မလေးရှားတစ်နိုင်ငံလုံး ပြည်နယ်ကျော်၊ ခရိုင်ကျော် သွားလာ၍ မရတော့

မေ ၉၊ ၂၀၂၁
M-Media

-ကိုဗစ်ကူးစက်မှု မြင့်တက်လာတဲ့ မလေးရှားမှာ ပြည်နယ်ကျော်သွားလာမှု၊ ခရိုင်ကျော်သွားလာမှုကို တနင်္လာနေ့ကစတင်ပြီး အစိုးရက ပိတ်ပင်လိုက်ပါတယ်။

ဒီပိတ်ပင်မှုဟာ ဇွန်လ ၆ ရက်နေ့အထိ ၄ ပတ်တာ ကြာမြင့်မှာဖြစ်ပြီး ပြည်နယ်ကျော်၊ ခရိုင်ကျော် သွားလာလိုတယ်ဆိုရင် ရဲတပ်ဖွဲ့ရဲ့ ခွင့်ပြုချက်ကို ရယူရမှာ ဖြစ်ပါတယ်။

ပြီးခဲ့တဲ့သီတင်းပတ်အတွင်း ကိုဗစ်ကူးစက်မှု သိသိသာသာ မြင့်တက်လာတာကြောင့် မလေးရှားအစိုးရဟာ ကွာလာလမ်ပူ ပြည်ထောင်စုနယ်မြေအပါအဝင် ပြည်နယ်အချို့ကို လှုပ်ရှားသွားမှု ကန့်သတ်တဲ့ MCO အမိန့် ထုတ်ပြန်ထားပါတယ်။

တစ်ချို့ဒေသတွေမှာတော့ သိပ်မတင်းကြပ်တဲ့ CMCO အမိန့်ထုတ်ပြန်ထားပါတယ်။ ဒါပေမယ့် ပြည်နယ်ကျော်၊ ခရိုင်ကျော် သွားလာမှု ပိတ်ပင်တာကို တစ်နိုင်ငံလုံးအတွက် ထုတ်ပြန်တာပါ။

MCO ထုတ်ပြန်ထားတဲ့ ဒေသတွေမှာ လူစုလူဝေးပြုလုပ်ခွင့် ပိတ်ပင်ထားပြီး၊ ကျောင်းတွေ၊ ​ဖျော်ဖြေရေးနေရာတွေ၊ စျေးတစ်ချို့နဲ့ ကုန်တိုက်တစ်ချို့ ပိတ်ထားရပါတယ်။ လာမယ့်တစ်ပတ်ကျရောက်မယ့် အီဒွလ်ဖိသီရ် ဝါကျွတ်အီးဒ်ကိုလည်း ကျင်းပခွင့် မပေးပါဘူး။

CMCO ထုတ်ထားတဲ့ ဒေသတွေမှာတော့ ဝါကျွတ်အီးဒ် ပထမ ၃ ရက်ကို ကျင်းပခွင့်ပြုထားပြီး လူ ၂၀ ကနေ အများဆုံး ၂၅ ယောက်အထိသာ စုခွင့်ရမှာ ဖြစ်ပါတယ်။

မလေးရှားမှာ ပြီးခဲ့တဲ့ရက်ပိုင်းအတွင်း နေ့စဉ် ကိုဗစ်ကူးစက်မှုအရေအတွက်ဟာ ၃ ထောင်ကျော် ရှိနေပြီး သေဆုံးမှုတွေလည်း ရှိနေပါတယ်။

Ref: CNA