၉ နှစ်အရွယ် ဒါလစ်ဇာတ်နိမ့် မိန်းကလေးငယ် အဓမ္မကျင့် သတ်ဖြတ်ခံရမှု အိန္ဒိယတွင် ဖြစ်ပွား

ဩဂုတ် ၃၁၊ ၂၀၂၁
M-Media

-အသက် ၉ နှစ်အရွယ် ဒါလစ်ဇာတ်နိမ့် မိန်းကလေးငယ်တစ်ယောက် အုပ်စုဖွဲ့ အဓမ္မကျင့်သတ်ဖြတ်မှုအတွက် အိန္ဒိယရဲတပ်ဖွဲ့က ဟိန္ဒူဘုန်းကြီတစ်ဦးနဲ့ လူ ၃ ဦးကို ဖမ်းဆီးလိုက်ပါတယ်။

ဒီအဖြစ်အပျက်ဟာ ​မြို့တော်ဒေလီမှာ ဩဂုတ်လ ၁ ရက်နေ့က ဖြစ်ပွားခဲ့တာပါ။ မီးသင်္ဂြိုဟ်စက်ရှိရာ အဆောက်အဦးမှာ မိန်းကလေးငယ်က ရေယူဖို့ သွားစဉ်အတွင်း အသက် ၅၃ နှစ်အရွယ် ဘုန်းကြီးနဲ့ သင်္ဂြိုဟ်စက်အလုပ်သမား ၃ ဦးတို့က အဓမ္မကျင့် သတ်ဖြတ်ခဲ့တာ ဖြစ်ပါတယ်။

အဲဒီနောက် မိခင်ဖြစ်သူကိုခေါ်ပြီး မိန်းကလေးငယ်ဟာ ဓာတ်လိုက်သေဆုံးသွားကြောင်း၊ ရဲတပ်ဖွဲ့ကို အကြောင်းကြားရင် အလောင်းခွဲစိပ်စစ်ဆေးမှုမှာ ဆရာဝန်တွေက ကိုယ်တွင်းကလီစာတွေကို ထုတ်ယူရောင်းစားမှာ ဖြစ်တဲ့အတွက် ချက်ခြင်းသ​င်္ဂြိုဟ်ဖို့ ပြောကြားခဲ့ပါတယ်။ အလောင်းကို မီးသင်္ဂြိုဟ်စဉ်အတွင်း ပတ်ဝန်းကျင်က ကြားဝင်တားဆီးတဲ့အတွက် လူသိရှင်ကြား ဖြစ်လာတာပါ။

ကျူးလွန်သူတွေကို ဩဂုတ်လ အစောပိုင်းမှာ ဖမ်းဆီးထိန်းသိမ်းခဲ့ပြီး ဒီကိစ္စနဲ့ပတ်သက်လို့ မြို့တော် ဒေလီမှာ ဆန္ဒပြတောင်းဆိုမှုတွေလည်း ဖြစ်ပွားခဲ့ပါတယ်။ လက်ရှိမှာ ဖမ်းဆီးခံထားရသူတွေဟာ အမြင့်ဆုံး သေဒဏ်အထိ ချမှတ်နိုင်တဲ့ စွဲချက်တွေနဲ့ တရားစွဲဆို ခံထားရပါတယ်။

အိန္ဒိယနိုင်ငံဟာ ကမ္ဘာပေါ်မှာ အမျိုးသမီးတွေအတွက် မလုံခြုံဆုံး တိုင်းပြည်လို့ သတ်မှတ်ခံထားရတာပါ။ အဓမ္မကျင့် သတ်ဖြတ်မှုအတွက် ပြင်းထန်တဲ့ အပြစ်ဒဏ်တွေ သတ်မှတ်ထားပေမယ့် မြေပြင်မှာ အမျိုးသမီးတွေရဲ့ ဘ၀က တိုးတက်မှု မရှိပါဘူး။

အိန္ဒိယရာဇဝတ်မှုမှတ်တမ်းဌာန စာရင်းအရ ၂၀၁၉ ခုနှစ်အတွင်း အမျိုးသမီးနဲ့ မိန်းကလေးငယ်တွေ တစ်နေ့ကို ပျမ်းမျှ ၉၀ လောက် အဓမ္မပြုကျင့်မှု ခံရတယ်လို့ သိရပါတယ်။ ရဲတပ်ဖွဲ့ထံ လာမတိုင်တဲ့ အမှုတွေ တော်တော်များများ ရှိနေတာကြောင့် အမှန်ကတယ်ဖြစ်ပွားတဲ့အရေအတွက် ဒီထက်ပိုပြီး များနိုင်တယ်လို့ ကျွမ်းကျင်သူတွေက ဆိုပါတယ်။

အခုဖြစ်ပွားတဲ့ အဓမ္မကျင့်လူသတ်မှုဟာ နိုင်ငံအတွင်း လူဦးရေ သန်း ၂၀၀ လောက်ရှိနေတဲ့​ ဟိန္ဒူ ဒါလစ်ဇာနိမ့်တွေ ဖိနှိပ်ခံရမှု အဖြစ်အပျက်တွေထဲက တစ်ခုလည်း ဖြစ်ပါတယ်။ ဇာတ်ခွဲခြားမှုစနစ်အရ အရင်ကတည်းက ခွဲခြားဖိနှိပ်မှု ခံခဲ့ရတဲ့ ဒါလစ်လူ့အဖွဲ့အစည်းဟာ ကိုဗစ်ဖြစ်ပွားပြီးနောက်ပိုင်း တိုက်ခိုက်မှုတွေ ပိုခံလာရတယ်လို့ တက်ကြွလှုပ်ရှားသူတွေက ပြောပါတယ်။

Ref: AFP