ဇူလိုင် ၃၊ ၂၀၂၁
M-Media

-မြန်မာနိုင်ငံက ဗိုလ်ချုပ်မှူးကြီးမင်းအောင်လှိုင် ဦးဆောင်တဲ့ စစ်အာဏာရှင်စနစ်သစ် အသက်ဆက်ရေးမှာ ရုရှားဟာ အဓိကထောက်တိုင်တစ်ခု ဖြစ်လာဖွယ် ရှိနေပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း ရုရှားဟာ စစ်ကောင်စီကို တရား၀င် လူသိရှင်ကြား အသိအမှတ်ပြုထားပြီး မတ်လ ၂၇ ရက်နေ့ တပ်မတော်နေ့အခမ်းအနားကို ရုရှား ဒုတိယကာကွယ်ရေးဝန်ကြီး အလက်ဇန်းဒါး ဗာစီလ်ယီဗစ် တက်ရောက်ခဲ့ပါတယ်။

စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကလည်း အာဏာသိမ်းပြီး သူ့ရဲ့ ဒုတိယမြောက် နိုင်ငံခြားခရီးစဉ်အဖြစ် ဇွန်လအတွင်း ရုရှားနိုင်ငံကို သွားရောက်ခဲ့ပါတယ်။

“ကျွန်တော်တို့နှစ်နိုင်ငံအကြား တည်ဆောက်ထားတဲ့ အပြန်အလှန်နားလည်မှု၊ လေးစားမှု၊ ယုံကြည်မှုတွေကို အခြေခံပြီး နှစ်နိုင်ငံဆက်ဆံရေးကို ပိုမိုခိုင်မာအောင် ဆောင်ရွက်သွားဖို့ စိတ်ပိုင်းဖြတ်ထားပါတယ်” လို့ ဗိုလ်ချုပ်မှူးကြီးမင်းအောင်လှိုင်နဲ့ တွေ့ဆုံမှုအတွင်း ရုရှားကာကွယ်ရေးဝန်ကြီး ဆာဂျီရှိုဂူက ပြောကြားခဲ့ပါတယ်။

အခုတွေ့ဆုံမှုကို အလေးထားပြီး အရှေ့တောင်အာရှမှာ မြန်မာနိုင်ငံဟာ စိတ်ချ၊ ယုံ​ကြည်ရတဲ့ မဟာဗျူဟာမြောက်နိုင်ငံ ဖြစ်တယ်လို့လည်း ဆာဂျီရှိုဂူက ဆိုပါတယ်။

စစ်အာဏာသိမ်မှုနောက်ဆက်တွဲအဖြစ် အနောက်နိုင်ငံတွေက စစ်ခေါင်းဆောင်တွေအပေါ် လက်နက်ရောင်းချမှု၊ စီးပွားရေးပိတ်ဆို့မှုတွေ ဆောင်ရွက်နေတဲ့အချိန် ရုရှားကတော့ စစ်ကောင်စီနဲ့ ဆက်ဆံရေး ပိုမိုကောင်းမွန်အောင် ဆောင်ရွက်နေပါတယ်။

ရုရှားဟာ အရင်ကတည်းက မြန်မာစစ်အာဏာရှင်တွေကို ထောက်ပံ့ပေးခဲ့တာပါ။ ၁၉၉၉ ခုနှစ်ကနေ ၂၀၁၈ နှစ်အတွင်း မြန်မာစစ်တပ်က ကန်ဒေါ်လာ ၁.၅ ဘီလီယံဖိုး စစ်လက်နက်ပစ္စည်း ဝယ်ယူရာမှာ ၃၉ ရာခိုင်နှုန်းက ရုရှားထံက ဖြစ်ပါတယ်။ အဲဒီအထဲမှာ စက်သေနတ်ပါ တိုက်ပွဲဝင်ရဟတ်ယာဉ် Hind Mi-35၊ ပို့ဆောင်ရေး ရဟတ်ယာဉ်တွေ၊ MiG-29 တိုက်လေယာဉ်၊ Yak-130 မြေပြင်တိုက်ခိုက်ရေးသုံး လေယာဉ်တွေ ပါဝင်ပါတယ်။

မြန်မာ့အရေးကျွမ်းကျင်သူ ဂျာနယ်လစ် ဘာတေးလစ်တနာက မြန်မာစစ်ခေါင်းဆောင်တွေဟာ စစ်လက်နက်ပစ္စည်းမှာ တရုတ်နိုင်ငံအပေါ် မှီခိုရမှုကို လျှော့ချလိုတဲ့အတွက် ၂၀၀၀ ပြည့်နှစ်တွေကတည်းက ရုရှားနဲ့ ဆက်ဆံရေး တိုးမြှင့်ဆောင်ရွက်လာတယ်လို့ ထောက်ပြခဲ့ပါတယ်။

ရုရှားနိုင်ငံပိုင် စစ်လေယာဉ်ထုတ်လုပ်ရေးလုပ်ငန်း United Aircraft Corporation ဟာ မြန်မာနိုင်ငံမှာ ၂၀၀၆ ခုနှစ်ကတည်းက ရုံးခန်းဖွင့်ထားတာပါ။

