BioNTech ကိုဗစ်ကာကွယ်ဆေး၀ယ်ယူရန် ထိုင်ဝမ်၏ ကြိုးပမ်းမှုကို တရုတ်က နှောက်ယှက်

မေ ၂၆၊ ၂၀၂၁
M-Media

-ဂျာမနီဆေးဝါးကုမ္ပဏီ BioNTech SE ထံကနေ ကိုဗစ်ကာကွယ်ဆေး၀ယ်ယူနိုင်ရေး ကြိုးပမ်းမှုကို တရုတ်အစိုးရက တားဆီးနေတယ်လို့ ထိုင်ဝမ်က ပြောပါတယ်။

ထိုင်ဝမ်ဟာ AstraZeneca Plc နဲ့ Moderna Inc တို့ကနေ ကာကွယ်ဆေးသန်းချီ မှာယူထားပေမယ့် အခုအချိန်အထိ စုစုပေါင်း ၇ သိန်းသာ ရရှိထားပြီး ဒီပမာဏဟာ ထိုင်ဝမ်လူဦးရေရဲ့ ၁ ရာခိုင်နှုန်းကိုသာ ထိုးပေးနိုင်မှာပါ။

ကာကွယ်ဆေးဝယ်ယူရေး BioNTech နဲ့သဘောတူညီချက်ရဖို့ အလွန်နီးစပ်တဲ့အနေအထား ရှိခဲ့ပေမယ့် တရုတ်က ကြားဝင်နှောက်ယှက်တဲ့အတွက် အခုအချိန်အထိ လက်မှတ်မထိုးနိုင်သေးဘူးလို့ ထိုင်ဝမ်သမ္မတ Tsai Ing-wen က အာဏာရ ဒီမိုကရေတစ် တိုးတက်ရေးပါတီ အစည်းအဝေးမှာ ပြောကြားခဲ့ပါတယ်။

ထိုင်ဝမ်ဟာ သူတို့ပိုင်နက်လို့ တရုတ်အစိုးရက သတ်မှတ်ထားပြီး ထိုင်ဝမ်ကတော့ လွတ်လပ်တဲ့ နိုင်ငံတစ်ခုဖြစ်တယ်လို့ ပြောဆိုထားတာပါ။

BioNTech ကာကွယ်ဆေးရဖို့ ထိုင်ဝမ်ရဲ့ကြိုးပမ်းမှုကို နှောက်ယှက်နေတယ်ဆိုတဲ့ သတင်းတွေကို တရုတ်အစိုးရက ငြင်းပါတယ်။ တရုတ်ဆေးဝါးလုပ်ငန်း Shanghai Fosun Pharmaceutical Group ကနေ BioNTech ကာကွယ်ဆေး ထိုင်ဝမ်ကိုရောင်းပေးဖို့ တရုတ်အစိုးရက စီစဉ်နေတာ ဖြစ်ပါတယ်။

Ref : Reuters