ကိုဗစ်ကြောင့် အိန္ဒိယတွင် အမှန်တကယ်သေဆုံးသူ ၄ သန်းကျော်နိုင်ဟု ပညာရှင်များ သုံးသပ်

ဇူလိုင် ၂၁၊ ၂၀၂၁

M-Media 

– အိန္ဒိယမှာ ကိုဗစ်ကြောင့် သေဆုံးသူအရေအတွက်ဟာ တရားဝင်ထုတ်ပြန်ထားတာထက် ၁၀ ဆလောက် ပိုများနိုင်ပြီး ခေတ်သစ်အိန္ဒိယသမိုင်းမှာ အဆိုးရွားဆုံး ဖြစ်ရပ်ဆိုးကြီး ဖြစ်ဖွယ်ရှိတယ်လို့ နောက်ဆုံး ထွက်ပေါ်လာတဲ့ သုတေသန စာတမ်းတစ်ခုမှာ ဖော်ပြထားပါတယ်။ 

ကိုဗစ်ကပ်ရောဂါ စဖြစ်ကတည်းက အခုအချိန်အထိ သေဆုံးမှုအရေအတွက် ၄၁၄၀၀၀ ရှိတယ်လို့ အစိုးရမှတ်တမ်းတွေက ဖော်ပြပါတယ်။

အိန္ဒိယအစိုးရ စီးပွားရေးအကြီးအကဲဟောင်း အာရ်ဗင် ဆူဘရာမာနီယန်၊ Center for Global Development နဲ့ Harvard တက္ကသိုလ်က သုတေသနပညာရှင် ၂ ဦး စုစုပေါင်း ၃ ဦး မနေ့က ထုတ်ပြန်တဲ့ သုတေသနစာတမ်းမှာ ၂၀၂၀ ဇန်နဝါရီလကနေ ၂၀၂၁ ဇွန်လအထိ အိန္ဒိယနိုင်ငံအတွင်း ကိုဗစ်ကြောင့် သေဆုံးသူအရေအတွက်ဟာ ၃ သန်းကနေ ၄.၇ သန်းလောက်အထိ ရှိနိုင်တယ်လို့ ဖော်ပြထားပါတယ်။

အတိအကျကို တွက်ချက်ရခက်ပေမယ့် အစိုးရထုတ်ပြန်ချက်ထက်တော့ သိသိသာသာများပြားတယ်လို့ ဆိုပါတယ်။ အိန္ဒိယအစိုးရက ဒီစာတမ်းကို ပယ်ချခဲ့ပြီး ချဲ့ကားပြောဆိုမှုသာ ဖြစ်တယ်လို့ တုန့်ပြန်ခဲ့ပါတယ်။

လူနာမနိုင်တော့တဲ့ ဆေးရုံတွေက သေဆုံးမှုတွေ၊ ကျန်းမာရေးစောင့်ရှောက်မှု အချိန်မီမပေးနိုင်တာကြောင့် သေဆုံးမှုတွေ၊ အထူးသဖြင့် အခုနှစ်အစောပိုင်း ဒုတိယလှိုင်းက သေဆုံးမှုတွေကို ထည့်သွင်းတွက်ချက်ဖို့ ကျန်သွားတာမျိုး ဖြစ်နိုင်တယ်လို့လည်း သုတေသနပညာရှင်တွေက ပြောပါတယ်။ 

“သေဆုံးမှုဟာ သိန်းချီမဟုတ်ဘဲ သန်းချီရှိနိုင်ပါတယ်။ လွတ်လပ်ရေးရပြီး နောက်ပိုင်း အိန္ဒိယရဲ့ အဆိုးရွားဆုံး လူသားထုကပ်ဆိုးကြီးလို့တောင် ပြောလို့ရပါတယ်”

အခုနှစ်အစောပိုင်းကစလို့ အိန္ဒိယဟာ ပုံပြောင်းကိုဗစ်ဒဏ်ကို အကြီးအကျယ်ခံစားခဲ့ရပြီး သေဆုံးသူတွေ တောင်လိုပုံတာအထိ ဖြစ်ခဲ့ပါတယ်။

Ref: Aljazeera