ကိုဗစ်ကာကွယ်နိုင်ရေး နောက်ချေးများ သုတ်လိမ်းမှုကို အိန္ဒိယဆရာဝန်များ သတိပေး

မေ ၁၃၊ ၂၀၂၁
M-Media

-အိန္ဒိယမှာ ကိုဗစ်ကူးစက်မှုကို ကာကွယ်နိုင်တယ်လို့ ယုံကြည်ကာ နွားချေးတွေ၊ ကျင်ငယ်ရည်တွေ ခန္ဓာကိုယ်မှာ ​ သုတ်လိမ်းမှုဟာ တစ်ခြားရောဂါတွေ ဖြစ်စေနိုင်တယ်လို့ ကျန်းမာရေးတာဝန်ရှိသူတွေက သတိပေးလိုက်ပါတယ်။

ပြီးခဲ့တဲ့လကစလို့ အိန္ဒိယဟာ ကိုဗစ်တတိယလှိုင်းကို ကြုံတွေ့နေရပြီး နေ့စဉ် ကူးစက်မှုသိန်းချီ သေဆုံးသူ ထောင်ချီ ရှိနေတာပါ။ နိုင်ငံတစ်ဝှမ်း ဆေးရုံတွေမှာ ကုတင်တွေနဲ့ ဆေးဝါးပစ္စည်း မလုံလောက်တာတွေကိုလည်း ကြုံတွေ့နေရပါတယ်။

နိုင်ငံအနောက်ပိုင်း ဂူဂျာရတ်အပါအဝင် ပြည်နယ်တစ်ချို့မှာ လူတွေဟာ နွားချေးတွေ၊ ကျင်ငယ်ရည်တွေကို ခန္ဓာကိုယ်မှာ သုတ်လိမ်းကြပြီး ဒီလိုလုပ်ဆောင်ခြင်းအားဖြင့် ကိုယ်ခံအာကောင်းစေကာ ကိုဗစ်ကို ကာကွယ်ပေးနိုင်ပြီး၊ ကိုဗစ်ဖြစ်နေတဲ့လူတွေမှာလည်း အလျင်အမြန် ပြန်ကျန်းမာလာစေတယ်လို့ ယုံကြည်နေကြပါတယ်။

ဟိန္ဒူအယူဝါဒအရ နွားကို မြင့်မြတ်တဲ့သတ္တဝါလို့ ယူဆကြပြီး နွားချေးနဲ့ ကျင်ငယ်ရည်တွေကို နေအိမ်တွေသန့်ရှင်းဖို့နဲ့ ဘာသာရေးအခမ်းအနားတွေအတွက် အသုံးပြုကြသလို၊ ရောဂါဘယပျောက်​စေနိုင်တဲ့ အစွမ်းသတ္တိ ရှိတယ်လို့လည်း ယုံကြည်နေကြပါတယ်။

အိန္ဒိယနဲ့ ကမ္ဘာတစ်ဝှမ်းက ဆရာဝန်တွေ၊ သိပ္ပံပညာရှင်တွေက နွားချေးနဲ့ ကျင်ငယ်​ရည်တွေကို သုတ်လိမ်းတာဟာ ကိုဗစ်ကို မကာကွယ်ပေးနိုင်တဲ့အပြင် တစ်ခြား ကျန်းမာရေးပြဿနာတွေ ဖြစ်စေနိုင်တယ်လို့ သတိပေးထားပါတယ်။

“နွားချေးတွေ၊ ကျင်ငယ်ရည်တွေဟာ ကိုဗစ်ကို ကာကွယ်နိုင်တဲ့ ကိုယ်ခံအား ဖြစ်စေတယ်ဆိုတဲ့ ခိုင်မာတဲ့ သိပ္ပံဆိုင်ရာ အထောက်အထား မရှိပါဘူး။ ဒါဟာ ယုံကြည်မှုသက်သက်သာ ဖြစ်ပါတယ်။ ဒါတွေကို သုတ်လိမ်းတာ၊ သုံးစွဲတာတွေမှာ ကျန်းမာရေးအန္တရာယ် ရှိပါတယ်။ တိရစ္ဆာန်ကနေ လူဆီကို တစ်ခြားရောဂါတွေ ပြန့်နှံ့နိုင်ပါတယ်” လို့ အိန္ဒိယ ဆေးဘက်ဆိုင်ရာအသင်း ဥက္ကဌ ဒေါက်တာ ဂျေအေ ဂျာယာလာက ပြောပါတယ်။

နွားချေးတွေ၊ ကျင်ငယ်ရည်တွေကို လူအုပ်စုလိုက် သုတ်လိမ်းတာမျိုး လုပ်တာဟာ ကိုဗစ်ရောဂါကို ပိုမို ပြန့်နှံ့စေနိုင်တယ်ဆိုတဲ့ စိုးရိမ်မှုတွေလည်း ရှိနေပါတယ်။

Ref: Reuters