စစ်ကောင်စီ၏ ဒုက္ခပေးမှုကြောင့် မြေအောက်ရောက်သွားသည့် ကိုဗစ်ပရဟိတသမားများ

ဇူလိုင် ၂၀၊ ၂၀၂၁
M-Media

-ဒုတိယမြို့တော် မန္တလေးက ကိုဗစ်ဖြစ်နေသူတွေရဲ့အိမ်ကနေ အောက်ဆီဂျင်အိုးတွေ ပြန်သိမ်းဖို့အတွက် အသက် ၂၁ နှစ်အရွယ်ကျောင်းသား ဖိုးသားတစ်ယောက် အရုဏ်တက်ကတည်းက အိမ်ကထွက်ပြီး ကူညီပေးနေတာ တစ်ပတ်လောက် ရှိနေပါပြီ။

သူနဲ့ သူရဲ့လုပ်ဖော်ကိုင်ဖက်တွေဟာ ပရဟိတစင်တာတွေမှာ လိုင်းစီပြီး အောက်ဆီဂျင်ဖြည့်တာ၊ ပြန်ပို့တာတွေ စေတနာ့ဝန်ထမ်း လုပ်ပေးနေကြတာပါ။ ဖေဖော်ဝါရီ ၁ ရက် အာဏာသိမ်းပြီးနောက်ပိုင်း ကျန်းမာရေးစနစ် ပြိုလဲသွားပြီး၊ လတ်တလော ကိုဗစ်ကူးစက်မှု မြင့်တက်လာတာကို ရင်ဆိုင်နေရတဲ့ မြန်မာနိုင်ငံမှာ လူ့အသက်တွေကို ကယ်တင်ဖို့ သူတို့ ကြိုးစားနေကြတာ ဖြစ်ပါတယ်။

ဆိုရှယ်မီဒီယာက အလှူရှင်တွေရဲ့ ငွေကြေးထောက်ပံ့ ကူညီမှုနဲ့ အောက်ခြေလူထုမှာ ကိုဗစ်ကပ်ရောကို ကိုယ်ထူကိုယ်ထ တုန့်ပြန်တိုက်ဖျက်မှု မြင့်တက်လာပြီး အဲဒီအထဲမှာ ဖိုးသားနဲ့ သူ့ရဲ့အဖွဲ့လည်း ပါဝင်ပါတယ်။ ဒါဟာ ပြီးခဲ့တဲ့ ၁၀ စုနှစ်တွေအတွင်း စစ်အာဏာရှင်လက်အောက်မှာ ကြုံတွေ့ခဲ့ရတဲ့ ကပ်ဘေးတွေကို ပြည်သူတွေ ကိုယ်ထူကိုယ် ရင်ဆိုင်ဖြတ်ကျော်ခဲ့ရတဲ့ အခြေအနေကို ပြန်လည်ထင်ဟပ်နေတာပဲ ဖြစ်ပါတယ်။

“အောက်ဆီဂျင်လိုအပ်တဲ့သူအရေအတွက် တော်တော်ကိုများလာတာက ကျွန်တော်တို့အတွက် ကြီးမားတဲ့ စိန်ခေါ်မှုပါ” လို့ ဖိုးသားက ရိုက်တာသတင်းဌာနကို ပြောပါတယ်။

စစ်ကောင်စီ ကျန်းမာရေးဝန်ကြီးဌာနရဲ့ စာရင်းကတော့ ဇူလိုင်လ ၁၇ ရက်နေ့မှာ ကိုဗစ်ကြောင့်သေဆုံးသူ ၂၃၃ ဦးရှိခဲ့ပြီး၊ ၁၈ ရက်နေ့မှာ ၂၃၁ ဦး ရှိတယ်လို့ ဆိုပါတယ်။ ဆရာဝန်တွေနဲ့ နာရေးကူညီမှုအဖွဲ့တွေက အမှန်တကယ် သေဆုံးသူဟာ ဒီအရေအတွက်ထက် ပိုမိုများပြားပြီး သုဿန်တွေမှာ အလောင်းတွေ ပုံနေတယ်လို့ ပြောပါတယ်။

မြန်မာနိုင်ငံမှာ ပုံပြောင်းကိုဗစ် Delta ဗိုင်းရပ်စ် ပြန့်နှံ့နေတဲ့အချိန် အခုလအတွင်း သေဆုံးသူအရေအတွက်ဟာ ၄၀ ရာခိုင်နှုန်း ကျော်လာပြီး ၄၇၆၉ ဦး ရှိနေပါတယ်။ Delta ဗိုင်းရပ်စ်ဟာ အရှေ့တောင်အာရှက အခြားနိုင်ငံတွေမှာလည်း ပြန့်နှံ့ကူးစက်နေပါတယ်။

အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ကိုရိုနာဗိုင်းရပ်စ် အရေးပေါ်အ​ခြေအနေမှာ တစ်နိုင်ငံလုံး ပူးပေါင်းဆောင်ရွက်ဖို့ တနင်္ဂနွေနေ့ နိုင်ငံပိုင်ရုပ်သံကမိန့်ခွန်းမှာ စေတနာ့ဝန်ထမ်းတွေကို မေတ္တာရပ်ခံခဲ့ပါတယ်။

“ခြိမ်းခြောက်မှုတွေရှိတာကြောင့် တစ်ချို့လူတွေ စေတနာ့ဝန်ထမ်းတောင် မလုပ်ရဲကြပါဘူး။ အခြားအကြောင်းအရင်းတွေ၊ အခက်အခဲတွေကြောင့် ဝင်မလုပ်ချင်ကြသူတွေလည်း ရှိပါတယ်။ အရင်ကပြောခဲ့သလိုပဲ သူတို့ကို ကျွန်တော် ကြိုဆိုပါတယ်။ ပူးပေါင်းဆောင်ရွက်မှု လိုအပ်ပါတယ်” လို့ စစ်ခေါင်းဆောင်က ပြောကြားခဲ့ပါတယ်။

စစ်ကောင်စီကျန်းမာရေးဝန်ကြီး ဦးသက်ခိုင်ဝင်းက အောက်ဆီဂျင် ပိုမိုထောက်ပံ့ပေးနိုင်ရေးအပါအဝင် ကိုဗစ်တိုက်ဖျက်ရေး အရှိန်အဟုန်မြင့်ဆောင်ရွက်ဖို့ စနေနေ့မှာ အစည်းအဝေး ကျင်းပခဲ့တယ်လို့ နိုင်ငံပိုင် Global New Light of Myanmar သတင်းစာမှာ ဖော်ပြထားပါတယ်။

မလိုအပ်ဘဲ ဝယ်ယူသိုလှောင်နေကြတာကို တားဆီးဟန့်တားဖို့ဆိုတဲ့ ခေါင်းစဉ်နဲ့ ပုဂ္ဂလိက အောက်ဆီဂျင်စက်ရုံတွေကို ပိတ်ပင်တာအပါအဝင် စစ်ကောင်စီက ကန့်သတ်မှုတွေလုပ်ဆောင်နေတာကြောင့် လူ့အသက်တွေ သေကြေပျက်ဆီးနေကြတယ်လို့ ဝေဖန်သူတွေက ပြောပါတယ်။

အရင်ကတည်းက ဒေသတွင်းမှာ အားအနည်းဆုံးဖြစ်တဲ့ မြန်မာနိုင်ငံရဲ့ ကျန်းမာရေးစောင့်ရှောက်မှုစနစ်ဟာ စစ်အာဏာသိမ်းပြီးနောက် ပေါ်လာတဲ့ အာဏာဖီဆန်ရေးလှုပ်ရှားမှု CDM မှာ ကျန်းမာရေးဝန်ထမ်းတွေ ပါဝင်မှုကြောင့် ပိုမိုဆိုးရွားလာတယ်။ ကိုဗစ်ကာကွယ်ဆေးထိုးမှု၊ စမ်းသပ်စစ်ဆေးမှုနဲ့ ကာကွယ်တားဆီးရေးလုပ်ငန်းတွေအားလုံးလည်း ရပ်ဆိုင်းသွားခဲ့ပါတယ်။

မကြာသေးခင်က ဆိုရှယ်မီဒီယာကနေတစ်ဆင့် အကူအညီပေးနေပြီး နောက်ပိုင်း မြေအောက်ရောက်သွားတဲ့ ဆရာဝန်တစ်ဦးက အကူအညီတောင်းခံမှု ရာနဲ့ချီ ရခဲ့တယ်လို့ ပြောပါတယ်။ အိမ်တစ်အိမ်ကို ဖုန်းခေါ်ဆိုတဲ့အခါ အိမ်သားအားလုံးနီးပါး ကိုဗစ်လက္ခဏာရှိနေပြီး အများစုက အောက်ဆီဂျင်ကျနေတာကို တွေ့ရတယ်လို့ ပြောပါတယ်။

“အခြေအနေက တော်တော်ဆိုးပါတယ်။ ဆေးရုံက သူတို့အတွက် ဘာမှမလုပ်ပေးနိုင်ပါဘူး။ လူနာတွေ အကူအညီမဲ့နေတာကို ကျွန်တော် ထိုင်ပြီး ကြည့်မနေနိုင်တော့ပါဘူး” လို့ ပန်းချီဆိုတဲ့အမည်နဲ့ ကူညီပေးနေတဲ့ ဆရာဝန်က ပြောပါတယ်။

