စစ်ကောင်စီကထုတ်ပယ်သည့် ဆရာ၊ ဆရာမဦးရေ ၁၂၅၀၀၀ ကျော် ရှိလာ

မေ ၂၃၊ ၂၀၂၁
M-Media

-CDM လှုပ်ရှားမှုမှာ ပါဝင်တဲ့အတွက် စစ်ကောင်စီက အလုပ်ထုတ်တဲ့ ဆရာ၊ ဆရာမ အရေအတွက်ဟာ စုစုပေါင်း ၁၂၅၀၀၀ ကျော် ရှိလာပြီလို့ မြန်မာနိုင်ငံလုံးဆိုင်ရာ ဆရာ၊ ဆရာမများအဖွဲ့ချုပ်က ထုတ်ပြန်ပါတယ်။

ရွေးကောက်တင်မြှောက်ခံထားရတဲ့ အစိုးရကို ဖေဖော်ဝါရီ ၁ ရက်နေ့မှာ ဖြုတ်ချပြီး အာဏာသိမ်းကာ တက်လာတဲ့ စစ်ကောင်စီကို လက်မခံကြောင်း ပြသတဲ့အနေနဲ့ အစိုးရဝန်ထမ်းတော်တော်များများ CDM လှုပ်ရှားမှာ ပါဝင်ခဲ့ကြပါတယ်။

ဒီလှုပ်ရှားမှုကြောင့်ပဲ အစိုးရယန္တရား ရပ်ဆိုင်းသွားခဲ့ပါတယ်။ စစ်ကောင်စီက CDM လုပ်တဲ့ဝန်ထမ်းတွေကို ဖမ်းဆီးနှိပ်စက်တာမျိုး လုပ်ဆောင်ခဲ့တဲ့အပြင် ဝန်ထမ်းတွေ အလုပ်ပြန်လာဖို့ ခြိမ်းခြောက်တာမျိုးလည်း ရှိပါတယ်။ အလုပ်ပြန်မဝင်တဲ့သူတွေကိုတော့ ရာထူးကနေ ထုတ်ပယ်နေပါတယ်။

မေလ ၂၃ ရက်နေ့အထိ ပညာရေးဌာနမှာ ထုတ်ပယ်ခံရတဲ့ ဆရာ၊ ဆရာမအရေအတွက်ဟာ ၁၂၅၉၀၀ ရှိပြီလို့ မြန်မာနိုင်ငံ ဆရာ၊ ဆရာမများအဖွဲ့ချုပ်ရဲ့ အမည်မဖော်လိုသူ တာဝန်ရှိသူတစ်ဦးက ပြောပါတယ်။

လွန်ခဲ့တဲ့ ၂ နှစ်က ကောက်ထားတဲ့ နောက်ဆုံးအချက်အလက်တွေအရေ မြန်မာနိုင်ငံမှာ ဆရာ၊ ဆရာမဦးရေ စုစုပေါင်း ၄၃၀၀၀၀ လောက် ရှိနေတာပါ။

“ထုတ်ပယ်တယ်ဆိုတဲ့ ကြေငြာချက်တွေဟာ အလုပ်ပြန်ဝင်ဖို့ ခြိမ်းခြောက်မှုတစ်ခုပါ။ ဒီလောက်အများကြီးကို သူတို့ ထုတ်ပစ်လိုက်ရင် စနစ်တစ်ခုလုံး ရပ်ဆိုင်းသွားပါလိမ့်မယ်” လို့ အဖွဲ့ချုပ် တာဝန်ရှိသူက ဆိုပါတယ်။

စစ်ကောင်စီဟာ လာမယ့်လမှာ ကျောင်းတွေပြန်ဖွင့်ဖို့ စီစဉ်နေတာပါ။ တက္ကသိုလ်ပညာရေးက ထုတ်ပယ်ခံရတဲ့ ဆရာ၊ ဆရာမနဲ့ ပညာရေးဝန်ထမ်း စုစုပေါင်း ၁၉၅၀၀ ဝန်းကျင် ရှိနေပါတယ်။

အာရှက ပညာရေးစနစ် အနိမ့်ဆုံးနိုင်ငံတွေထဲမှာ မြန်မာနိုင်ငံလည်းပါဝင်ပြီး ပြီးခဲ့တဲ့နှစ် အာရှနိုင်ငံပေါင်း ၉၃ နိုင်ငံကို စစ်တမ်းကောက်ယူရာမှာ မြန်မာနိုင်ငံက အဆင့် ၉၂ နေရာမှာ ရှိနေပါတယ်။

Ref: Reuters