၁၈ နှစ်အောက်လူငယ်များ တစ်ပတ်လျှင် ၃ နာရီသာ ဂိမ်းကစားရမည့် ဥပဒေသစ်တစ်ခု တရုတ်ထုတ်ပြန်

ဩဂုတ် ၃၁၊ ၂၀၂၁
M-Media

-အသက် ၁၈ နှစ်အောက်လူငယ်တွေ တစ်ပတ်ကို ၃ နာရီသာ ဂိမ်းဆော့ခွင့်ပြုတဲ့ စည်းမျဉ်းသစ်တစ်ခုကို တရုတ်အစိုးရက ထုတ်ပြန်လိုက်ပြီး ဂိမ်းစွဲမှုကို တိုက်ဖျက်ဖို့ လိုအပ်တဲ့အတွက် လုပ်ဆောင်ရခြင်းဖြစ်တယ်လို့ ဆိုပါတယ်။

မနေ့ကထုတ်ပြန်တဲ့ ဒီစည်းမျဉ်းသစ်ဟာ လူ့အဖွဲ့အစည်းကို ပိုမိုထိန်းချုပ်နိုင်ဖို့ နည်းပညာ၊ စီးပွားရေး၊ အိမ်ခြံမြေ ပိုင်ဆိုင်မှုတွေလို နှစ်ပေါင်းများစွာ အရှိန်အဟုန်နဲ့ တိုးတက်လာတဲ့ အဓိက စီးပွားရေးကဏ္ဍတွေကို ထိန်းချုပ်ဖို့ တရုတ်အစိုးရရဲ့ ကြိုးပမ်းမှုတွေထဲက တစ်ခုလည်း ဖြစ်ပါတယ်။

ဥပဒေအသစ်အရ အသက် ၁၈ နှစ်အောက် ကလေးငယ်တွေဟာ ဖုန်း၊ ကွန်ပျူတာနဲ့ ကွန်ဆိုးလ် စတဲ့ ပလက်ဖောင်းမျိုးစုံမှာ ဂိမ်းတွေကို သောကြာ၊ စနေ၊ တနင်္ဂနွေနေ့တွေမှာ ည ၈ နာရီကနေ ၉ နာရီအထိ ၁ နာရီသာ ကစားခွင့်ရမှာ ဖြစ်ပါတယ်။ အများပြည်သူ အလုပ်ပိတ်ရက်တွေမှာလည်း ဒီစည်မျဉ်းအတိုင်းပဲ ၁ နာရီ ကစားခွင့်ပြုမှာပါ။

Alibaba နဲ့ Tencent လို နည်းပညာကုမ္ပဏီကြီးတွေကို ကန့်သတ်ဖိနှိပ်မှုတွေ လုပ်ဆောင်တဲ့နောက်ဆက်တွဲအဖြစ် ဒီလိုသတ်မှတ်ချက်မျိုး ထွက်ပေါ်လာတာ ဖြစ်ပါတယ်။ ဒါဟာ တရုတ်နိုင်ငံက လူငယ်ပေါင်း သန်းရာချီကို စွဲဆောင်ထားနိုင်တဲ့ ကမ္ဘာ့ ဂိမ်းစျေးကွက်အတွက် ထိုးနှက်ချက်တစ်ခုလည်း ဖြစ်ပါတယ်။

တရုတ်အစိုးရက ဂိမ်းကစားမှုဟာ ‘စိတ်ပိုင်းဆိုင်ရာ ဘိန်းစွဲမှု’ ပုံစံမျိုး ဖြစ်လာနေကြောင်း၊ လူငယ်တွေဟာ တိုင်းပြည်ရဲ့ အနာဂတ်ဖြစ်ပြီး သူတို့ရဲ့ ရုပ်ပိုင်၊ စိတ်ပိုင်းကို ကာကွယ်ဖို့ဟာ နိုင်ငံတော် အကျိုးစီးပွား ဖြစ်တဲ့အတွက် ဒီလို ဥပဒေမျိုး ထုတ်ပြန်ရတာဖြစ်ကြောင်း ပြောကြားခဲ့ပါတယ်။

သတ်မှတ်ထားတဲ့ အချိန်ထက် ကျော်လွန်ဝန်ဆောင်မှုပေးတဲ့ ဂိမ်းကုမ္ပဏီတွေဟာ အရေးယူခံရမှာဖြစ်ပြီး၊ ၁၈ နှစ်အောက် လူငယ်တွေအနေနဲ့ အမည်အရင်းနဲ့သာ အကောင့်အဖွင့် ကစားနိုင်မှာ ဖြစ်ပါတယ်။

၂၀၁၉ ခုနှစ်က အသက် ၁၈ နှစ်အောက် လူငယ်တွေ တစ်နေ့ကို ၁ နာရီခွဲ ပိတ်ရက်တွေမှာ ၃ နာရီအထိ ဂိမ်းကစားဖို့ တရုတ်အစိုးရက စည်းမျဉ်း သတ်မှတ်ခဲ့ဖူးပါတယ်။

Ref: Reuters