ကုလအထူးကိုယ်စားလှယ် မြန်မာနိုင်ငံဝင်ခွင့်ရရေး မျှော်လင့်နေဆဲ

မေ ၂၅၊ ၂၀၂၁
M-Media

-မြန်မာနိုင်ငံကို လာရောက်ပြီး သက်ဆိုင်သူတွေနဲ့ ဆွေးနွေးဖို့ မျှော်လင့်နေဆဲပဲလို့ ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် ခရစ္စတင်း ရှာနာရ် ဘာဂီနာက မနေ့မှာ ပြောကြားလိုက်ပါတယ်။

ဘာဂီနာဟာ မြန်မာ့အရေး ကြားဝင်ဖြေရှင်းပေးနိုင်ဖို့အတွက် ထိုင်းနိုင်ငံကိုရောက်ရှိနေတာ သီတင်းပတ် ၇ ပတ်ရှိသွားပြီ ဖြစ်ပါတယ်။

ဧပြီလနှောင်းပိုင်း အင်ဒိုနီးရှားနိုင်ငံ ဂျကာတာမြို့မှာပြုလုပ်တဲ့ အာဆီယံထိပ်သီးအစည်းအဝေးမတိုင်ခင် ဘာဂီနာဟာ အာဆီယံခေါင်းဆောင်တွေနဲ့ တွေ့ဆုံခဲ့သလို၊ အစည်းအဝေးကို တက်ရောက်လာတဲ့ စစ်ကောင်စီဥက္ကဌ ဗိုလ်ချုပ်မှူးကြီးမင်းအောင်လှိုင်နဲ့လည်း သီးခြား တွေ့ဆုံခဲ့ပါတယ်။

အဲဒီတွေ့ဆုံမှုအတွင်း စစ်ကောင်စီဥက္ကဌက သင့်တော်တဲ့အချိန်ကျရင် မြန်မာနိုင်ငံကို ဝင်ရောက်ခွင့်ပေးမယ်လို့ ဘာဂီနာကို ပြောခဲ့တာပါ။ ဒါပေမယ့် အခုအချိန်အထိ ဝင်ရောက်ခွင့်မပြုသေးဘဲ ဘာဂီနာကတော့ လာရောက်ခွင့်ရဖို့ မျှော်လင့်နေဆဲ ဖြစ်ပါတယ်။

ဘာဂီနာဟာ ဒီကနေ့ ဂျပန်နိုင်ငံကို သွားရောက်ပြီး တာဝန်ရှိသူတွေနဲ့တွေ့ဆုံကာ မြန်မာ့အရေးကို ဆွေးနွေးမှာပါ။ တရုတ်အစိုးရနဲ့လည်း တွေ့ဆုံဆွေးနွေးဖို့ အသင့်ရှိကြောင်း သူမက ထည့်သွင်းပြောဆိုခဲ့ပါတယ်။

“ဒေသတွင်းက နိုင်ငံတိုင်းအတွက် တော်တော်ကို မတည်ငြိမ်တဲ့ အနေအထားမျိုးပါ။ နိုင်ငံအားလုံးနဲ့ ဆွေးနွေးဖို့ လိုအပ်တယ်လို့ ကျွန်မထင်တဲ့အတွက် ဘယ်နေရာမှာပဲဖြစ်ဖြစ် တရုတ်အစိုးရနဲ့ ​ဆွေးနွေးဖို့ ကျွန်မ အဆင်သင့်ပါပဲ”

စစ်ကောင်စီအပေါ် လက်နက်ပိတ်ဆို့ရေးရည်ရွယ်တဲ့ ဆုံးဖြတ်ချက်မူကြမ်းတစ်ခုကို ကုလသမဂ္ဂ အထွေထွေညီလာခံမှာ မေလ ၁၈ ရက်နေ့မှာ မဲခွဲဆုံးဖြတ်ဖို့ စီစဉ်ထားပေမယ့် အာရှနိုင်ငံတစ်ချို့ရဲ့ ထောက်ခံမှုကို မရတဲ့အတွက် ရပ်ဆိုင်းထားရပါတယ်။

အာရှနိုင်ငံတွေက စစ်ကောင်စီကို လက်နက်ရောင်းချ၊ ပေးပို့မှု ပိတ်ပင်ရေးနဲ့ စစ်ကောင်စီရဲ့ လူ့အခွင့်အရေးချိုးဖောက်မှုကိစ္စ ဆုံးဖြတ်ချက်မူကြမ်းမှာ ဖော်ပြထားတာကို ဖယ်ရှားစေချင်နေတာ ဖြစ်ပါတယ်။

ဆုံးဖြတ်ချက်ဟာ ထိထိရောက်ရောက်ဖြစ်ဖို့နဲ့ ကုလသမဂ္ဂအထွေထွေညီလာခံမှာ စည်းလုံးမှုကိုပြဖို့ အရေးကြီးတယ်လို့လည်း ဘာဂီနာက ထည့်သွင်းပြောဆိုခဲ့ပါတယ်။

Ref: AFP