အာရှ ၆ နိုင်ငံကို ဆက်သွယ်မည့် ရေအောက်အင်တာနက်လိုင်းကို Google နှင့် Facebook တို့ ပူးပေါင်းဖော်ဆောင်မည်

ဩဂုတ် ၁၇၊ ၂၀၂၁

M-Media 

– အာရှနိုင်ငံ ၆ နိုင်ငံကို ဆက်သွယ်မယ့် ပင်လယ်ရေအောက် အင်တာနက်လိုင်း စီမံကိန်းတစ်ခု ဖော်ဆောင်မယ့် အစီအစဉ်ကို Google နဲ့ Facebook တို့က တနင်္လာနေ့မှာ ထုတ်ပြန်လိုက်ပါတယ်။

ကီလိုမီတာ ၁၂၀၀၀ ရှည်မယ့် ဒီရေအောက် အင်တာနက်လိုင်း စီမံကိန်းကို Apricot လို့ အမည်ပေးထားပြီး စင်ကာပူ၊ ဂျပန်၊ ဂူအမ်ကျွန်း၊ ဖိလစ်ပိုင်၊ ထိုင်ဝမ်နဲ့ အင်ဒိုနီးရှားတို့ကို ဆက်သွယ်ထားမှာဖြစ်ကာ ၂၀၂၄ ခုနှစ်မှာ စတင်အသုံးပြုနိုင်ဖို့ ရည်မှန်းထားပါတယ်။

ဒီလိုင်းဟာ အာရှ၊ ဖိစိဖိတ်ဒေသအတွင်း အလွန်လိုအပ်နေတဲ့ တည်ငြိမ်ကောင်းမွန်တဲ့ အင်တာနက်လိုင်းကို ချဲ့ထွင်ချိတ်ဆက်ပေးမှာဖြစ်တယ်လို့ Facebook အင်ဂျင်နီယာအဖွဲ့ မန်နေဂျာ နီကို ရိုဟာရစ်ချ်က ပြောပါတယ်။

“Apricot လိုင်းဟာ ကမ္ဘာလုံးဆိုင်ရာ အင်တာနက်ကွန်ယက် ချိတ်ဆက်မှုကို ချဲ့ထွင်ရေး၊ လစဉ် ကျွန်တော်တို့ရဲ့ ဝန်ဆောင်မှုကို သုံးစွဲနေတဲ့ ကမ္ဘာတစ်ဝှမ်းက လူပေါင်း ၃.၅ ဘီလီယံကျော် ပိုမိုကောင်းမွန်တဲ့ ဝန်ဆောင်မှုပေးရေး ကျွန်တော်တို့ရဲ့ ကြိုးပမ်းမှု တစ်စိတ်တစ်ပိုင်း ဖြစ်ပါတယ်”

အမေရိကန်၊ စင်ကာပူ၊ ဂူအမ်နဲ့ အင်ဒိုနီးရှားတို့ကို ဆက်သွယ်မယ့် အင်တာနက်လိုင်းစီမံကိန်း Echo ကိုလည်း အခုနှစ်အစောပိုင်းမှာ Google နဲ့ Facebook တို့က ထုတ်ပြန်ခဲ့ပါတယ်။ ကယ်လီဖိုးနီးယားနဲ့ ဟောင်ကောင်ကို ဆက်သွယ်မယ့် ရေအောက် အင်တာနက်လိုင်း စီမံကိန်းကို ဒီကုမ္ပဏီနှစ်ခုက ဖော်ဆောင်နေပေမယ့် တရုတ်နဲ့ အမေရိကန်တို့အကြား တင်းမာမှုကြောင့် ပြီးခဲ့တဲ့နှစ်မှာ ရပ်ဆိုင်းခဲ့ရပါတယ်။

Ref: AFP