ကာဘူးလ်လေဆိပ်က အသေခံဗုံးခွဲမှု သေဆုံးသူ ၁၀၃ ဦးအထိ ရှိလာ

ဩဂုတ် ၂၇၊ ၂၀၂၁
M-Media

-အာဖဂန်နစ္စတန်နိုင်ငံ မြို့တော်ကာဘူးလ်က နိုင်ငံတကာလေဆိပ်မှာ မနေ့က အသေခံဗုံးခွဲမှုနှစ်ခု ဖြစ်ပွားခဲ့ပြီး အနည်းဆုံး ၁၀၃ ဦးသေဆုံးခဲ့ပါတယ်။

တိုက်ခိုက်မှုကို သူတို့လုပ်တာလို့ IS အကြမ်းဖက်အဖွဲရဲ့ ခိုရာစန်ဒေသအဖွဲ့ခွဲ ISIS-K က ပြောပါတယ်။ ကယ်ဆယ်ရေးလေယာဉ်တွေနဲ့လိုက်ဖို့ လူအများအားပြား စုရုံးနေကြတဲ့ လေဆိပ်ဝင်ပေါက်ကို သေနတ်သမား နှစ်ဦးက ဝင်ရောက်ပစ်ခတ်ခဲ့ပြီးနောက် ဗုံးခွဲခဲ့တာပါ။

အမေရိကန်စစ်သား အနည်းဆုံး ၁၃ ဦး ဒီတိုက်ခိုက်မှုမှာ သေဆုံးခဲ့ပြီး ဒါဟာ ၂၀၁၁ ခုနှစ် ဩဂုတ်လနောက်ပိုင်း အာဖဂန်မှာ အမေရိကန်တပ်တွေ အထိခိုက်အကျအဆုံး အများဆုံး ဖြစ်ပါတယ်။

တာလီဘန်က သူတို့အဖွဲ့ဝင် ၂၈ ဦးသေဆုံးတယ်လို့ ထုတ်ပြန်ပါတယ်။ တိုက်ခိုက်မှုအတွက် သူတို့မှာ တာဝန်မရှိဘဲ အခင်းဖြစ်တဲ့နေရာဟာ နိုင်ငံခြားတပ်ဖွဲ့တွေ လုံခြုံရေးယူထားရာနေရာလို့လည်း ဆိုပါတယ်။

သေဆုံးသူ ၇၂ ဦးကတော့ အာဖဂန်အရပ်သားတွေပါ။ တိုက်ခိုက်မှုကြောင့် လူအများအပြား ဒဏ်ရာရခဲ့ပါတယ်။

အမေရိကန်သမ္မတ ဂျိုးဘိုင်ဒန်က အမေရိကန်တွေအပေါ် ထိခိုက်နာကျင်အောင် လုပ်ဆောင်မှုကို မိမိတို့ မေ့မှာမဟုတ်သလို၊ ခွင့်လွတ်မှာလည်းမဟုတ်ကြောင်း၊ ကျူးလွန်တွေကို လိုက်လံရှာဖွေပြီး အစားပြန်ယူမှာဖြစ်ကြောင်း မနေ့က သတင်းစာရှင်းလင်းပွဲမှာ ပြောကြားခဲ့ပါတယ်။

အမေရိကန်အပါအဝင် နိုင်ငံခြားတိုင်းပြည်တွေဟာ ဟာမစ်ကာဇိုင်း နိုင်ငံတကာလေဆိပ်မှာ ကယ်ဆယ်ရေးလုပ်ငန်းတွေကို ပြန်လည်လုပ်ဆောင်နေကြပါတယ်။

Ref: Aljazeera