မလေးရှားတွင် တစ်နိုင်ငံလုံး လှုပ်ရှားသွားလာမှုကန့်သတ်မိန့် ထုတ်ပြန်

မေ ၁၀၊ ၂၀၂၁
M-Media

-ကိုဗစ်ကပ်ရောဂါ တတိယလှိုင်းကို ထိန်းနိုင်ဖို့အတွက် မလေးရှားက တစ်နိုင်ငံလုံးကို လှုပ်ရှားသွားလာမှုကန့်သတ်မိန့် (MCO) ကို မေလ ၁၂ ရက်နေ့ကနေ ဇွန်လ ၇ ရက်နေ့အထိ ထုတ်ပြန်လိုက်ပါတယ်။

လူကြီးသူမတွေကို သွားရောက် စလာမ်ပေး ဂါရ၀ပြုတာ၊ သုသာန်ကိုသွားကာ ကွယ်လွန်သွားသူတွေအတွက် ဆုတောင်းအမျှပေးဝေတာတွေအပါအဝင် အီဒွလ်ဖိသီရ် ဝါကျွတ်အီးဒ်နေ့ လှုပ်ရှားမှုအားလုံးကိုလည်း ပိတ်ပင်လိုက်ပါတယ်။ ဝါကျွတ်အီးဒ်နေ့ဟာ အခုတစ်ပတ် ကြာသာပတေးနေ့မှာ ကျရောက်မှာပါ။

မလေးရှားဝန်ကြီးချုပ် မုဟ်ယစ်ဒင် ယာစင်က ခပ်ခွာခွာနေထိုင်ဖို့ ခက်ခဲတဲ့ လူစုလူဝေးတွေ၊ အခမ်းအနားတွေက ကိုဗစ်ပြန့်နှံ့မှု အဓိကအကြောင်းအရင်းဖြစ်နေတဲ့အတွက် တစ်နိုင်ငံလုံး တင်းကြပ်တဲ့ MCO အမိန့် ထုတ်ပြန်လိုက်တာလို့ ဒီကနေ့မိန့်ခွန်းမှာ ထည့်သွင်းပြောဆိုခဲ့ပါတယ်။

မလေးရှားဟာ ပြီးခဲ့တဲ့တစ်ပတ်က ပြည်နယ်အချို့မှာသာ လှုပ်ရှားသွားလာမှု တင်းတင်းကြပ်ကြပ် ကန့်သတ်တဲ့ MCO အမိန့် ထုတ်ထားတာပါ။

MCO မှာ ဘယ်လို လူစုလူဝေးမှ လုပ်ခွင့်မရှိဘဲ ကျောင်းတွေလည်း ပိတ်ထားရမှာဖြစ်ပါတယ်။ ကားတွေဟာ ယာဉ်မောင်းအပါအဝင် လူ ၃ ဦးသာ စီးနင်းနိုင်မှာဖြစ်ပြီး စားသောက်ဆိုင်တွေမှာ ထိုင်စားမှုကိုလည်း ခွင့်မပြုပါဘူး။

မလေးရှားဟာ တစ်နိုင်ငံလုံး ခရိုင်ကျော်သွားလာမှု၊ ပြည်နယ်ကျော် သွားလာမှုကိုလည်း ပိတ်ပင်ထားပါတယ်။

Ref: CNA