ဂျပန်က ယာကူဇာခေါင်းဆောင်တစ်ဦးကို ပထမဆုံးအကြိမ်အဖြစ် ကွပ်မျက်မည်

ဩဂုတ် ၂၆၊ ၂၀၂၁
M-Media

-နာမည်ကြီး ရာကူဇာ ရာဇဝတ်ဂိုဏ်း ခေါင်းဆောင်တစ်ဦးကို လူသတ်မှုအတွက် ကြိုးပေးကွပ်မျက်ဖို့ ဂျပန်တရားရုံးက အင်္ဂါနေ့မှာ အမိန့်ချလိုက်ပြီး ဒါဟာ ယာကူဇာတစ်ဦးကို ဂျပန်က ပထမဆုံးအကြိမ် သေဒဏ်ပေးတာဖြစ်ပါတယ်။

အသက် ၇၄ နှစ်ရှိပြီဖြစ်တဲ့ ဆာတိုရူ နိုမူရာဟာ ဂျပန်နိုင်ငံ အနောက်တောင်ပိုင်းအခြေစိုက် ရာကူဇာဂိုဏ်း Kudo-kai ရဲ့ ခေါင်းဆောင်ဖြစ်ပြီး ၁၉၉၈ ခုနှစ်က စီးပွားပြိုင်ဘက် သူဌေးတစ်ဦး၊ ၂၀၁၄ ခုနှစ်က အဲဒီသူဌေးရဲ့ ဆွေမျိုးတစ်ဦး၊ ၂၀၁၃ ခုနှစ်က သူကုနေကျ ဆေးခန်းက သူနာပြုတစ်ဦး စုစုပေါင်း လူ ၃ ဦးကို သတ်ဖို့ စေခိုင်းခဲ့မှုအတွက် အခုလို သေဒဏ်ချမှတ်ခြင်း ခံခဲ့ရတာပါ။

နိုမူရာက သူ့အပေါ်စွဲချက်တွေအတွက် အပြစ်မရှိဘူးလို့ ငြင်းဆိုခဲ့ပါတယ်။

ဂျပန်နိုင်ငံမှာ ရာကူဇာဂိုဏ်းတွေ ကြီးစိုးခဲ့တာဟာ ၁၇ ရာစုကတည်း​ဖြစ်ပြီး ၁၉၆၀ ပြည့်နှစ်တွေက သူတို့ရဲ့ အထွပ်အထိပ်ကာလဖြစ်ပါတယ်။ အဲဒီအချိန်က နိုင်ငံတစ်ဝှမ်း ရာကူဇာဂိုဏ်းဝင် ၂ သိန်းလောက် ရှိတယ်လို့ ရဲတပ်ဖွဲ့က တွက်ချက်ခဲ့ပေမယ့် အခုအချိန်မှာတော့ ၂ သောင်းလောက်သာ ရှိပါတော့တယ်။

ရာကူဇာဂိုဏ်းတွေဟာ ဒုတိယကမ္ဘာစစ်အလွန် ဂျပန်နိုင်ငံမှာ မူးယစ်ဆေး၊ ပြည့်တန်ဆာလုပ်ငန်း၊ ကြေးစားလူသတ်အလုပ် စသဖြင့် တရားမဝင်လုပ်ငန်းပေါင်းစုံလုပ်ကိုင်ပြီး ဒေါ်လာဘီလီယံနဲ့ချီ ဝင်ငွေရှိတဲ့ ဂိုဏ်းတွေ ဖြစ်လာခဲ့ပါတယ်။

လမ်းတွေပေါ်မှာကြီးစိုးပြီး တည်ငြိမ်အေးချမ်းရေးကို တစ်ဖက်တစ်လမ်းက အထောက်အကူပြုပေးတဲ့အတွက် ရာကူဇာဂိုဏ်းတွေကို ဂျပန်အစိုးရက ပြင်းပြင်းထန်ထန် အရေးယူတာမျိုး အရင်က မလုပ်ခဲ့ပါဘူး။ ဒါပေမယ့် ပြီးခဲ့တဲ့ ၁၀ စုနှစ်တွေအတွင်း ဂျပန်ဟာ လူဆိုးဂိုဏ်းတွေအပေါ် ထိန်းကွပ်မှုကို ပိုမို တင်းတင်းကြပ်ကြပ် ဆောင်ရွက်လာခဲ့ပါတယ်။

လူသတ်မှု ၃ ခုနဲ့ ၂၀၁၂ ခုနှစ်က ရဲအရာရှိဟောင်းတစ်ဦးကို လုပ်ကြံဖို့ Kudo-kai ဂိုဏ်းရဲ့ ကြိုးစားမှုတွေမှာ နိုမူရာ၊ သူ့ရဲ့လက်ထောက် ဖူမီယို တာနိုယီတို့က အဓိက တာဝန်ရှိသူတွေ ဖြစ်တယ်လို့ တရားရုံးက ဆုံးဖြတ်ခဲ့ပါတယ်။ တာနိုယီကတော့ တစ်သက်တစ်ကျွန်းပြစ်ဒဏ် ချမှတ်ခံခဲ့ရပါတယ်။

နိုမူရာနဲ့ တာနိုယီတို့ဟာ ဒဏ်ကြေး ယန်း သန်း ၂၀ ကိုလည်း ပေးဆောင်ရမှာ ဖြစ်ပါတယ်။

Ref: Reuters