ရုရှားဟာ ပြီးခဲ့တဲ့နှစ်တွေအတွင်း ထောင်နဲ့ချီတဲ့ မြန်မာစစ်သားတွေကို ပညာသင်ခေါ်တာ၊ လေ့ကျင့်သင်ကြားပေးတာတွေလည်း လုပ်ခဲ့ပါတယ်။

နိုင်ငံရေးကျွမ်းကျင်သူတွေကတော့ လက်ရှိ မြန်မာစစ်ခေါင်းဆောင်သစ်နဲ့ ဆက်ဆံရေး ပိုမိုတိုးမြှင့်ဖို့ ရုရှားရဲ့ ဆောင်ရွက်မှုဟာ လက်နက်ရောင်းချမှု၊ စစ်သားတွေကို လေ့ကျင့်ပေးမှုကနေ အကျိုးအမြတ်ရဖို့ထက် ပိုတယ်လို့ သုံးသပ်ပါတယ်။

“နိုင်ငံ​ရေးပြဿနာကို ငြိမ်းငြိမ်းချမ်းချမ်းနဲ့ ဒီမိုကရေစီနည်းလမ်းအတိုင်း အဖြေထုတ်ဖို့ အနောက်နိုင်ငံတွေရဲ့ ကြိုးပမ်းမှုကို ရုရှားက ဆက်လက်နှောက်ယှက်နိုင်ရေး သမ္မတ ဗလာဒီမီရ်ပူတင်ရဲ့ ပထ၀ီနိုင်ငံရေး ရည်မှန်းချက်နဲ့ မြန်မာအခြေအနေက ကိုက်ညီနေတယ်လို့ ကျွန်တော်ထင်ပါတယ်” လို့ ဩစတေးလျအခြေစိုက် ပညာရှင် ဟန်တာ မာ့စ်တန်က ပြောပါတယ်။

အရင် ဆိုဗီယက်ပြည်ထောင်စုခေတ်မှာ ဗီယက်နမ်၊ လာအို၊ ကမ္ဘောဒီယားတို့က ကွန်မြူနစ်အာဏာရှင်တွေနဲ့ နီးကပ်တဲ့ ဆက်ဆံရေးရှိခဲ့ပါတယ်။ ဆိုဗီယက်ပြည်ထောင်စု ပြိုကွဲသွားပြီးနောက် အရှေ့တောင်အာရှက ရုရှားဩဇာလည်း ပျောက်ကွယ်သွားပါတယ်။

သမ္မတ ဗလာဒီမီရ် ပူတင်ရဲ့ လက်ထက်မှာတော့ လက်နက်တွေရောင်းကာ အရှေ့တောင်အာရှမှာ ဩဇာပြန်ထူထောင်ဖို့ ကြိုးစားလာပြီး မြန်မာစစ်ခေါင်းဆောင်သစ်က အခွင့်အလမ်းကောင်းတစ်ခုလို့ မှတ်ယူထားဖွယ် ရှိနေပါတယ်။

ရုရှားဟာ အရှေ့တောင်အာရှမှာ ထိုင်း၊ ဗီယက်နမ်၊ လာအို၊ မလေးရှားနဲ့ အင်ဒိုနီးရှားတို့ကို စစ်လက်နက်တွေ၊ တိုက်လေယာဉ်တွေရောင်းချပြီး ပါဝါချိန်ခွင်လျှာကို ညှိထားပါတယ်။

ဖေဖော်ဝါရီ ၁ ရက်နေ့ အာဏာမသိမ်းခင် ၁ ရက်အလိုက ရန်ကုန်မှာ ဗိုလ်ချုပ်မှူးကြီးမင်းအောင်လှိုင်ရဲ့ သားသမီးတွေ အကျိုးအမြတ်ပါတဲ့ အဆင့်မြင့် စစ်ဖက် မီဒီယာအဆောက်အဦးဖွင့်ပွဲမှာ ရုရှားနဲ့ မြန်မာ စစ်ဖက်အရာရှိတွေ ပါတီပွဲလုပ် အောင်ပွဲခံခဲ့ကြပါတယ်။

မြန်မာ့အရေးကျွမ်းကျင်သူ ဘာတေးလစ်တနာကတော့ စစ်အာဏာရှင်သစ်လက်ထက် မြန်မာနဲ့ ရုရှားတို့ရဲ့ မဟာဗျူဟာမြောက် ဆက်ဆံရေး ခေတ်သစ်တစ်ခု ထူထောင်လိုက်တာဟာ အင်အားတောင့်တင်းလားတဲ့ ရုရှား အရှေ့တောင်အာရှမှာ ခြေကုပ်ယူတာ၊ မြန်မာဟာ သူ့ရဲ့ မဟာဗျူဟာမြောက် ဝင်ပေါက်ထွက်ပေါက်ဖြစ်တယ်ဆိုတာ ပွင့်ပွင့်လင်းလင်း ပြသလိုက်တာလို့ သုံးသပ်ပါတယ်။
Ref: Asia Times