ဒေါ်အောင်ဆန်းစုကြည်အစိုးရလက်ထက် အရင်ကိုဗစ်လှိုင်းနှစ်ခုတုန်းက အခြေအနေကို တော်တော်လေးထိန်းချုပ်နိုင်ခဲ့ပေမယ့် အခုတော့ အဲဒီလိုမဟုတ်တော့ဘူးလို့ သူက ဆိုပါတယ်။ ဒေါ်အောင်ဆန်းစုကြည်တစ်ယောက် ဖြုတ်ချခံလိုက်ရပြီး ပုဒ်မအများအပြားနဲ့ တရားစွဲဆို ခံထားရတာပါ။

ဒေါ်အောင်ဆန်းစုကြည်အစိုးရလက်ထက်မှာ စေတနာ့ဝန်ထမ်းတွေရဲ့ အကူအညီတွေ ရခဲ့ပြီး ကွာရန်တင်းစင်တာတွေ၊ ကိုဗစ်စစ်ဆေးမှုစင်တာတွေမှာ ကူညီပေးခဲ့ကြသလို အစိုးရဆေးရုံတွေက ဝန်ထုပ်ဝန်ပိုးတွေကို ကူညီဖြေရှင်းပေးခဲ့ကြပါတယ်။

ပြီးခဲ့တဲ့နှစ်ရွေးကောက်ပွဲမှာ NLD က မဲမသမာမှုလုပ်တယ်လို့ စွပ်စွဲအာဏာသိမ်း တက်လာကာ နေ့စဉ်နဲ့အမျှ ဆန္ဒပြမှုတွေ ရင်ဆိုင်နေရတဲ့ စစ်အာဏာရှင်အစိုးရလက်အောက်မှာတော့ စေတနာ့ဝန်ထမ်းတွေ ထွက်မလာတော့ပါဘူး။

ကိုဗစ်ပထမလှိုင်းနဲ့ ဒုတိယလှိုင်းမှာ ပါဝင်ကူညီပေးခဲ့ကြတဲ့ စေတနာ့ဝန်ထမ်း အများစုဟာ အခုတစ်ခေါက် ပေါ်မလာတော့ဘူးလို့ ဖိုးသားက ပြောပါတယ်။

အဲဒီအစား သူတို့လို အဖွဲ့အစည်းတွေဟာ ကိုယ်ထူကိုယ်ထ ကူညီပေးနေကြပြီး၊ ၂၀၀၈ ခုနှစ် နာဂစ်မုန်တိုင်းကာလ အစိုးရက ကူညီကယ်ဆယ်မှုတွေ မလုပ်ပေးတဲ့အတွက် ကိုယ်ထူကိုယ်ထ ရင်ဆိုင်ဖြေရှင်းခဲ့ရသလိုမျိုး အရင် စစ်အာဏာရှင်တွေလက်ထက် ဘေးအန္တရာယ်တွေ ကြုံတွေ့တဲ့အချိန် ပြည်သူအချင်းချင်း ဖေးမကူညီခဲ့ရတဲ့ ပုံစံအတိုင်းပါပဲ။

ရန်ကုန်မြို့က သူငယ်ချင်းတွေဖွဲ့ထားတဲ့ အဖွဲ့တစ်ခုက အိမ်နီးချင်း ထိုင်းနိုင်ငံကနေ အောက်ဆီဂျင်အိုးတွေ တင်သွင်းဖို့ ကြိုးစားနေတယ်လို့ ရိုက်တာသတင်းဌာနကို ပြောကြားခဲ့ပါတယ်။

နိုင်ငံအနောက်ပိုင်း စစ်ကိုင်းတိုင်းဒေသကြီး ကောလင်းမြို့ခံတွေဟာ တရုတ်နိုင်ငံကနေ အောက်ဆီဂျင်စက် ဝယ်ယူတင်သွင်းဖို့အတွက် အလှုငွေကောက်ခံနေတာ ကန်ဒေါ်လာ ၃ သောင်းလောက် ရရှိနေပါပြီ။

“အခု ကိုဗစ် တတိယလှိုင်းမှာ ကျွန်တော်တို့ ထိခိုက်ခံစားနေရပါတယ်။ နောက်ထပ် လှိုင်းဘယ်နှစ်ခု လာမလဲဆိုတာ ကျွန်တော်တို့ မသိပါဘူး။ ​ကျွန်တော်တို့မှာ အစိုးရ မရှိတော့သလိုမျိုး လုပ်ကိုင်ဆောင်ရွက်နေရတာပါ” လို့ အလှုငွေကောက်ခံသူတွေထဲက တစ်ဦးဖြစ်သူက ရိုက်တာသတင်းဌာနကို ပြောကြားခဲ့ပါတယ်။

စစ်ကောင်စီရဲ့ ဒုက္ခပေးမှု ခံရမှာကို စိုးရိမ်တဲ့အတွက် အမည်ကို သူက ဖွင့်ဟပြောဆိုခြင်း မရှိပါဘူး။

Ref: Reuters

(ရိုက်တာသတင်းဌာနတွင် ဖော်ပြထားသည့် ဆောင်းပါးကို ဆီလျော်အောင် ဘာသာပြန်ဆိုပါသည်)