အာဆီယံဥက္ကဌနှင့် အတွင်းရေးမှူးတို့ ယခုတစ်ပတ်အတွင်း မြန်မာနိုင်ငံသို့ လာရောက်ဖွယ်ရှိနေ

ဇွန် ၂၊ ၂၀၂၁
M-Media

-မြန်မာ့အရေးမှာ ကြားဝင်ဖြေရှင်းပေးနိုင်ဖို့အတွက် အာဆီယံ ဥက္ကဌနဲ့ အတွင်းရေးမှူးတို့ အခုတစ်ပတ်အတွင်း မြန်မာနိုင်ငံကို လာရောက်ဖို့ရှိတယ်လို့ အာဆီယံအသိုင်းအ၀ိုင်း သတင်းရင်းမြစ်တွေက ပြောပါတယ်။

အာဆီယံအဖွဲ့ဥက္ကဌ ဘရူနိုင်းနိုင်ငံရဲ့ ဒုတိယနိုင်ငံခြားရေးဝန်ကြီး အရီဝမ် ယူစွဖ်နဲ့ အာဆီယံအဖွဲ့ အတွင်းရေးမှူး ဘရူနိုင်းနိုင်ငံသား လင်ဂျော့ဟွေတို့ မြန်မာနိုင်ငံကို လာရောက်ကာ စစ်ကောင်စီအကြီးအကဲတွေ၊ မြန်မာ့နိုင်ငံရေးက သက်ဆိုင်သူတွေနဲ့ တွေ့ဆုံဖို့ ရှိနေတာ ဖြစ်ပါတယ်။

သံတမန်ရေးနဲ့ သွားရေးလာရေးအခက်အခဲတွေကြောင့် မြန်မာနိုင်ငံကို လာရောက်မယ့်အစီအစဉ် ပျက်ကောင်းပျက်နိုင်တယ်လို့လည်း သတင်းရင်းမြစ်တွေက ဆိုပါတယ်။

အာဆီယံ ဥက္ကဌနဲ့ အတွင်းရေးမှူးတို့ရဲ့ မြန်မာနိုင်ငံခရီးစဉ်မှာ စစ်ကောင်စီကို ဆန့်ကျင်တဲ့အဖွဲ့တွေနဲ့ တွေ့ဆုံဖို့ စီစဉ်ထားသလားဆိုတာ ရှင်းရှင်းလင်းလင်း မသိရပါဘူး။ စစ်ကောင်စီဟာ အတိုက်အခံ နိုင်ငံရေးသမားတွေကို ဖမ်းဆီးအကျဉ်းချထားသလို၊ တစ်ချို့တွေလည်း စစ်ကောင်စီရန်ကြောင့် ထွက်ပြေးတိမ်းရှောင်နေရတာ ဖြစ်ပါတယ်။

စစ်ကောင်စီနဲ့ အမျိုးသားညီညွတ်ရေးအစိုးရ (NUG) တို့က ဒီကိစ္စနဲ့ပတ်သက်ပြီး မှတ်ချက်ပေးတာမျိုး မရှိသေးပါဘူး။

ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်လာတဲ့ မတည်ငြိမ်မှုတွေကြောင့် ဧပြီလမှာ အာဆီယံထိပ်သီးအစည်းအဝေး လုပ်ခဲ့ပြီး သဘောတူညီချက် ၅ ခုကို ချမှတ်ခဲ့ပါတယ်။

အဲဒီအထဲမှာ အာဆီယံအဖွဲ့က ကိုယ်စားလှယ်တစ်ဦးခန့်ကာ မြန်မာ့အရေး ကြားဝင်ညှိနှိုင်းပေးဖို့ ပါဝင်ပေမယ့် စစ်ကောင်စီဖက်ယိမ်းတဲ့ ထိုင်း၊ ကမ္ဘောဒီယား၊ ဗီယက်နိမ်တို့နဲ့ ပြဿနာကို ကြားဝင်ရှင်းပေးချင်တဲ့ အင်ဒိုနီးရှား၊ စင်ကာပူ၊ မလေးရှားတို့အကြား သဘောထားကွဲလွဲနေတာကြောင့် ကိုယ်စားလှယ်မခန့်နိုင်သေးပါဘူး။

Ref: South China Morning Post