ဒုက္ခသည်များကို ကိုဗစ်ကာကွယ်ဆေးထိုးပေးရန် မလေးရှားစီစဉ်

ဇွန် ၂၁၊ ၂၀၂၁
M-Media

-နိုင်ငံအတွင်းက ဒုက္ခသည်လူ့အဖွဲ့အစည်းတွေကို တစ်ကြိမ်သာထိုးရတဲ့ CanSino ကိုဗစ်ကာကွယ်ဆေး ထိုးပေးမယ်လို့ မလေးရှားက ပြောကြားလိုက်ပါတယ်။

CanSino ကာကွယ်ဆေးကို ဇူလိုင်လနှောင်းပိုင်းမှာ ဖြန့်ဖြူးပေးနိုင်အောင် မလေးရှားအစိုးရက စီစဉ်နေတာ ဖြစ်ပါတယ်။

မလေးရှား ကိုဗစ်ကာကွယ်ဆေးစီမံကိန်းရဲ့ ညှိနှိုင်းဆွေးနွေးရေးဆိုင်ရာဝန်ကြီး ခိုင်ရီ ဂျမာလွတ်ဒင်က ဒုက္ခသည်လူ့အဖွဲ့အစည်းတွေအနေနဲ့ လွယ်လွယ်ကူကူ ထိုးနိုင်လိမ့်မယ်လို့ ပြောကြားခဲ့ပါတယ်။

“သူတို့နဲ့ ဆက်သွယ်ဆောင်ရွက်ရတာ ခက်ခဲတာကြောင့် တစ်ကြိမ်တည်းထိုးရတဲ့ ကာကွယ်ဆေးက ဒုက္ခသည်လူ့အဖွဲ့အစည်းတွေအတွက် ပိုမို လွယ်ကူစေမှာပါ”

နေထိုင်ခွင့် စာရွက်စာတမ်းမရှိတာကြောင့် ကိုဗစ်ကာကွယ်ဆေး လာမထိုးတာမျိုး အဖြစ်ခံလို့မရဘူးလို့လည်း ခိုင်ရီက ထည့်သွင်းပြောဆိုခဲ့ပါတယ်။

“စာရွက်စာတမ်း ရှိလား၊ မရှိဘူးလားဆိုတဲ့ကိစ္စက နောက်ပိုင်း ဖြေရှင်းလို့ရတယ်ဗျ။ ကာကွယ်ဆေးထိုးဖို့က ပိုပြီးအရေးကြီးပါတယ်”

မလေးရှားဟာ နိုင်ငံခြားသားတွေအပါအဝင် တစ်နိုင်ငံလုံးမှာရှိနေတဲ့သူတွေ ကာကွယ်ဆေးထိုးပေးရေးစီမံကိန်းကို ဖေဖော်ဝါရီလမှာ စတင်ခဲ့တာ ဖြစ်ပါတယ်။

ချင်း၊ ကရင်နဲ့ ရိုဟင်ဂျာတို့အပါအဝင် မြန်မာနိုင်ငံမှာ စစ်အာဏာရှင်အဆက်ဆက် ဖိနှိပ်ညှင်းပမ်းမှုကြောင့် ထွက်ပြေးလာရတဲ့ ဒုက္ခသည်အများအပြား မလေးရှားမှာ ရှိနေပါတယ်။

Ref: The Star