လာမယ့်တစ်ပတ် ကမ္ဘာပေါ်ကျမည့် တရုတ်ဒုံးပျံအပိုင်းအစ လူများအတွက် အန္တရာယ်ရှိနိုင်

မေ ၇၊ ၂၀၂၁
M-Media

-တရုတ်နိုင်ငံက ဧပြီလနှောင်းပိုင်းမှာ လွှတ်တင်ခဲ့တဲ့ ဒုံးပျံအခွံဟာ လာမယ့်တစ်ပတ်အတွင်း ကမ္ဘာပေါ်ကို အရှိန်နဲ့ကျလာဖို့ ရှိနေပြီး လူနေဒေသတွေအပေါ် ပြုတ်ကျရင် အန္တရာယ်ရှိနိုင်တယ်လို့ ပညာရှင်တွေက သတိပေးလိုက်ပါတယ်။

Long March 5B လို့ အမည်ပေးထားတဲ့ အဲဒီ ဒုံးပျံကို အာကာစခန်းတည်ဆောက်မယ့် ပထမဆုံးအစိတ်အပိုင်း ပို့လွှတ်မှုမှာ တရုတ်က သုံးခဲ့တာပါ။

အဲဒီဒုံးပျံအခွံဟာ လက်ရှိ ကမ္ဘာပတ်လမ်းကြောင်းမှာ လည်နေပြီး တစ်ဖြည်းဖြည်းနဲ့ ကမ္ဘာ့လေထုထဲကို ဝင်ရောက်ကာ အရှိန်နဲ့ ပြုတ်ကျလာဖို့ ရှိနေတာ ဖြစ်ပါတယ်။

အလေးချိန်ကြီးမားတဲ့ ဒီလိုအရာ ပြုတ်ကျလာမှုကို ထိန်းချုပ်လို့မရသလို၊ ဘယ်နေရာကျမယ်ဆိုတာလဲ ခန့်မှန်းလို့ မရပါဘူး။

အမေရိကန်က အခြေအနေကို စောင့်ကြည်နေပေမယ့် ပစ်ချဖို့ အစီအစဉ်မရှိဘူးလို့ မနေ့က ထုတ်ပြန်ခဲ့ပါတယ်။

“ဘယ်သူ့ကိုမှ မထိခိုက်မယ့်နေရာကို ကျမယ်လို့ ကျွန်တော်တို့ မျှော်လင့်ပါတယ်။ သမုဒ္ဒရာ ဒါမှမဟုတ် တစ်ခြားတစ်နေရာရာကိုပေါ့” လို့ အမေရိကန် ကာကွယ်ရေးဝန်ကြီး လွိုက် အော်စတင်က ပြောကြားခဲ့ပါတယ်။

တရုတ်နိုင်ငံအနေနဲ့ ဒီလို ဖြစ်လာနိုင်တယ်ဆိုတာမျိုးကို အစကတည်းက ထည့်သွင်းစဉ်းစားသင့်တယ်လို့လည်း သူက ဝေဖန်ခဲ့ပါတယ်။

တရုတ်နိုင်ငံပိုင် သတင်းဌာနကတော့ ဒီဒုံးပျံဟာ လူတွေနေထိုင်ရာနေရာကို ကျမှာမဟုတ်ဘဲ နိုင်ငံတကာရေပိုင်နက်ထဲက တစ်နေရာရာကို ကျမှာဖြစ်တယ်လို့ ထုတ်ပြန်ထားပါတယ်။

တရုတ်အာကာသပညာရှင် ကျုံးဖျင်က မိမိတို့ ဒီအခြေအနေကို အနီးကပ်စောင့်ကြည့်နေပြီး အထိအခိုက်မဖြစ်အောင် လိုအပ်သလို ဆောင်ရွက်သွားမယ်လို့ ပြောကြားခဲ့ပါတယ်။

၂၀၂၀ ခုနှစ်တုန်းက တရုတ်ရဲ့ အာကာသယာဉ်လွှတ်တင်တဲ့ Long March 5B ဒုံးပျံအခွံဟာ အိုက်ဗရီကို့စ်နိုင်ငံက ကျေးလက်ဒေသတစ်ခုကို ကျရောက်ခဲ့ပါသေးတယ်။

Ref: BBC