တာလီဘန်ကို ကျောထောက်နောက်ခံပေးရန် တရုတ်ပြင်ဆင်

ဩဂုတ် ၁၆၊ ၂၀၂၁
M-Media

-အာဖဂန်နစ္စတန်ကို ပြန်လည်သိမ်းပိုက်လိုက်တဲ့ တာလီဘန်အဖွဲ့နဲ့ မိတ်ဖက်ဆက်ဆံရေးတည်ဆောက်ဖို့ အဆင်သင့်ရှိတယ်လို့ တရုတ်က ဒီကနေ့မှာ ပြောကြားလိုက်ပါတယ်။

တရုတ်နဲ့ အာဖဂန်နစ္စတန်တို့ရဲ့ နယ်မြေထိပ်စပ်မှုဟာ ၇၆ ကီလိုမီတာ ရှည်လျားပါတယ်။ ရှင်ကျန်းပြည်နယ်မှာ ဖိနှိပ်ခံနေရတဲ့ ဝီဂါတွေအတွက် အာဖဂန်က လွတ်မြောက်နယ်မြေဖြစ်လာမှာကို တရုတ်က အရင်ကတည်းက စိုးရိမ်ခဲ့တာပါ။

အမေရိကန်ဦးဆောင်တဲ့ နိုင်ငံခြားတပ်တွေ စတင်ဆုတ်ခွာတဲ့အချိန်ကစပြီး တရုတ်က တာလီဘန်အဖွဲ့နဲ့ ဆက်ဆံရေးတည်ဆောင်ခဲ့ပါတယ်။ ပြီးခဲ့တဲ့လ တရုတ်နိုင်ငံခြားရေးဝန်ကြီး ဝမ်ယီနဲ့ တာလီဘန်ကိုယ်စားလှယ်အဖွဲ့တို့ တွေ့ဆုံမှုအတွင်း တရုတ်ကထွက်ပြေးလာတဲ့ ဝီဂါတွေကို လက်ခံမှာမဟုတ်ဘူးလို့ တာလီဘန်အဖွဲ့က ကတိပြုခဲ့ပြီး အပြန်အလှန်အားဖြင့် အာဖဂန်ရဲ့ စီးပွားရေးနဲ့ ပြန်လည် တည်ဆောက်ရေးလုပ်ငန်းတွေကို တရုတ်က ကူညီပေးရမှာ ဖြစ်ပါတယ်။

ဒီကနေ့ပြုလုပ်တဲ့ သတင်းစာရှင်းလင်းပွဲမှာ အာဖဂန်နစ္စတန်နဲ့ ဆက်ဆံရေး ပိုမိုနက်ရှိုင်းစေမယ့် အခွင့်အလမ်းမျိုးကို ကြိုဆိုတယ်လို့ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဟွာချန်ယင်က ပြောကြားခဲ့ပါတယ်။

“တရုတ်နဲ့ ကောင်းမွန်တဲ့ဆက်ဆံရေးတည်ဆောက်ဖို့ မျှော်လင့်ကြောင်း တာလီဘန်အဖွဲ့က အကြိမ်ကြိမ် ပြောကြားဖူးပါတယ်။ အာဖဂန်နစ္စတန် ပြန်လည်တည်ဆောက်ရေးနဲ့ ဖွံ့ဖြိုးတိုးတက်ရေးမှာ တရုတ်နိုင်ငံက ပါဝင်ပေးဖို့ သူတို့မှာ အာသီသ ရှိပါတယ်။ ကျွန်မတို့လည်း ဒါကို ကြိုဆိုပါတယ်။ အာဖဂန်ပြည်သူတွေ သူတို့ရဲ့ကံကြမ္မာကို လွတ်လွတ်လပ်လပ် ဆုံးဖြတ်ပိုင်ခွင့်ကို ကျွန်မတို့ လေးစားတယ်။ အာဖဂန်နစ္စတန်နဲ့ ရင်းနှီးပြီး အပြန်အလှန်ပူးပေါင်းဆောင်ရွက်တဲ့ ဆက်ဆံရေးမျိုး ဆက်လက်ထူထောင်ဖို့လည်း ဆန္ဒရှိပါတယ်”

ချော့မွေ့တဲ့ အာဏာလွှဲပြောင်းမှုလုပ်ဆောင်ဖို့၊ ပွင့်လင်းပြီး အားလုံးပါဝင်နိုင်တဲ့ အစိုးရတစ်ရပ် ဖွဲ့စည်းဖို့ အာဖဂန်ပြည်သူတွေနဲ့ နိုင်ငံခြားသားတွေ ဘေးအန္တရာယ်ကင်းရေး ဆောင်ရွက်ပေးဖို့လည်း ဟွာချန်ယင်က တာလီဘန်ကို တိုက်တွန်းခဲ့ပါတယ်။

Ref: France 24