာကြောင့် ဧပြီလ ၂၉ ရက်နေ့ကနေ မေလ ၁၇ ရက်နေ့အထိ တစ်နိုင်ငံလုံး လော့ဒေါင်းချမယ်လို့ တူရကီက ကြေငြာလိုက်ပါတယ်။

တူရကီမှာ ကိုဗစ်ကူးစက်မှုနဲ့ သေဆုံးမှုဟာ ပြီးခဲ့တဲ့တစ်ပတ်က စတင်ပြီး မြင့်တက်လာကာ နေ့စဉ်သေဆုံးမှုက ၃၅၀ အထိ ရှိလာခဲ့ပါတယ်။ ဒါဟာ ပြီးခဲ့တဲ့နှစ်မှာ ကြုံတွေ့ခဲ့ရတဲ့ ကိုဗစ်လှိုင်း ၂ ခုက တစ်နေ့တာသေဆုံးမှုထက် ပိုမိုမြင့်တက်လာတာ ဖြစ်ပါတယ်။

အခုလအစပိုင်းက နေ့စဉ်ကူးစက်မှု ၆ သောင်းကျော် ရှိခဲ့ရာကနေ မနေ့ကတော့ ၄ သောင်းကျော်အထိ ကျဆင်းသွားပါတယ်။

တူရကီသမ္မတ အာဒိုဂန်က တစ်နေ့ကကို ကူးစက်မှု ၅ ထောင်သာ ရှိတော့အောင် အလျင်အမြန်လျှော့ချသွားရမှာဖြစ်တဲ့အတွက် တစ်နိုင်ငံလုံး လော့ဒေါင်းချမှုကို လုပ်ဆောင်ရတာလို့ တနင်္လာနေ့မိန့်ခွန်းမှာ ပြောကြားခဲ့ပါတယ်။

ဇန်နဝါရီလလယ်ကစပြီး တူရကီဟာ ပြည်သူ ၂၂ သန်းကို ကိုဗစ်ကာကွယ်ဆေး ထိုးပေးဖို့ စီစဉ်ခဲ့တာပါ။ လက်ရှိအချိန်အထိ လူပေါင်း ၁၃.၅၅ သန်း ပထမတစ်ကြိမ် ကာကွယ်ဆေး ထိုးထားပြီးပါပြီ။

တရုတ်ထုတ် Sinovac ကာကွယ်ဆေး သန်း ၁၀၀ ကို တူရကီက မှာယူထားပြီး အမြန်ဆုံးပို့ပေးဖို့လည်း တရုတ်ကို တောင်းဆိုထားပါတယ်။

တူရကီဟာ Pfizer-BioNTech ကာကွယ်ဆေးကို ရရှိထားပြီး၊ Sputnik V ဝယ်ယူဖို့နဲ့ ပြည်တွင်းမှာ ထုတ်လုပ်နိုင်ဖို့လည်း ရုရှားနဲ့ စာချုပ်ချုပ်ဆိုထားပါတယ်။

Ref: Aljazeera