ဆက်သွယ်ရေးကုမ္ပဏီအကြီးအကဲများ တိုင်းပြည်မှ မထွက်ခွာရန် စစ်ကောင်စီက လျှို့ဝှက် အမိန့်ထုတ်ထား

ဇူလိုင် ၅၊ ၂၀၂၁
M-Media

-နိုင်ငံအတွင်းမှာရှိတဲ့ အဓိက ဆက်သွယ်ရေးလုပ်ငန်းတွေက နိုင်ငံခြားသား အကြီးအကဲတွေကို တိုင်းပြည်ကနေ အခွင့်မရှိဘဲ မထွက်ခွာရဘူးလို့ အာဏာသိမ်းစစ်ကောင်းစီက အမိန့်ထုတ်ထားကြောင်း ဒီကိစ္စနဲ့ နီးစပ်သူတွေက ရိုက်တာသတင်းဌာနကို ပြောကြားလိုက်ပါတယ်။

စစ်ကောင်စီလက်အောက်မှာရှိတဲ့ စာတိုက်နဲ့ ​ဆက်သွယ်ရေးဌာနက ဇွန်လအလယ်ပိုင်းမှာထုတ်ပြန်ခဲ့တဲ့ လျှို့ဝှက်အမိန့်မှာ ဆက်သွယ်ရေးကုမ္ပဏီတွေက နိုင်ငံသားနဲ့ နိုင်ငံခြားသား အကြီးတန်းအမှုဆောင်အရာရှိတွေ တိုင်းပြည်ကနေ ထွက်ခွာချင်ရင် အထူးခွင့်ပြုချက် တောင်းရမယ်လို့ ဖော်ပြထားပါတယ်။

တစ်ပတ်အကြာမှာ စစ်ကောင်စီက နောက်ထပ်စာတစ်​စောင် ထပ်ထုတ်ခဲ့ပြီး ဆက်သွယ်ရေးဆိုင်ရာ ကြားဖြတ်ထောက်လှမ်းတဲ့ ကိရိယာတွေကို ဇူလိုင်လ ၅ ရက်နေ့ နောက်ဆုံးထားပြီး တပ်ဆင်ဖို့ အမိန့်ပေးထားပါတယ်။ အဲဒီကိရိယာတွေဟာ ပြည်သူတွေရဲ့ ဖုန်းခေါ်ဆိုမှုတွေ၊ စာတိုပေးပို့မှုတွေနဲ့ အင်တာနက် အသုံးပြုမှုတွေကို စစ်ကောင်စီက တိုက်ရိုက် ကြားဖြတ်ဖမ်းယူနိုင်တဲ့ ကိရိယာတွေ ဖြစ်ပါတယ်။

ပြည်သူတွေရဲ့ ဆက်သွယ်ပြောဆိုမှုတွေကို ကြားဖြတ် ကြည့်ရှုနားထောင်နိုင်မယ့် နည်းပညာကို တပ်ဆင်အသုံးပြုဖို့ အာဏာသိမ်းစစ်ကောင်စီဟာ အရင်ကတည်းက ဆက်သွယ်ရေးကုမ္ပဏီတွေကို ဖိအားပေးခဲ့တာပါ။

ဒီကိစ္စနဲ့ပတ်သက်ပြီး ရိုက်တာသတင်းဌာနက မေးမြန်းမှုကို စစ်ကောင်စီဖက်က ဖြေကြားခဲ့ခြင်း မရှိပါဘူး။

စစ်ကောင်စီဟာ ပြည်သူတွေရဲ့ ဆက်သွယ်ပြောဆိုမှုတွေကို ထိန်းချုပ်နိုင်မယ့် ဆိုက်ဘာဥပဒေတစ်ခုကို ပြဌာန်းဖို့ အာဏာသိမ်းပြီးကတည်းက လုပ်ဆောင်ခဲ့တာဖြစ်ပါတယ်။

နောက်ပိုင်းမှာ ကြားဖြတ်ဖမ်းယူနိုင်မယ့် နည်းပညာတွေ၊ ကိရိယာတွေ တပ်ဆင်ဖို့ ဆက်သွယ်ရေးကုမ္ပဏီတွေကို ဖိအားပေးလာပြီး ကုမ္ပဏီအမှုဆောင်တွေကို ပြည်ပထွက်ခွင့်ပိတ်ထားတယ်ဆိုတဲ့ အခုသတင်းက စစ်ကောင်စီဟာ ပြည်သူတွေရဲ့ ဆက်သွယ်ပြောဆိုမှုကို အပြင်းထန်ဆုံး ဖိနှိပ်ကန့်သတ်ဖို့ စိတ်ပိုင်းဖြတ် လုပ်ဆောင်နေတယ်ဆိုတာ ထင်ရှားနေပါတယ်။

ဆက်သွယ်ရေးကုမ္ပဏီ ၃ ခုက အမည်မဖော်လိုသူတွေကတော့ စစ်ကာင်စီဟာ ပြည်သူတွေရဲ့ ဆက်သွယ်ပြောဆိုမှုတွေကို ကြားဖြတ် ကြည့်ရှုနားထောင်ဖို့ သူတို့ကို ဖိအားပိုပေးလာတယ်လို့ ရိုက်တာသတင်းဌာနကို ပြောကြားခဲ့ပါတယ်။ အခြား သတင်းရင်းမြစ်နှစ်ခုကလည်း ဒီကိစ္စကို အပြင်ထုတ်မပြောဖို့ စစ်ကောင်စီက ဆက်သွယ်ရေးကုမ္ပဏီတွေကို အကြိမ်ကြိသတိပေးထားတယ်လို့ ဆိုပါတယ်။

Telenor က ရိုက်တာသတင်းဌာနရဲ့ မေးမြန်းမှုကို ဖြေကြားဖို့ ငြင်းဆိုခဲ့ပြီး Ooredoo၊ MPT နဲ့ MyTel တို့က ဖြေကြားမှု မလုပ်သေးပါဘူး။

စစ်တပ်က ပြည်သူတွေရဲ့ ဆက်သွယ်မှုကို ကြားဖြတ် ကြည့်ရှုနားထောင်ရေး နည်းပညာတွေ၊ စက်ကိရိယာတွေ တပ်ဆင်ဖို့ စစ်အာဏာမသိမ်းခင် လတော်တော်ကြာအရင်ကတည်းက ဆက်သွယ်ရေးကုမ္ပဏီတွေကို အမိန့်ပေးထားတာပါ။

Telenor နဲ့ Ooredoo တို့က အပြည့်အ၀ တပ်ဆင်ထားခြင်းမရှိသေးဘူးလို့ ရိုက်တာသတင်းဌာနက ဆိုပါတယ်။

Ref: Reuters