အပူချိန် ရုတ်တရက် ကျဆင်းမှုကြောင့် တရုတ်မာရသွန်ပြိုင်ပွဲတွင် လူ ၂၁ ဦး သေဆုံး

မေ ၂၃၊ ၂၀၂၁
M-Media

-တရုတ်နိုင်ငံ အနောက်မြောက်ပိုင်း ဂန်းဆူပြည်နယ်က တောင်တန်းတစ်ခုမှာ မာရသွန်အပြေးပြိုင်ပွဲ ကျင်းပနေစဉ် အပူချိန် ရုတ်တရက် ကျဆင်းသွားတာကြောင့် နိုင်ငံကျော်တစ်ချို့အပါအဝင် အပြေးသမား ၂၁ ဦး သေဆုံးသွားပါတယ်။

ဘိုင်ယင်မြို့က အဲဒီ မာရသွန်ပြိုင်ပွဲကို လူ ၁၇၂ ဦး ဝင်ရောက်ယှသ်ပြိုင်ခဲ့ကြတာပါ။ ပြိုင်ပွဲကျင်းပတဲ့ Yellow River Stone တောထဲမှာ မနေ့ကနေလည် ၁ နာရီလောက် အပူချိန်ရုတ်တရက်ကျဆင်းကာ အလွန်အမင်းအေးလာပြီး မိုးတွေရွာ၊ လေတွေတိုက်ခဲ့တာ ဖြစ်ပါတယ်။

အပြေးပြိုင်ပွဲမှာပါဝင်သူ ၁၅၁ ဦး အနာတရတစ်ချို့ရကာ ဘေးကင်းခဲ့ပေမယ့် ကျန်တဲ့သူတွေက ပျောက်ဆုံးနေတာပါ။ တာဝန်ရှိသူတွေက ကယ်ဆယ်ရေးအဖွဲ့ဝင် ၇၀၀ ကျော်လောက်နဲ့ ရှာဖွေခဲ့ရာမှာတော့ ဒီနေ့မနက်အစောပိုင်းမှာ ပျောက်ဆုံးနေသူ ၂၁ ဦးရဲ့ ရုပ်အလောင်းတွေကို တွေ့ခဲ့ရပါတယ်။ အပူချိန်ရုတ်တရက်ကျဆင်းမှုဆိုးကျိုးကြောင့် ဒီလို သေဆုံးရတာဖြစ်တယ်လို့ တာဝန်ရှိသူတွေက ပြောပါတယ်။

သေဆုံးသူတွေထဲမှာ ပြည်တွင်းမှာနာမည်ကြီးတဲ့ အပြေးသမား လျန်ကျင်းနဲ့ ဟွမ်ဂွမ်ကျင်းတို့ ပါဝင်ပါတယ်။ လျန်ကျင်းဟာ ပြီးခဲ့တဲ့နှစ်တွေအတွင်း ပြည်တွင်းက မာရသွန်ပြိုင်ပွဲတွေမှာ ဗိုလ်စွဲထားသူ ဖြစ်ပါတယ်။

Ref: CNA