အာဏာသိမ်းပြီးနောက် စစ်ကောင်စီလက်ချက်ကြောင့် သေဆုံးသူ တစ်ထောင်ကျော်ပြီ

ဩဂုတ် ၁၉၊ ၂၀၂၁
M-Media

-ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း စစ်ကောင်စီရဲ့ အကြမ်းဖက်သတ်ဖြတ်မှုကြောင့် နိုင်ငံတစ်ဝှမ်း သေဆုံးသူ စုစုပေါင်း တစ်ထောင်ကျော် ရှိလာပြီလို့ သိရပါတယ်။

၂၀၂၀ နိုဝင်လာလ ရွေးကောက်ပွဲမှာ အနိုင်ရတဲ့ ပါတီကို ဖြုတ်ချတဲ့ ဒီအာဏာသိမ်းမှုကို ဆန့်ကျင်ကြောင်း ပြည်သူလူထုက တစ်နိုင်ငံလုံးမှာ ဆန္ဒပြခဲ့ပြီး စစ်ကောင်စီတပ်တွေက ဆန္ဒပြသူတွေရော၊ မပြသူတွေပါ မြင်မြင်ရာ နှိပ်စက်ညှင်းပမ်း သတ်ဖြတ်ခဲ့တာ ဖြစ်ပါတယ်။

သေဆုံးမှု၊ ဖမ်းဆီးခံရမှု၊ ဒဏ်ရာရမှု စာရင်းတွေကို ပြုစုနေတဲ့ နိုင်ငံရေးအကျဉ်းသားများ ကူညီရေးအဖွဲ့ AAPP က စစ်ကောင်စီတပ်တွေ လက်ချက်ကြောင့် သေဆုံးသူ အရေအတွက်ဟာ ဩဂုတ်လ ၁၈ ရက် ဗုဒ္ဓဟူး​နေ့အထိ ​၁၀၀၁ ဦး ရှိလာပြီလို့ ပြောပါတယ်။

ဒါဟာ သူတို့အဖွဲ့ စာရင်းကောက်ယူလို့ရတာဖြစ်ပြီး အမှန်တကယ် ထိခိုက်သေဆုံးသူဟာ ဒီထက် ပိုများနိုင်တယ်လို့ AAPP အဖွဲ့ အတွင်းရေးမှူး ကိုဘိုကြီးက ပြောပါတယ်။

“စစ်တပ်က အာဏာရနေသမျှ လူငယ်တွေ၊ ဆရာဝန်နဲ့ ကျောင်းဆရာတွေလို ပရော်ဖက်ရှင်နယ်တွေ၊ အမျိုးသား၊ အမျိုးသမီးနဲ့ ကလေးတွေကို သတ်ဖြတ်နေအုံးမှာ ဖြစ်ပါတယ်။ လူတွေသတ်နေတာထက် တိုင်းပြည်ရဲ့ အနာဂတ်၊ ဒီမိုကရေစီမျှော်လင့်ချက်တွေကို အညွန့်တုန်းအောင် လုပ်နေတာ ဖြစ်ပါတယ်”

အာဏာသိမ်းစစ်ကောင်စီဟာ ကိုဗစ် ကပ်ရောဂါကို လက်နက်သဖွယ် အသုံးချနေတယ်လို့လည်း ကိုဘိုကြီးက ထည့်သွင်းပြောဆိုခဲ့ပါတယ်။

Ref: AFP