ယူအေအီးစီးပွားရေး၏ ၇၀ ရာခိုင်နှုန်း ရေနံကို မမှီခိုရတော့

ဇွန် ၂၇၊ ၂၀၂၁
M-Media

-နိုင်ငံရဲ့ကုန်သွယ်ရေး တိုး​မြှင့်ဖို့အတွက် နိုင်ငံတကာစျေးကွက် ၂၅ ခုမှာ ထပ်မံဝင်ရောက် ရင်းနှီးမြှုပ်နှံသွားမယ်လို့ အာရပ်စော်ဘွားများပြည်ထောင်စု (ယူအေအီး) က ဒီကနေ့မှာ ကြေငြာလိုက်ပါတယ်။

တိုင်းပြည်ရဲ့ ကုန်သွယ်ရေးအောင်မြင်မှု၊ ရှေ့ဆက်သွားမယ့် စီမံကိန်းတွေကို ယူအေအီး ဒုတိယသမ္မတ ရှိခ် မိုဟာမက် ဘင် ရာရှစ် အလ် မက်ခ်တွန်က Twitter စာမျက်နှာမှာရေးသားစဉ် ဒီလို ပြောကြားလိုက်တာပါ။

ယူအေအီးရဲ့ ရေနံမဟုတ်တဲ့ ကုန်သွယ်မှုတန်ဖိုးဟာ တစ်နှစ်ကို ဒီရ်ဟမ် ၁.၅ ထရီလီယံ ရှိနေပြီး ကမ္ဘာ့မြို့ကြီးပေါင်း ၄၀၀ လောက်ကို ဖြန့်ကျက်ထားနိုင်ပါတယ်။

ဒူဘိုင်းဟာ ကမ္ဘာ့ကုန်သွယ်ရေး ယှဉ်ပြိုင်မှုအရှိဆုံး နိုင်ငံ ၂၀ ထဲမှာ ပါဝင်နေတယ်လို့လည်း အလ် မက်ခ်တွန်က ထည့်သွင်းရေးသားခဲ့ပါတယ်။

ယူအေအီးစီးပွားရေးရဲ့ ၇၀ ရာခိုင်နှုန်းကျော်ဟာ ရေနံနဲ့မသက်ဆိုင်တဲ့ စီးပွားရေး​ ဖြစ်နေပြီး နိုင်ငံခြား တင်ပို့မှုကို လာမယ့်နှစ်အနည်းငယ်အတွင်း ၅၀ ရာခိုင်နှုန်းအထိ မြင့်တက်အောင် ဆောင်ရွက်သွားမယ်လို့လည်း သူက ဆိုပါတယ်။

“ကျွန်တော်တို့စီးပွားရေး နောက်ထပ် အမြင့်ဆုံးကို ရောက်ဖို့အတွက် ပြည်ထောင်စုအဆင့်မှာရော ဒေသတွင်းအဆင့်မှာပါ စည်းစည်းလုံးလုံးနဲ့ ဆောင်ရွက်နေပါတယ်။ အလ္လာဟ်အရှင်မြတ်အလိုရှိမယ်ဆိုရင် လာမယ့် ၁၀ စုနှစ်တွေအထိ ကမ္ဘာ့စီးပွားရေး အချက်အခြာအဖြစ် ကျွန်တော်တို့ ဆက်လက်တည်ရှိနေမှာပါ”

နိုင်ငံရဲ့ သုတေသနနဲ့ ဖွံ့ဖြိုးရေးလုပ်ငန်းမှာ ယူအေအီးက GDP ၁.၃ ရာခိုင်နှုန်းအထိသုံးစွဲထားပြီး ဒါဟာ အာရပ်နိုင်ငံတွေထဲမှာ အမြင့်ဆုံး သုံးစွဲမှုပါ။

“ကျွန်တော်တို့ရဲ့ အနာဂတ်ရည်မှန်းချက်က ကမ္ဘာကြီးနဲ့ ယှဉ်ပြိုင်ဖို့ပါ။ သုတေသနနဲ့ ဖွံ့ဖြိုးရေးစီမံကိန်းဟာ ကျွန်တော်တို့ အားကောင်းစေချင်တဲ့ ဉာဏစီးပွားရေးကို အဓိက မောင်းနှင်ပေးတာဖြစ်ပါတယ်”

အရေးပေါ်ကူညီကာယ်ဆယ်ရေး၊ ကျန်းမာရေးစောင့်ရှောက်မှု၊ ပညာရေးနဲ့ အခြားစီးပွားရေးကဏ္ဍတွေမှာပါ ဖွံဖြိုးတိုးတက်လာအောင် အစိုးရက စီမံကိန်းသစ်တွေ ချမှတ်ဆောင်ရွက်​နေတယ်လို့လည်း ယူအေအီး ဒုတိယသမ္မတက ထည့်သွင်းပြောကြားခဲ့ပါတယ်။

Ref: Khaleej Times