စစ်အာဏာရှင်အောက်တွင် မြန်မာနိုင်ငံက လူသန်းချီ ငတ်မွတ်တော့မည်

မေ ၃၀၊ ၂၀၂၁
M-Media

-လာမယ့်လတွေမှာ မြန်မာနိုင်ငံက လူသန်းချီ ငတ်မွတ်မှု ကြုံတွေ့ရနိုင်တယ်လို့ WFP က သတိပေးထားပါတယ်။

ရန်ကုန်မြို့က မအေးမာတစ်ယောက် နေအိမ် မီးဖိုဆောင်မှာ သားသမီး ၇ ယောက်နဲ့အတူ ထိုင်နေပြီး ထမင်းနဲ့ ခပ်နွမ်းနွမ်းအရွက်ဟင်းက ကလေးတွေရဲ့ ဆာလောင်မှုကို ပြေပျောက်စေပါ့မလားဆိုတာ စိုးရိမ်နေပါတယ်။ စစ်အာဏာသိမ်းမှုနောက်ပိုင်း သူမဟာ ဒီလို ဟင်းမျိုးလောက်ပဲ စားနိုင်ပါတော့တယ်။

ဖေဖော်၀ါရီလက အရပ်သားခေါင်းဆောင် ဒေါ်အောင်ဆန်းစုကြည်ကို စစ်တပ်က ဖြုတ်ချအာဏာသိမ်းလိုက်ပြီးတဲ့နောက်ပိုင်း မြန်မာနိုင်ငံရဲ့ စီးပွားရေးနဲ့ ဘဏ်လုပ်ငန်းဟာ အားနည်း​ရပ်ဆိုင်းသွားခဲ့ပါတယ်။

သပိတ်မှောက်ဆန္ဒပြမှု၊ စက်ရုံအလုပ်ရုံတွေ ပိတ်ပစ်ရမှု၊ ဓာတ်ဆီစျေးနှုန်းတွေ မြင့်တက်မှုတွေကြောင့် ပြည်သူ့ဘ၀တွေ ပျက်ခဲ့ရပြီး၊ ဘဏ်မှာ ငွေစုထားကြသူတွေကလည်း ဒီငွေကိုထုတ်ဖို့ တစ်နေကုန်တစ်နေခန်း တန်းစီကြရတာတွေ ဖြစ်လာပါတယ်။

စစ်တပ်က သူတို့နဲ့ သဘောထားမတိုက်ဆိုင်သူတွေကို တွေ့ရာမြင်ရာ အကြမ်းဖက်နေတာကြောင့် ဝင်ငွေရဖို့ အပြင်ထွက်အလုပ်လုပ်ရတာကလည်း ကြမ္မာတွင်းထဲ ဆင်းရသလို ဖြစ်လာပါတယ်။ စစ်ကောင်စီလက်ချက်ကြောင့် လူပေါင်း ၈၀၀ ကျော် သေဆုံးခဲ့ပြီလို့ ပြည်တွင်း စောင့်ကြည့်အဖွဲ့တစ်ခုက ထုတ်ပြန်ထားပါတယ်။

သာမန်အချိန်မှာ ဆန်၊ ပဲနဲ့ အသီးအနှံတွေ နိုင်ငံခြားတင်ပို့ရတဲ့ တိုင်းပြည်မှာ လာမယ့်လအနည်းငယ်အတွင်း လူသန်းချီ ဆာလောင်မွတ်သိပ်မှုနဲ့ ကြုံတွေ့ရတော့မယ်လို့ ကမ္ဘာ့စားနပ်ရိက္ခာအစီအစဉ် WFP က သတိပေးထားပါတယ်။

“ကလေးတွေ မငတ်အောင်တော့ ကျွန်မတို့ ရှာဖွေကျွေးမွေးရမှာပါ” လို့ ဖိနပ်မပါဘဲ ထိုင်ကာ ပုခက်ထဲကကလေးကို လွှဲပေးနေတဲ့ မအေးမာက ပြောပါတယ်။

အသက် ၃၃ နှစ်အရွယ် သူမဟာ အလုပ်မရှိပါဘူး။ ခင်ပွန်းသည်ကတော့ ​ရေမြောင်းတူးတာလို အလုပ်အမျိုးအပါအဝင် ကြုံရာကျပန်း လုပ်နေရပါတယ်။

ထမင်းဆိုင်ဖွင့်ထားတဲ့ အသက် ၃၇ နှစ်အရွယ် မဝါဝါက အာဏာသိမ်းပြီးနောက်ပိုင်း ကုန်စျေးနှုန်း ထိုးတက်နေတာကြောင့် စျေးဝယ်သူတွေဟာ ငါးခြောက်ဟင်းတစ်ခွက်တောင်မှ အနိုင်နိုင်ဖြစ်လာတယ်လို့ ပြောပါတယ်။

