ဒုက္ခရောက်နေသည့် မြန်မာပြည်သူများကို ကူညီရန် လူ့အခွင့်အရေးအဖွဲ့က ကမ္ဘာကို တိုက်တွန်း

ဇူလိုင် ၂၁၊ ၂၀၂၁
M-Media

-မြန်မာနိုင်ငံမှာ ကိုဗစ်ကပ်ရောဂါ ပြန့်နှံ့မှုကို ထိန်းချုပ်ဖို့နဲ့ လူသားချင်း စာနာထောက်ထားမှုဆိုင်ရာ အကူအညီတွေ ပေးနိုင်ဖို့အတွက် ကုလအဖွဲ့ဝင်နိုင်ငံတွေက အရေးပေါ်မဟာမိတ်အဖွဲ့ ဖွဲ့စည်းပြီး ချက်ခြင်း ကူညီပေးသင့်တယ်လို့ လူ့အခွင့်အရေးအဖွဲ့တစ်ခုဖြစ်တဲ့ Fortify Rights က တိုက်တွန်းပြောကြားလိုက်ပါတယ်။

ဖေဖော်ဝါရီ ၁ ရက် အာဏာသိမ်းပြီးနောက်ပိုင်း တက်လာတဲ့ စစ်ကောင်စီဟာ ဆန္ဒပြသူတွေကို အကြမ်းဖက်သတ်ဖြတ်တာ၊ CDM လုပ်တဲ့ ဝန်းထမ်းတွေကို ဖမ်းဆီးနှိပ်စက်တာတွေ လုပ်နေတဲ့အချိန် ကိုဗစ် တတိယလှိုင်း ဖြစ်လာတာကို မြန်မာပြည်သူတွေ ကြုံတွေ့နေရတာပါ။

နိုင်ငံတစ်ဝှမ်း ဆေးရုံဆေးပေးခန်း မလုံလောက်မှုတွေ၊ ဆေးဝါး၊ အောက်ဆီဂျင် မလုံလောက်မှုတွေ ကြုံတွေ့နေရပြီး ကူးစက်မှု၊ သေဆုံးမှု အရေအတွက်ကလည်း မြင့်တက်လာပါတယ်။

Fortify Rights က အလှုရှင်နိုင်ငံတွေ၊ အကူအညီပေးရေးအဖွဲ့တွေဟာ စစ်ကောင်စီကို အသိအမှတ်ပြုတာမျိုး မဟုတ်ဘဲနဲ့ တစ်ဖက်က မြန်မာပြည်သူတွေကို အကူအညီတွေ ပေးအပ်သင့်တယ်လို့ ပြောပါတယ်။

“ကိုဗစ်ကြောင့် နိုင်ငံတစ်ဝှမ်း ဘယ်လောက်သေနေလဲဆိုတာ မသိရဘူး။ ဒေသတွင်းနဲ့ ဒေသပြင်ပကိုပါ ဆိုးရွားတဲ့ခြိမ်းခြောက်မှုဖြစ်လာတဲ့ ဒီပြဿနာအတွက် စစ်ကောင်စီမှာ တာဝန်ရှိပါတယ်။ နောက်ထပ်လူတွေ ထပ်မသေခင်မှာ ဗိုလ်ချုပ်မှူးကြီးမင်းအောင်လှိုင် ရာထူးကဆင်းပြီး အရပ်သားအစိုးရလက်ထဲ တိုင်းပြည်ကို ပြန်ထည့်ဖို လိုပါတယ်” လို့ Fortify Rights အဖွဲ့ရဲ့ စီအီးအို မက်သယူးစမစ်က ပြောပါတယ်။

စစ်ကောင်စီတပ်တွေက အောက်ဆီဂျင်တွေ လုယူဖျက်ဆီးတယ်ဆိုတဲ့ အထောက်အထားတွေ မိမိတို့မှာ ရှိနေတယ်လို့လည်း Fortify Rights က ပြောပါတယ်။

အာဏာသိမ်းပြီးနောက်ပိုင်းဆေးဖက်ဆိုင်ရာ အဆောက်အဦးတွေ၊ လူနာတွေ၊ လူနာတင်ယာဉ်၊ ကျန်းမာရေးဝန်ထမ်း၊ ဆေးဝါးပစ္စည်းတွေအပါအဝင် စစ်ကောင်စီတပ်တွေက ကျန်းမာရေးစောင့်ရှောက်မှုစနစ်အပေါ် တိုက်ခိုက်ဖျက်ဆီးမှု ၂၆၀ ကျော် ရှိတယ်လို့ WHO က ထုတ်ပြန်ထားပါတယ်။

စစ်ကောင်စီတပ်တွေရဲ့ လက်ချက်ကြောင့် အာဏာသိမ်းပြီးနောက်ပိုင်း နိုင်ငံတစ်ဝှမ်း သေဆုံးသူ ၉၀၀ ကျော် ရှိပြီး ဖမ်းဆီးခံရသူ အရေအတွက်ကတော့ ၅ ထောင်ကျော် ရှိနေပါတယ်။

Ref: Fortify Rights