ပုံပြောင်းကိုဗစ် Delta ဒဏ်ကို တရုတ်နိုင်ငံက တစ်ဖန်ပြန် ခံစားနေရ

ဇူလိုင် ၂၊ ၂၀၂၁
M-Media

-ကမ္ဘာတစ်ဝှမ်းမှာ အကြီးအကျယ်ပြန့်နှံ့ကာ ကူးစက်မှု၊ သေဆုံးမှု မြင့်တက်နေတဲ့ ပုံပြောင်းကိုဗစ် Delta ဒဏ်ကို တရုတ်နိုင်ငံက စတင်ခံစားလာရပါတယ်။

တရုတ်နိုင်ငံရဲ့ စုစုပေါင်း ပြည်နယ် ၃၁ ခုမှာ ပြီးခဲ့တဲ့နှစ်ပတ်အတွင်း Delta ကိုဗစ်တွေ့ရတဲ့ပြည်နယ် အနည်းဆုံး ၁၅ ခုအထိ ရှိလာပါတယ်။ ကူးစက်မှုကလည်း လွန်ခဲ့တဲ့ ၅ လပေါင်းထက် ပိုမိုများပြားနေတာပါ။ တနင်္လာနေ့မှာ ကူးစက်မှုသစ် ၉၉ ခု ရှိခဲ့ပြီး ပြီးခဲ့တဲ့လက စတွက်ရင် စုစုပေါင်း ၃၂၈ ခု ရှိလာတာ ဖြစ်ပါတယ်။ ဒီစာရင်းမှာ ပိုးရှိပေမယ့် ရောဂါလက္ခဏာ မပြသူတွေကို ထည့်မတွက်ထားပါဘူး။

တရုတ်အာဏာပိုင်တွေက မြို့ကြီးတစ်ချို့ကို လော့ဒေါင်းချတာ၊ အသွားအလာ ကန့်သတ်တာတွေ လုပ်ဆောင်ခဲ့ပါတယ်။ လပေါင်းများစွာ ကိုဗစ်ကင်းစင်ခဲ့တာကြောင့် နှာခေါင်းစည်းတပ်တာ၊ ခပ်ခွာခွာနေထိုင်တာလို ကိုဗစ်စည်းကမ်းတစ်ချို့ကို မကြာသေးမီကပဲ တရုတ်အစိုးရက လျှော့ပေါ့ပေးခဲ့တာပါ။

နိုင်ငံအရှေ့ပိုင်း ကျန်းဆူပြည်နယ် နန်ကျင်းမြို့ဟာ ပုံပြောင်းကိုဗစ် Delta ကူးစက်တဲ့ အဓိကနေရာဖြစ်ခဲ့ပြီး ကာကွယ်ဆေး ၂ ကြိမ်ထိုးထားပြီးသား လေဆိပ်ဝန်ထမ်းတွေဟာ ဇူလိုင်လ ၁၀ ရက်နေ့ ရုရှားက ရောက်လာသူတွေထံကနေ ကူးစက်ခဲ့တာ ဖြစ်ပါတယ်။ သူတို့ထံကနေတစ်ဆင့် အခြားခရီးသည်တွေကိုကူးကာ နိုင်ငံတစ်ဝှမ်း ပြန့်နှံ့သွားခဲ့ပါတယ်။

ကိုဗစ်ရောဂါပိုး စတင်သန္ဓေတည်တဲ့ ၀ူဟန်မြို့မှာလည်း Delta ကိုဗစ် ကူးစက်မှုတွေ ရှိနေပါတယ်။

ပြည်တွင်းထုတ် ကိုဗစ်ကာကွယ်ဆေး ၁.၆၇ ဘီလီယံလောက်ကို တရုတ်က ထိုးပေးထားနိုင်ပေမယ့် ပြန့်နှံ့လွယ်တဲ့ ပုံပြောင်းကိုဗစ် Delta ကို ထိထိရောက်ရောက် တားဆီးနိုင်ပါ့မလားဆိုတဲ့ စိုးရိမ်မှုတွေလည်း ရှိနေပါတယ်။

ကိုဗစ်ကာကွယ်ဆေး ထုတ်လုပ်တဲ့ နိုင်ငံပိုင် ဆေးဝါးလုပ်ငန်း Sinopharm ရဲ့ လက်ခွဲ CNBG ကုမ္ပဏီက ဥက္ကဌ ယန်ရှောင်မင်က ပုံပြောင်းကိုဗစ်ဗိုင်းရပ်စ် အသစ်တွေအပေါ် သူတို့ကာကွယ်ဆေးက ထိရောက်မှုရှိမှာဖြစ်ပြီး Delta ကိုနိုင်မယ့် ကာကွယ်ဆေးအသစ်ကိုလည်း ထုတ်လုပ်သွားမယ်လို့ ပြောကြားခဲ့ပါတယ်။

ပုံပြောင်းကိုဗစ်ဟာ ကမ္ဘာတစ်ဝှမ်း အထူးသဖြင့် အာရှနိုင်ငံတွေမှာ ဆိုးဆိုးဝါးဝါး ပြန့်နှံ့နေပြီး ကူးစက်သေဆုံးမှု အလွန်မြန်တာကြောင့် တိုင်းပြည်တွေရဲ့ ကျန်းမာရေးစနစ် ပြိုလဲလာမယ့် အခြေအနေအထိ ဖြစ်လာပါတယ်။

Ref: Asia Times