ကိုဗစ်ကူးစက်မှုကို တရုတ်က ဖုံးထားသည်ဟု ယူဆနိုင်သော အထောက်အထားတစ်ခု ထွက်ပေါ်လာ

မေ ၂၄၊ ၂၀၂၁
M-Media

-ကိုဗစ်ကပ်ရောဂါဖြစ်နေကြောင်း တရုတ်အစိုးရက ကမ္ဘာကိုမကြေငြာခင် လပိုင်းအလို ၂၀၁၉ ခုနှစ် နိုဝင်ဘာလမှာ ၀ူဟန်မြို့ ဗိုင်းရပ်စ်လေ့လာရေးဌာန (WIV) က ပညာရှင် ၃ ယောက် ကိုဗစ်လက္ခဏာတွေနဲ့ ဆေးရုံတက်ခဲ့ရတယ်ဆိုတဲ့သတင်း ပေါက်ကြားလာပါတယ်။

အရင်က ထုတ်ပြန်ခြင်း မရှိသေးတဲ့ အမေရိကန်ထောက်လှမ်းရေး ရင်းမြစ်တွေကို ကိုးကားပြီး Wall Street Journal က မနေ့မှာ လူသိရှင်ကြား ဖော်ပြခဲ့တာပါ။

ကိုဗစ်ကပ်ရောဂါဟာ တရုတ်နိုင်ငံ ၀ူဟန်မြို့ အသားငါးစျေးထဲကနေ အစပြုတာလို့ ကမ္ဘာက လက်ခံထားပါတယ်။

အမေရိကန်က ကိုဗစ်ဗိုင်းရပ်စ်ဟာ ၀ူဟန်မြို့မှာရှိတဲ့ WIV ဓာတ်ခွဲခန်းကနေ ပေါက်ထွက်လာတာလို့ စွပ်စွဲထားပြီး တရုတ်ကတော့ ဒါကို ငြင်းဆိုပါတယ်။

အမေရိကန်ထောက်လှမ်းရေးရင်းမြစ်က ပေါက်ကြားလာတဲ့ အခု သတင်းအသစ်မှာ ကူးစက်ခံရသူ သုတေသနပညာရှင်အရေအတွက်၊ သူတို့ ရောဂါဖြစ်တဲ့အချိန်၊ ဆေးရုံတက်ကုသမှုတွေအကြောင်း အသေးစိတ်ဖော်ပြထားပြီး၊ ကိုဗစ်ကပ်ရောဂါဟာ ၀ူဟန်မြို့ ဓာတ်ခွဲခန်းထဲက ပေါက်လာတာလားဆိုတာ ပိုမိုကျယ်ကျယ်ပြန့်ပြန့် စုံစမ်းစစ်ဆေးဖို့ တွန်းအားတစ်ခု ဖြစ်လာလိမ့်မယ်လို့ Wall Street Journal က ရေးပါတယ်။

သမ္မတဟောင်းထရမ့် ရာထူးကမဆင်းခင် အမေရိကန်အစိုးရရဲ့ ထုတ်ပြန်ချက်ထဲမှာ ကိုဗစ်ကပ်ရောဂါဖြစ်နေကြောင်း တရုတ်က ကမ္ဘာကိုမကြေငြာခင် လပိုင်းအလို ၂၀၁၉ ခုနှစ် နွေရာသီမှာ ၀ူဟန်ဓာတ်ခွဲခန်းက သုတေသနပညာရှင် တော်တော်များများ နေထိုင်မကောင်းတာကြောင့် ဆေးကုသမှု ခံယူခဲ့ရတာကို တွေ့ရကြောင်း ဖော်ပြထားပါတယ်။

ဒီပညာရှင်တွေခံစားရတဲ့ ရောဂါလက္ခဏာတွေထဲမှာ ကိုဗစ်နဲ့ သာမန်ရာသီတုပ်ကွေး လက္ခဏာတွေ ရောပြွမ်းနေတယ်လို့ ဆိုပါတယ်။

ကိုဗစ်ကပ်ရောဂါအစကို စုံစမ်းစစ်ဆေးနိုင်ရေး WHO က ကျွမ်းကျင်ပညာရှင်အဖွဲ့ ၀ူဟန်ကိုလာရောက်ဖို့ အစပိုင်းမှာ တရုတ်က ခွင့်မပြုခဲ့ပေမယ့် နောက်ပိုင်းမှာတော့ ဝင်ရောက်ခွင့် ပေးခဲ့ပါတယ်။

WHO ဟာ ကိုဗစ်ကပ်ရောဂါ စတင်ဖြစ်ပွားမှုကိစ္စ စုံစမ်းစစ်ရေး နောက်တစ်ဆင့်တက်နိုင်ဖို့အတွက် ဒီကနေ့မှာ ဆွေးနွေးဖို့ ရှိနေပါတယ်။

Wall Street Journal က အခုသတင်းအတွက် မှတ်ချက်ပေးဖို့ တရုတ်နိုင်ငံခြားရေးဝန်ကြီးဌာနက ငြင်းဆိုခဲ့ပါတယ်။ ဖေဖော်ဝါရီလက ၀ူဟန်ဓာတ်ခွဲခန်း WIV ကို သွားရောက်လေ့လာခဲ့တဲ့ WHO အဖွဲ့က ကိုဗစ်ဗိုင်းရပ်စ်ဟာ WIV ကနေ ပေါက်ထွက်လာတာမျိုး သိပ်မဖြစ်နိုင်ဘူးလို့ ကောက်ချက်ချခဲ့တာကို တရုတ်နိုင်ငံခြားရေးဝန်ကြီးဌာနက ထောက်ပြခဲ့ပါတယ်။

Ref: Reuters