စင်ကာပူက မြန်မာကို oxygen concentrator များ လှူဒါန်း

ဇူလိုင် ၂၈၊ ၂၀၂၁

M-Media 

-ကိုဗစ် တတိယလှိုင်းဒဏ်ကို ဆိုးဆိုးရွားရွား ခံစားနေရတဲ့ မြန်မာနိုင်ငံအတွက် အောက်ဆီဂျင်စက် (oxygen concentrator) အလုံး ၂၀၀ ပေးပို့လှူဒါန်းမယ်လို့ စင်ကာပူ နိုင်ငံခြားရေးဝန်ကြီးဌာနက ဒီကနေ့မှာ ထုတ်ပြန်ပါတယ်။ 

၁၀ လီတာဆန့်မယ့် အဲဒီအောက်ဆီဂျင်စက်တွေကို စင်ကာပူ ကြက်ခြေနီအဖွဲ့က မြန်မာကြက်ခြေနီအဖွဲ့ကို လွှဲပြောင်းပေးမှာဖြစ်ပါတယ်။ 

မြန်မာနိုင်ငံမှာ ကိုဗစ်ကူးစက်သူ စုစုပေါင်း ၂ သိန်း ၈ သောင်းနီးပါး ရှိတယ်လို့ အစိုးရစာရင်းတွေအရ သိရပြီး ၁ သိန်း ၂ သောင်းကျော်က ပြီးခဲ့တဲ့လ တစ်လတည်းမှာ ကူးစက်ခဲ့တာ ဖြစ်ပါတယ်။ သေဆုံးသူ စုစုပေါင်း ၇၈၀၀ ရှိရာမှာ ၄၅၀၀ က ပြီးခဲ့တဲ့လမှာ သေဆုံးခဲ့တာပါ။

ဒေါ်အောင်ဆန်းစုကြည်ဦးဆောင်တဲ့ အရပ်သားအစိုးရလက်ထက် ကိုဗစ် ပထမလှိုင်းနဲ့ ဒုတိယလှိုင်းတွေမှာ ထိထိရောက်ရောက် ကာကွယ်ကုသနိုင်ခဲ့ပေမယ့် စစ်အာဏာရှင်လက်အောက် အခုတတိယလှိုင်းမှာတော့ လူထုဟာ အကူအညီမဲ့ကာ ဆိုးဆိုးရွားရွား ထိခိုက်ခံစားနေရပါတယ်။ ကူးစက်မှု၊ သေဆုံးမှုဟာ စစ်ကောင်စီကထုတ်ပြန်တဲ့ ပမာဏထက် အဆမတန် များပြားနိုင်တယ်လို့ လေ့လာသူတွေက ဆိုပါတယ်။ 

စင်ကာပူဟာ အရင်ကလည်း ကိုဗစ်စစ်ဆေးတဲ့ ကိရိယာတွေ၊ နှာခေါင်းစီးတွေ၊ လက်ဆေးဂျယ်တွေအပါအဝင် ကိုဗစ်ကုသရေးအတွက် လိုအပ်တာတွေကို လှုဒါန်းခဲ့ဖူးတယ်လို့ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။ 

“ကိုဗစ်တိုက်ဖျက်ရေးမှာ မြန်မာပြည်သူတွေနဲ့ စင်ကာပူက တစ်သားတည်းရှိပါတယ်။ အစိုးရရဲ့ ဒီလှူဒါန်းမှုတွေ၊ ပုဂ္ဂလိက အဖွဲ့အစည်းတွေနဲ့ စင်ကာပူက မြန်မာလူ့အဖွဲ့အစည်းရဲ့ ကူညီပံ့ပိုးပေးမှုတွေဟာ ကိုဗစ် ၁၉ ကို အတူတကွ ရင်ဆိုင်နေရတဲ့ စင်ကာပူနဲ့ မြန်မာပြည်သူတွေအကြားက အပြန်အလှန် ပံ့ပိုးကူညီမှုကို ဖော်ကျူးတဲ့ သ​က်သေအထောက်အထား ဖြစ်ပါတယ်”

အရှေ့တောင်အာရှနဲ့ တောင်အာရှက ကိုဗစ်ဒဏ်ခံနေရတဲ့ နိုင်ငံတွေကို ကူညီပံ့ပိုးပေးနိုင်ရေးအတွက် စင်ကာပူအစိုးရဟာ လူထုကို အားပေးလှုံ့ဆော်မှုတွေလည်း ရှိနေပါတယ်။ 

Ref: CNA