“ငါးခြောက်ဟင်းတစ်ခွက် ၅၀၀ ရောင်းပေမယ့် မဝယ်တော့တဲ့အတွက် မရောင်းရပါဘူး။ အလုပ်မရှိကြတာကြောင့် လူတိုင်းက ငွေကို ချွေချွေတာတာနဲ့ စီစစ်ပြီး သုံးနေကြပါတယ်။ ဘာဖြစ်လာမလဲဆိုတာမသိဘဲ အကြောက်တရားနဲ့ ကျွန်မတို့ နေထိုင်နေရတာပါ”

ဒုက္ခရောက်နေ

ကလေးသုံးယောက်ဖခင် အသက် ၂၆ နှစ်အရွယ် ကိုဝင်းနိုင်က အရင် ဝက်သားဟင်းကို ပုံမှန်စားနေရတဲ့သူတို့ဟာ အခုတော့ ငါးပိရည်နဲ့တို့စရာ ပြောင်းစားနေရပြီလို့ ပြောပါတယ်။

အရင်က ချွေတာစားသောက်နေရသူတွေဟာ အခုအချိန်မှာ ထမင်းကို ဆားနဲ့စားနေရပြီလို့လည်း သူက ဆိုပါတယ်။

ကုန်စျေးနှုန်းမြင့်တက်မှုဟာ ဝေးလံခေါင်ဖျားတဲ့ဒေသတွေမှာ ပိုဆိုးပါတယ်။ တရုတ်နဲ့ကပ်နေတဲ့ ကချင်ပြည်နယ်မှာဆိုရင် ဆန်စျေးက ၅၀ ရာခိုင်နှုန်းလောက်အထိ ခုန်တက်သွားတယ်လို့ WFP က ပြောပါတယ်။

စစ်အာဏာသိမ်းပြီးနောက်ပိုင်း လောင်စာဆီစျေး ၃၀ ရာခိုင်နှုန်းလောက် မြင့်တက်သွားတာကြောင့် လယ်ယာလုပ်ငန်းတွေကနေ မြို့ကြီးတွေကို ကုန်စည်ပို့ရတဲ့ ကုန်ကျစားရိတ်ကလည်း တက်လာပါတယ်။

နောက်ထပ် ၆ လအတွင်း မြန်မာနိုင်ငံမှာ လူ ၃.၄ သန်းလောက် ငတ်မွတ်ခေါင်းပါးမှုနဲ့ ကြုံတွေ့ရနိုင်တယ်လို့ WFP က ခန့်မှန်းထားပြီး သူတို့ရဲ့ အကူအညီပေးမှုကို ၃ ဆအထိမြှင့်သွားဖို့လည်း ရှိနေပါတယ်။

စီးပွားရေးမြို့တော် ရန်ကုန်ရဲ့ အောက်ခြေလူ့အဖွဲ့အစည်းမှာ အစားအသောက် လှူဒါန်းမှုကို မှီခိုနေရသူအရေအတွက် များပြားလာပါတယ်။

“ကျွန်တော်တို့ အစားအစာတွေလှူရင် သူတို့ တော်တော်ပျော်ကြတယ်။ တစ်ချို့ဆို ငိုတောင်ငိုပါတယ်” လို့ စေတနာ့ဝန်ထမ်းလုပ်နေတဲ့ မေ(အမည်လွှဲ) က ပြောပါတယ်။

အသက် ၅၁ နှစ်အရွယ် ဒေါ်နီအေးက သူမနဲ့ အမျိုးသားတို့ဟာ လက်ရှိမှာ ဝင်ငွေလုံး၀မရှိဘဲ လာရောက်လှူဒါန်းတဲ့ အစားအသောက်တွေပေါ်မှာပဲ မှီခိုနေရတယ်လို့ ပြောပါတယ်။

“ဒုက္ခရောက်နေကြပြီး ဒီလိုသာဆက်သွားနေရင် ကျွန်မတို့ ငတ်တော့မှာ”

အသက် ၄၇ နှစ်အရွယ် ဦးအောင်ကျော်မိုးကတော့ သူအလုပ်လုပ်တဲ့စက်ရုံ ပိတ်လိုက်ရပြီးတဲ့နောက် ရွာပြန်ဖို့ စဉ်းစားနေပါတယ်။

စုထားဆောင်းထားတာ မရှိဘဲ၊ ကျူးကျော်အိမ်ယာမှာ သူနဲ့အတူနေထိုင်နေတဲ့ မိသားစုဝင် ၉ ဦးကို ဘယ်လိုထောက်ပံ့ရမလဲဆိုတာ မျှော်လင့်ချက်မဲ့နေတယ်လို့လည်း သူက ပြောပါတယ်။

“ကျွန်တော်တို့လုပ်နိုင်တာ ဘာမှမရှိပါဘူး”

Ref: AFP